‘ଓଡ଼ିଶାରେ ବି ମୋ ଗପର ଏତେ ଶ୍ରୋତା ଅଛନ୍ତି, ମତେ ଆଶ୍ଚର୍ଯ୍ୟ ଲାଗୁଛି’

ଭୁବନେଶ୍ୱର (ଓଡିଶା ରିପୋର୍ଟର): ରେଡିଓ ଜଗତରେ ତାଙ୍କର ଅନେକ ଚର୍ଚ୍ଚା, ଅନେକ ନାଁ। କିଛି ଘରୋଇ ଏଫ୍‌ଏମ୍‌ ରେଡିଓରେ ପ୍ରସାରିତ ତାଙ୍କ କାହାଣୀ ସବୁ ଏତେ ମାର୍ମିକ ଯେ, ଅନେକ ସମୟରେ ହୁଏତ ଆପଣଙ୍କ ଆଖିରୁ ଲୁହ ଖସି ପଡ଼ିଥିବ। ରେଡିଓକୁ ପୁଣି ଥରେ ଲୋକପ୍ରିୟ କରିବାରେ ତାଙ୍କର ଅବଦାନକୁ ସ୍ଵୀକାର କରିବାକୁ ପଡ଼ିବ। ସେ ହେଲେ ନୀଲେଶ ମିଶ୍ରା।

ନୀଲେଶଙ୍କର ସବୁଠୁ ବଡ଼ କଥା ହେଲା, ସେ ଜଣେ ବହୁତ ଭଲ ଷ୍ଟୋରି ଟେଲର ବା ଗପୁଡ଼ା। ଯେ କୌଣସି କାହାଣୀକୁ ସେ ଆକର୍ଷଣୀୟ ଢ଼ଙ୍ଗରେ କହିପାରନ୍ତି। ରେଡିଓରେ ଗପଟି ଶୁଣାଇବାର କଳା ତାଙ୍କଠାରୁ ହିଁ ଶିଖିବା ଉଚିତ। ତାଙ୍କ ଗପ ଶୁଣୁଥିବା ବେଳେ ଆପଣଙ୍କ ମାନସ ପଟ୍ଟରେ ଚିତ୍ର ସବୁ ଜୀବନ୍ତ ହୋଇଉଠନ୍ତି।

ନୀଲେଶ ଏକାଧାରାରେ ଜଣେ ସାମ୍ବାଦିକ, ଗାଳ୍ପ ଲେଖକ, ଷ୍ଟୋରି ଟେଲର ଏବଂ ଲିରିସିଷ୍ଟ ବା ଗୀତିକାର। ତେବେ ସବୁଠୁ ଅଧିକ ଚର୍ଚ୍ଚା ତାଙ୍କ ରେଡିଓ ସୋ ‘ଦି ନୀଲେଶ ମିଶ୍ରା ସୋ‘। ତାଙ୍କ ଲେଖାର ଯାଦୁ କେବଳ ରେଡ଼ିଓ ଜଗତରେ ସୀମିତ ନୁହେଁ, ବଲିଉଡରେ ମଧ୍ୟ ତାଙ୍କ ଲିଖିତ ଅନେକ ହିଟ୍ ଗୀତ ରହିଛି। ଯେମିତି ‘ଜିସ୍ମ’ ଚଳଚ୍ଚିତ୍ରର ‘ଜାଦୁ ହେ ନଶା ହୈ’ଠୁ ଆରମ୍ଭ କରି ‘ଜଗା ଜାସୁସ୍’ର ‘ଝୁମରି ତଲେଇୟା‘। କେବଳ ଗୀତ ନୁହେଁ ସେ ଜଣେ ଦକ୍ଷ ସ୍କ୍ରିପ୍ଟ ରାଇଟର ମଧ୍ୟ। ‘ଏକ୍‌ ଥା ଟାଇଗର’ ଓ ‘ଟାଇଗର୍ ଜିନ୍ଦା ହୈ’ର ସେ ସ୍କ୍ରିପ୍ଟ ଲେଖିଛନ୍ତି। ନିକଟରେ ସେ ଆସିଥିଲେ ଭୁବନେଶ୍ୱରରେ ଅନୁଷ୍ଠିତ ଏକ ଲିଟେରାରୀ ଫେଷ୍ଟିଭାଲ୍‌କୁ। ତାଙ୍କୁ ଭେଟିଥିଲେ ‘ଓଡ଼ିଶା ରିପୋର୍ଟର’ ପ୍ରତିନିଧି।

ଓଡ଼ିଶା ରିପୋର୍ଟର: ହିନ୍ଦୀ ଭାଷାରେ କହୁଥିବା ଗପ ଅଣହିନ୍ଦୀ ଲେକମାନଙ୍କୁ ବହୁତ ପସନ୍ଦ ଆସୁଛି, ଏହା ଉପରେ କ’ଣ କହିବେ ?

ନୀଲେଶ: ଏହା ମତେ ଆଶ୍ଚର୍ଯ୍ୟ କରୁଛି ଓ ଖୁସି ମଧ୍ୟ ଦେଉଛି। ଓଡ଼ିଶା ପରି ଅନେକ ରାଜ୍ୟ ଯେଉଁଠି ହିନ୍ଦି ମୁଖ୍ୟ ଭାଷା ନୁହେଁ, ସେଠାରେ ଲୋକେ ମୋ ଗପ ଶୁଣନ୍ତି ଯାହା ମତେ ଖୁସି ଦିଏ।

ଓଡ଼ିଶା ରିପୋର୍ଟର: ଏକାଧାରାରେ ଜଣେ ଲେଖକ, ଷ୍ଟୋରି ଟେଲର, ଆର.ଜେ., ସାମ୍ବାଦିକ। କେଉଁ ବୃତ୍ତିକୁ ଆପଣ ବେଶୀ ପସନ୍ଦ କରନ୍ତି ?

ନୀଲେଶ: ଷ୍ଟୋରି ଟେଲର ଭାବେ ମୁଁ ନିଜକୁ ସହଜ ମନେକରେ। ମତେ ଗପ କହିବାକୁ ଭଲ ମଧ୍ୟ ଲାଗେ। ଏମିତି ବି ମୋ ମତରେ ଜଣେ ସାମ୍ବାଦିକ ନିଜର କଥା ବା କାହାଣୀକୁ ଭଲ ଭାବରେ ପ୍ରକାଶ କରିପାରୁଥିବା ଉଚିତ୍। ସେ ବି ତ ଗପ କହେ।

ଓଡ଼ିଶା ରିପୋର୍ଟର: ନିଜ ଷ୍ଟୋରିରେ ଓଡ଼ିଆ ମାନଙ୍କୁ ସାମିଲ କରିବାର ଯୋଜନା ରହିଛି କି?

ନୀଲେଶ: ମୁଁ ଚାହଁଛି ଓଡ଼ିଶାର ଲେଖକମାନେ ମୋ ମଣ୍ଡଳୀରେ ଯୋଗ ଦିଅନ୍ତୁ। ଗପ ଲେଖନ୍ତୁ, ସୁଯୋଗ ମିଳିଲେ ମୁଁ ସେ ଗପ ପଢ଼ିବି।

(ଦେଖନ୍ତୁ ନୀଲେଶଙ୍କ ସହ ଏକ୍ସକ୍ଲୁସିଭ୍ ଭିଡିଓ ଇଣ୍ଟରଭ୍ୟୁ)

Previous ArticleNext Article

Send this to a friend