ରାତାରାତି ଷ୍ଟାର ପାଲଟିଗଲେ, ସୋନମ୍‌ ଦେଲେ ବଲିଉଡ୍‌ରେ ସୁଯୋଗ

ମୁମ୍ବାଇ: ଓଡ଼ିଆ ଝିଅ ଲିସା। ଚିକାଗୋରେ ରହୁନ୍ତି, ହେଲେ ବଲିଉଡ୍‌ ସଙ୍ଗୀତ ପ୍ରତି ଭାରି ଦୁର୍ବଳତା । ଆଉ ଏମିତି ଗୀତ ଶୁଣିବା ନିଶା ଆଜି ତାଙ୍କୁ ଆଜି କରିଦେଇଛି ଲୋକପ୍ରିୟ। ବଲିଉଡ୍‌ ଷ୍ଟାରମାନଙ୍କ କେହି ଫ୍ୟାନ୍‌ ବା ପ୍ରଶଂସକ ହେବା ଭଳି ତାଙ୍କର ବି କେହି ପାଲଟିଯାଇଛନ୍ତି ଫ୍ୟାନ୍‌। ଶୁଣିଲେ ଆଶ୍ଚର୍ଯ୍ୟ ହେବେ ଅନିଲ ତନୟା ସୋନମ୍‌ କପୁର ଏବେ ଲିସାଙ୍କ ପ୍ରଶଂସା ଶତମୁଖ। କାହିଁକି ଜାଣିଛନ୍ତ ?

ଆମେରିକାରେ ଚିକାଗୋଠାରେ ରହୁଥିବା ଓଡ଼ିଆ ଝିଅ ଲିସା ମିଶ୍ର ନିଜର ସଂଗୀତ ଦକ୍ଷତା ପାଇଁ ଏବେ ଚର୍ଚ୍ଚାରେ। ଆଉ ଲିସାଙ୍କୁ ଏବେ ଲୋକପ୍ରିୟ କରି ଦେଇଛନ୍ତି ବଲିଉଡ୍ ଅଭିନେତ୍ରୀ ସୋନମ୍ କପୁର। ଲିସା ବୃତ୍ତିଗତ ଭାବେ କଣ୍ଠଶିଳ୍ପୀ ନୁହନ୍ତି। ହେଲେ ସଂଗୀତ ପ୍ରତି ଖୁବ୍‌ ରୁଚି ରଖନ୍ତି। ସେ ସବୁବେଳେ ସୋସିଆଲ ମିଡିଆରେ କିଛି ନା କିଛି ଗୀତ ପୋଷ୍ଟ କରନ୍ତି। ଆଉ ଫଲୋଅର୍ସମାନେ ତାଙ୍କ ଗୀତ ଗାଇବା ଷ୍ଟାଇଲ୍‌କୁ ପସନ୍ଦ ବି କରନ୍ତି। କିନ୍ତୁ କେବେ ସେ ଲୋକ ଲୋଚନକୁ ଆସି ନ ଥିଲେ। ନିକଟରେ  ‘ବୀରେ ଦି ୱେଡିଂ’ ଫିଲ୍ମର ଗୀତ ‘ତାରିଫାନା..’ ଏବଂ ‘ଲେଟ୍ ମି ଲଭ୍ ୟୁ’ର ଗୀତ ‘ଡିଜେ ସ୍ନେକ୍’ର ମାସଅପ୍ କରି ସୋସିଆଲ୍ ମିଡିଆରେ ଅପଲୋଡ କରିଥିଲେ ଲିସା। ଆଉ ସୌଭାଗ୍ୟକୁ ସୋନମଙ୍କ ନଜରକୁ ଆସିଥିଲା ଏହି ଭିଡିଓ। ସୋନମ୍‌ ଲିସାଙ୍କ ଗାଇବା ଶୈଳୀରେ ଖୁବ୍‌ ମୁଗ୍ଧ ହୋଇ ଯାଇଥିଲେ। ଗୀତଟି ତାଙ୍କୁ ଏତେ ଭଲ ଲାଗିଲା ଯେ, ସେ ଲିସାଙ୍କୁ ମୁମ୍ବାଇ ଡକାଇଥିଲେ। ଏପରିକି ସେ ଆଉ ଥରେ ଗୀତଟିକୁ ସୁଟ୍ କରିବାକୁ ଚାହାନ୍ତି ବୋଲି ନିଜ ଆଡୁ ଲିସାଙ୍କୁ ପ୍ରସ୍ତାବ ଦେଇଥିଲେ। ଲିସା ବି ସୁଯୋଗକୁ ହାତଛଡା କରିନାହାନ୍ତି।

ଡାକରା ପାଇ ରବିବାର ରାତି ୩ଟାରେ ସେ ଚିକାଗୋରୁ ମୁମ୍ବାଇ ଆସୁଥିବା ବିମାନ ଧରିଥିଲେ। ତା’ର ଠିକ୍ ୨୪ ଘଣ୍ଟା ପରେ ସେ ସୋନମ୍‌ଙ୍କ ସହ ସାକ୍ଷତ କରିବାର ସୁଯୋଗ ପାଇଥିଲେ। କେବଳ ସୋନମ ନୁହଁନ୍ତି ସେ ରେହା, କରୀନାଙ୍କ ସମେତ ‘ବୀରେ ଦି ୱେଡିଂ’ର ସମସ୍ତ ସଦସ୍ୟଙ୍କ ସହ ସାକ୍ଷାତ କରିଥିଲେ। ତା’ପରେ ସୁଟ୍‌ ହୋଇଥିଲା ଭିଡିଓ। ଲିସାଙ୍କ ୫ ଦିନିଆ ମୁମ୍ବାଇ ଗସ୍ତରୁ ଦୁଇ ଦିନ ବିତିଥିଲା ରେକର୍ଡିଂରେ ।

ଏବେ ଏହି ଭିଡିଓ ୟୁଟ୍ୟୁବ୍‌ରେ ଭାଇରାଲ ହେବାରେ ଲାଗିଛି। ଯାହାକୁ ଦେଖି ଲିସାଙ୍କ ପାଦ ଆଉ ତଳେ ଲାଗୁନି। ଆଉ ଆତ୍ମହରା ହୋଇ ଲିସା ବଖାଣୁଛନ୍ତି ସେ ଅବିସ୍ମରଣୀୟ ମୁହୂର୍ତ୍ତର କଥା। କହିଛନ୍ତି- “ମୁଁ ଅଫିସରୁ ଘରକୁ ଗାଡ଼ି ଚଳାଇ ଫେରୁଥିଲି  ହଠାତ ଦେଖିଲି ଯେ ମୋ ଭିଡିଓଟିକୁ ସୋନମ କପୁର ତାଙ୍କ ପେଜରେ ସେୟାର୍ କରିଛନ୍ତି। ସେଥିରେ ତାଙ୍କ ବାପା ଅନୀଲ କପୁର, ଭାଇ ହର୍ଷବର୍ଦ୍ଧନ କପୁର କମେଣ୍ଟ ଦେଇଛନ୍ତି। ଏକତା କପୁର୍ ଏହାକୁ ତାଙ୍କ ପେଜରେ ସେୟାର୍ କରିଛନ୍ତି। ତାପରେ ମୋତେ ଡାକରା ଆସିଲା। ମୁଁ ମୁମ୍ବାଇ ଯାଇଥିଲି। ଖୁବ୍ କମ୍ ଦିନ ମଧ୍ୟରେ ବି ଭିଡିଓଟି ଖୁବ୍ ସୁନ୍ଦର ହୋଇପାରିଛି। ଏ ସବୁ ଏତେ ହଠାତ୍‌ ହୋଇଗଲା ଯେ, ମୁଁ କିଛି ଜାଣି ପାରିଲି ନାହିଁ। ଏହା ମୋ ପାଇଁ ମେମୋରେବଲ ହୋଇ ରହିବ। ସୋନମ ଏବଂ ରେହା ମୋତେ ନିଜ ପରିବାର ସଦସ୍ୟ ପରି ବ୍ୟବହାର କରିଛନ୍ତ ଯାହା ମୁଁ କେବେ ଭୁଲି ପାରିବି ନାହିଁ।’’

ଲିସା ଆହୁରି କହିଥିଲେ ସବୁଠୁ ଗୁରୁତ୍ୱ ପୂର୍ଣ୍ଣ କଥା ହେଉଛି ଅଭିନେତ୍ରୀ କରୀନା କପୁର ପିଲାଦିନରୁ ମୋର ପ୍ରିୟ ନାୟିକା। ସେ କହିଛନ୍ତି କି ଯେତେବେଳେ ସେ ତାଙ୍କୁ ସାମ୍ନାରେ ଦେଖିଲେ ପୂରାପୂରି ଭାବେ ଚୁପ୍ ହୋଇଯିବା ଛଡ଼ା ସେ ଆଉ କିଛି ବି କିରିପାରିଲେ ନାହିଁ। ଏ ସବୁ ଏବେ ତାଙ୍କୁ ସ୍ୱପ୍ନ ପରି ଲାଗୁଛି ବୋଲି ସେ ପ୍ରକାଶ କରିଛନ୍ତି।

ଲିସା ‘ତାରିଫାନା’ ଗୀତ ବ୍ୟତୀତ, ‘କବିରା’, ‘ଲଗଜା ଗଲେ’,  ‘ଦିଲ୍‌ ଦିୟା ଗଲା’, ‘ଜାଲିମା’ ଭଳି  ଅନେକ ଗୀତ ଗାଇଛନ୍ତି।

 

ଲିସାଙ୍କୁ ନେଇ ସୋନମ୍‌ ସୁଟ୍‌ କରିଥିବା ଭିଡିଓ

 

 

Previous ArticleNext Article

Send this to a friend