ଭେଟନ୍ତୁ ପ୍ରଥମ ଓଡ଼ିଆ ରାପର ସମୀରଙ୍କୁ, ଯିଏ ଯୁବପିଢ଼ିକୁ କରୁଛନ୍ତି ଦିୱାନା

Sameer image

ଏଇ କିଛି ଦିନ ହେବ ଜଣେ ଓଡ଼ିଆ ରାପର୍‌ଙ୍କୁ ନେଇ ଚାରିଆଡ଼େ ଚର୍ଚ୍ଚା ଚାଲିଛି। ୟୁଟ୍ୟୁବ୍‌ରେ ଜଣେ ଯୁବକ ଓଡ଼ିଆ ରାପ୍‌ ଗୀତ ଅପଲୋଡ୍ କରି ହଇଚଇ ସୃଷ୍ଟି କରିଛନ୍ତି। ସେ ହେଉଛନ୍ତି ପୁରୀ ଜନ୍ମିତ ‘ସମୀର ରିଶୁ ମହାନ୍ତି’। ସମୀରଙ୍କ ପ୍ରଥମ ଓଡ଼ିଆ ରାପ୍‌ ଗୀତ ‘ମୁଁ ହେଲି ଓଡ଼ିଆ’ ଏବେ ଇଣ୍ଟରନେଟ୍‌ରେ ଚହଳ ସୃଷ୍ଟି କରିଛି। ୟୁଟ୍ୟୁବ୍‌ରୁ ଆରମ୍ଭ କରି ଫେସ୍‌ବୁକ୍‌ ପର୍ଯ୍ୟନ୍ତ, ଚାରିଆଡ଼େ ଏହି ଗୀତକୁ ନେଇ ବେଶ୍ ଉତ୍ସାହ ଦେଖିବାକୁ ମିଳୁଛି। ଏହି ଗୀତ ରିଲିଜ ହେବାର ମାତ୍ର ଦୁଇଦିନରେ ଅଢ଼େଇ ଲକ୍ଷରୁ ଅଧିକ ଥର ଦେଖାଯାଇଥିଲା।  ତେବେ ଏହି ସଙ୍ଗୀତଟି ସମୀରଙ୍କ ପ୍ରଥମ ଗୀତ ନୁହେଁ। ପୂର୍ବରୁ ତାଙ୍କର ଆଉ ଏକ ଆଲବମ ‘ଓ୍ୱାନ କିଡ୍ ଓ୍ୱିଥ ଏ ଡ୍ରିମ’ ମଧ୍ୟ ଆସିଛି।

ତେବେ ଓ୍ୱାନ କିଡ୍ ଓ୍ୱିଥ ଏ ଡ୍ରିମ୍ ଆଲବମ ରିଲିଜ ହେବା ପରେ ରାତାରାତି ଷ୍ଟାର ପାଲଟି ଯାଇଥିଲେ ସେ। ସମୀରଙ୍କ ମା ଜାପାନୀ ହୋଇଥିବା ବେଳେ ବାପା ଓଡ଼ିଆ। ଘର ତାଙ୍କର ପୁରୀ। ଏଇ ଶ୍ରୀକ୍ଷେତ୍ରରେ କଟିଛି ତାଙ୍କ ପିଲାଦିନ। ନବମ କ୍ଲାସ ପରେ ସେ ଦାର୍ଜିଲିଙ୍ଗରେ ତାଙ୍କର ଦ୍ୱାଦଶ ପଢ଼ା ଶେଷ କରି ତା ପରେ ଉଚ୍ଚଶିକ୍ଷା ପାଇଁ ବାଙ୍ଗାଲୋର ଗଲେ। ସେଠାରେ ହିଁ ଆରମ୍ଭ ହେଲା ରାପିଙ୍ଗ କ୍ୟାରିୟର। ଓ୍ୱାଲର୍ଡର ବେଷ୍ଟ ମେଲ୍ ରାପର, ରେକର୍ଡ ପ୍ରଡ୍ୟୁସର ତଥା ଆକ୍ଟର ଏମନେମ୍‌ଙ୍କ ରାପିଙ୍ଗରେ ପ୍ରଭାବିତ ହୋଇ ସମୀର ଆରମ୍ଭ କଲେ ରାପିଙ୍ଗ। ସମୀର ବଲିଉଡ, କନ୍ନଡ଼ ଓ ତମିଲ ଇଣ୍ଡଷ୍ଟ୍ରିରେ ମଧ୍ୟ କାମ କରିଛନ୍ତି।

ଏବେ ମ୍ୟୁଜିକ୍‌ ଇଣ୍ଡଷ୍ଟ୍ରୀ ଉପରେ ରାପର୍‌ମାନଙ୍କ ଦବ୍‌ଦବା ପରିଲକ୍ଷିତ ହେଉଛି। ହଲିଉଡ୍‌ରୁ ବଲିଉଡ୍‌ ପର୍ଯ୍ୟନ୍ତ ରାପ୍ ଗୀତର ଧୁମ୍‌ ସବୁଠାରେ ରହିଛି। ହଲିଉଡ୍‌ର ଏମିନେମ୍‌, କେନ୍‌ଡ୍ରିକ୍‌ ଲାମାର, ବ୍ୟାଡ୍‌ ଆସ୍‌, ଜ୍ୟାଜ୍‌, ନିକି ମିନାଜ୍‌, ବିଗ୍‌ ସିନ୍‌ଙ୍କଠାରୁ ଆରମ୍ଭକରି ବଲିଉଡ୍‌ର ବାଦ୍‌ଶାହା, ୟୋ ୟୋ ହନି ସିଂ, ବୋହେମିଆ, ରଫ୍‌ତାର, ବାବା ସେହଗଲଙ୍କ ଭଳି ରାପର୍‌ମାନେ ଏବେ ସମଗ୍ର ବିଶ୍ୱରେ ଅନେକ ଲୋକପ୍ରିୟତା ହାସଲ କରିଛନ୍ତି। ତେବେ ଏକ୍ଷେତ୍ରରେ ପଛରେ ପଡିନି ଓଡ଼ିଶା। ସମୀର ଗୋଟିଏ ପରେ ଗୋଟିଏ ରାପ୍‌ ଗୀତ ତିଆରି କରି ସମସ୍ତଙ୍କ ଦୃଷ୍ଟି ଆକର୍ଷଣ କରିବାରେ ସଫଳ ହୋଇଛନ୍ତି। ତାହାପୁଣି ଖାଣ୍ଟି ଓଡ଼ିଆ ଶୈଳୀରେ। ସମୀରଙ୍କ ପ୍ରତି ଗୀତରେ ଓଡ଼ିଆ ଭାଷା, ଚାଲିଚଳଣି, ଓଡ଼ିଆ କଳା, ସଂସ୍କୃତି ସହ ଓଡ଼ିଶାର ଝଲକ ଦେଖିବାକୁ ମିଳୁଛି।  ତେବେ ଏସମ୍ପର୍କରେ ସମୀର ‘ଓଡ଼ିଶା ରିପୋର୍ଟର’ କୁ ଏକ ସ୍ୱତନ୍ତ୍ର ସାକ୍ଷାତ୍‌କାର ଦେଇଛନ୍ତି।

Previous ArticleNext Article

Send this to a friend