‘ଓଖି’ ତାଣ୍ଡବ: ୮ମୃତ, ୪୦ରୁ ଅଧିକ ନିଖୋଜ

okhi 2

ନୂଆଦିଲ୍ଲୀ: ଦକ୍ଷିଣ ଭାରତରେ ପୁଣି ଏକ ଘୂର୍ଣ୍ଣିଝଡ଼ ତାଣ୍ଡବ ମଚାଇଛି। ଏହି ଘୂର୍ଣ୍ଣିଝଡ଼ର ନାଁ ‘ଓଖି’ ରଖାଯାଇଛି। ‘ଓଖି’ ଯୋଗୁଁ ତାମିଲନାଡୁ ଓ କେରଳର ଦକ୍ଷିଣ ଜିଲ୍ଳା ଗୁଡ଼ିକରେ ଜୋରରେ ବର୍ଷା ଜାରି ରହିଛି। ଫଳରେ ସାଧାରଣ ଜୀବନଯାପନ ପ୍ରଭାବିତ ହୋଇଛି। ବର୍ତ୍ତମାନ ସୁଦ୍ଧା ‘ଓଖି’ ଯୋଗୁଁ ୮ ଜଣଙ୍କ ଜୀବନ ଯାଇଛି। ଏହାସହିତ ତାମିଲନାଡୁରେ ୪ ନାବିକ ଓ କେରଳରେ ୧୩ଟି ବୋଟ୍‌ର ପତ୍ତା ମିଳୁ ନାହିଁ।  ଏହି ବୋଟ୍‌ରେ ୩୮ଜଣ ଲୋକ ଥିବା କୁହାଯାଉଛି।

ନୌସେନାର ୫ ଟି ଜାହାଜ ଉଦ୍ଧାର କାର୍ଯ୍ୟରେ ଲାଗିଛନ୍ତି। ଆଉ ୨ଟିକୁ  ଲାକ୍ଷାଦ୍ୱୀପରେ ରଖାଯାଇଛି। ଏହାବ୍ୟତୀତ P8I ଏୟାରକ୍ରାଫ୍ଟ ଓ କୋଷ୍ଟ ଗାର୍ଡ ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି।

ଘୂର୍ଣ୍ଣିଝଡ଼ ‘ଓଖି’ କନ୍ୟାକୁମାରୀଠାରୁ ୬୦ କିଲୋମିଟର ଦୂର ଦକ୍ଷିଣରେ ରହିଛି। ଫଳରେ ଆଗାମୀ ୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ହେବାର ସମ୍ଭାବନା ରହିଛି। ଘୂର୍ଣ୍ଣିଝଡ଼ ଏବେ ଲାକ୍ଷାଦୀପ ଆଡେ ମୁହାଁଉଛି। ଆସନ୍ତାକାଲି ସେଠାରେ ଛୁଇଁପାରେ।

ଭାରତୀୟ ପାଣିପାଗ ବିଭାଗ ଦ୍ୱାରା ଜାରି କରାଯାଇଥିବା ସୂଚନା ଅନୁସାରେ ଘଣ୍ଟାପ୍ରତି ପବନର ବେଗ ୬୫-୭୫ କିଲୋମିଟର ରହିବ।

Previous ArticleNext Article

Send this to a friend