ଟେଲିକମ୍ ବଜାରରେ ନିଆଁ ଲଗେଇବ ଜିଓ: ଗ୍ରାହକଙ୍କୁ ବାଣ୍ଟିବ ମାଗଣା ମୋବାଇଲ୍ ଫୋନ୍

yy

ଟେଲିକମ୍ ବଜାରରେ ବୈପ୍ଲବିକ ପରିବର୍ତ୍ତନ ଆଣିଥିବା ଜିଓ ପୁଣି ଏକ ଧମାକେଦାର ଅଫର୍ ଆଣିଛି ଗ୍ରାହକଙ୍କ ପାଇଁ। ଭାରତୀୟ ଟେଲିକମ୍ ବଜାରକୁ ଅକ୍ତିଆର କରିବାକୁ ଅଣ୍ଟା ଭିଡିଛି ଜିଓ। ପୂର୍ବରୁ ଗ୍ରାହକଙ୍କୁ ମାଗଣାରେ ଡାଟା ଓ ଭଏସ୍ କଲ ଭଳି ସୁବିଧା ଦେଇ ନିଜ ସହ ଯୋଡି ରଖିଥିଲା ଜିଓ। ତେବେ ପୁଣିଥରେ ସବୁ କଳ୍ପନାଜଳ୍ପନା ଅନ୍ତ ଘଟାଇ ଗ୍ରାହକଙ୍କୁ ଏକ ନୂଆ ଅଫର୍ ଭେଟି ଦେଇଛି ରିଲାଏନ୍ସ ଜିଓ।

ଏବେ ପ୍ରତି ଭାରତୀୟଙ୍କ ହାତରେ ଦେଖିବାକୁ ମିଳିବ ଜିଓର ୪ଜି ସ୍ମାର୍ଟଫୋନ୍। କାରଣ ପ୍ରତି ଭାରତୀୟଙ୍କୁ ମାଗଣାରେ ସ୍ମାର୍ଟଫୋନ୍ ଯୋଗାଇଦେବ ରିଲାଏନ୍ସ କମ୍ପାନି। ଏନେଇ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡର ବାର୍ଷିକ ସାଧାରଣ ବୈଠକରେ ଘୋଷଣା କରିଛନ୍ତି ମାଲିକ ମୁକେଶ ଅମ୍ୱାନୀ। ଜିଓ ଫୋନ୍ ନେବା ପୂର୍ବରୁ କିନ୍ତୁ ଗ୍ରାହକଙ୍କୁ ୧୫୦୦ ଟଙ୍କା ଜମା କରିବାକୁ ପଡିବ। ୩ ବର୍ଷ ପରେ  ଜମା ଟଙ୍କା ଗ୍ରାହକ ଫେରି ପାଇବେ ବୋଲି କହିଛନ୍ତି ମୁକେଶ। ମୁକେଶଙ୍କ ଘୋଷଣା ପରେ ଟେଲିକମ୍ ବଜାରରେ ଲାଗିଛି ନିଆଁ।

ଜିଓ ଫୋନ୍ ପାଇଁ ଅଗଷ୍ଟ ୨୪ରୁ ପ୍ରି-ବୁକିଂ କରାଯିବ। ପ୍ରତି ମାସରେ ବଜାରକୁ ୫ ମିଲିୟନ ଜିଓ ଫୋନ୍‌ ଛଡାଯିବ। ସେପ୍ଟେମ୍ବର ପହିଲାରୁ ଏହାର ଫୋନ୍ ଦିଆଯିବ। ଏହି ଫୋନ୍‌ରେ ୨୨ଟି ଭାଷା ସର୍ପୋଟ କରିବ। ଖୁସିର କଥା ହେଲା, ଜିଓ ଫୋନ୍‌ରେ ଅନଲିମିଟେଡ୍ ଭଏସ୍ କଲର ଲାଭ ଉଠାଇ ପାରିବେ ଗ୍ରାହକ। ୧୫୩ ଟଙ୍କାର ପ୍ଲାନ୍‌ରେ ଭଏସ୍‌ କଲ୍‌, ଏସ୍‌ଏମ୍‌ଏସ୍‌ ଓ ଡାଟାର ସୁବିଧା ମିଳିବ। ୨.୪ ଇଞ୍ଚ ଡିସପ୍ଲେ ଥିବା ଏହି ଫୋନ୍‌ରେ ଅତ୍ୟାଧୁନିକ ସୁବିଧା ରହିଛି। ଏହି କି-ବୋର୍ଡ ଫୋନ୍‌ରେ ଭଏସ୍ ଦ୍ୱାରା ମଧ୍ୟ ଜଣେ ଫୋନ୍‌ ଚଲାଇପାରିବେ। ୫୧୨ ଏମ୍‌ବି ରାମ୍ ଓ ୪ ଜିବି ଇଣ୍ଟରନାଲ ମେମୋରୀ ରହିଛି ଏହି ଫୋନ୍‌ରେ। ମୁକେଶ କହିଛନ୍ତି, ପ୍ରତି ଭାରତୀୟଙ୍କୁ ଡିଜିଟାଲ ସ୍ୱାଧୀନତା ଦେବ ଜିଓ ଫୋନ୍‌। ସମ୍ପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ହୋଇଛି ଏହି ୪ଜି ସ୍ମାର୍ଟଫୋନ୍‌। ଭାରତୀୟଙ୍କ ପାଇଁ ଭାରତୀୟ ଯୁବବର୍ଗଙ୍କ ଦ୍ୱାରା ନିର୍ମିତ ହୋଇଛି ଜିଓ ଫୋନ୍‌।

Previous ArticleNext Article