ଆକାଶରୁ ଖସିବ ନିଆଁ ପିଣ୍ଡୁଳା!

Ulka

ଭୁବନେଶ୍ୱର: ଆକାଶରୁ ତାରା ଖସିବା ଦେଖିଲେ ଅନେକେ ଆଖି ବନ୍ଦ କରି ମନସ୍କାମନା କରନ୍ତି।  ପ୍ରକୃତରେ ସେତେବେଳେ ଆକାଶରୁ ତାରା ଖସେ ନାହିଁ, ବରଂ ଉଲ୍‌କାପାତ ହେଉଥାଏ।  ତେବେ ଆଜି ରାତିରେ ଗୋଟିଏ କି ଦୁଇଟି ନୁହେଁ, ହେବ ଶହଶହ ଉଲ୍‌କାପାତ।  ଯଦି ଏଭଳି ଚକିତ କଲା ଭଳି ମହାଜାଗତିକ ଦୃଶ୍ୟ ଦେଖିବାକୁ ଚାହୁଁଛନ୍ତି, ତେବେ ରାତି ୧୦ଟା ପରେ ଉତ୍ତର-ପୂର୍ବ ଆକାଶ ଉପରେ ନଜର ରଖିଥାନ୍ତୁ।

ଆଜି ରାତି ଉଲ୍‌କାପାତର ରାତି।   ଲାଗିବ, ସତେ ଯେମିତି ଆକାଶରୁ ଖସିପଡ଼ୁଛନ୍ତି ଶହଶହ ତାରା। ବାଇନୋକୁଲାର୍ କି ଅନ୍ୟ କୌଣସି ଉପକରଣ ସାହାଯ୍ୟରେ ନୁହେଁ, ଖାଲି ଆଖିରେ ଦେଖିହେବ ଏହି ମହାଜାଗତିକ ଦୃଶ୍ୟ।  ଆଜି ରାତି ପ୍ରାୟ ୧୦ଟାରୁ ଉଲ୍‌କାପାତ ଆରମ୍ଭ ହୋଇ ଆସନ୍ତାକାଲି ଭୋର୍ ଯାଏଁ ଚାଲିବ।  ଆକାଶର ଉତ୍ତର-ପୂର୍ବ ଦିଗକୁ ଦେଖିଲେ ସ୍ପଷ୍ଟ ଦେଖିହେବ ଏହି ବିସ୍ମିତ କଲା ଭଳି ଦୃଶ୍ୟ।  ଜେମିନି କନ୍‌ଷ୍ଟେଲେସନ୍‌ ବା ମିଥୁନ ତାରା ମଣ୍ଡଳରୁ ଏହି ଉଲ୍‌କା ଖସୁଥିବା ଭଳି ଦେଖାଯାଉଥିବାରୁ ଏହାକୁ ଜେମିନିଡ୍ ମିଟିଓର୍ ସାଓ୍ୱାର୍ ବୋଲି କୁହାଯାଉଛି।  ମହାକାଶ ବିଜ୍ଞାନୀ ମାନେ ଅନୁମାନ କରୁଛନ୍ତି, ରାତି ୨ଟା ବେଳେ ଘଣ୍ଟାକୁ ସର୍ବାଧିକ ପ୍ରାୟ ୧୨୦ଟି ଉଲ୍‌କା ଖସିବାର  ସମ୍ଭାବନା ରହିଛି।

ଗ୍ରହାଣୁ ୩୨୦୦ ଫାଏଥୋନ୍‌ର ଧୂଳିକଣା ଓ ପଥରଖଣ୍ଡଗୁଡ଼ିକ ପ୍ରତିବର୍ଷ ଡିସେମ୍ବର ୪ରୁ ୧୬ ମଧ୍ୟରେ ପୃଥିବୀର ବାୟୁମଣ୍ଡଳରେ ପ୍ରବେଶ କରୁଥିବାରୁ ଏଭଳି ଉଲ୍‌କାପାତ ହୋଇଥାଏ।  ୧୯୮୩ ମସିହାରେ ଆବିଷ୍କାର ହୋଇଥିବା ଗ୍ରହାଣୁ ୩୨୦୦ ଫାଏଥୋନ୍‌ର ଲମ୍ବ ୫ କିଲୋମିଟର।  ଆପଣ ଯଦି ଏହି ମହାଜାଗତିକ ଦୃଶ୍ୟକୁ ସ୍ପଷ୍ଟ ଭାବେ ଦେଖିବାକୁ ଚାହୁଁଛନ୍ତି, ତାହେଲେ ରାତି ୧୦ଟା ପରେ ବିଜୁଳି ବତି ଜଳୁନଥିବା ସ୍ଥାନରେ ଆକାଶକୁ ଚାହଁନ୍ତୁ, ଆଉ ଏହି ବିରଳ ଦୃଶ୍ୟର ମଜା ନିଅନ୍ତୁ।

Previous ArticleNext Article

Send this to a friend