ପ୍ରଣବଙ୍କୁ ନେଇ ବଢୁଛି ରାଜନୈତିକ ଉଷ୍ମତା : ଏଥର କିନ୍ତୁ କଂଗ୍ରେସ ନୁହଁ !

ଭୁବନେଶ୍ୱର (ଓଡ଼ିଶା ରିପୋର୍ଟର): ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ନେଇ ଦେଶର ରାଜନୀତିରେ ହଲଚଲ୍।   ଆସନ୍ତା ୭ ତରିଖରେ ନାଗପୁର ଆରଏସ୍‌ଏସ୍‌ କାର୍ଯ୍ୟକ୍ରମରେ ମୁଖ୍ୟ ଅତିଥି ହେବା ଲାଗି ପ୍ରଣବ ରାଜି ହେବା ପରେ ସୃଷ୍ଟି ହୋଇଛି ଭୃକୁଞ୍ଚନ।  କଂଗ୍ରେସିଆ ଛବିକୁ ପଛରେ ପକାଇ ସେ ଏକ ନୂଆ ଅବତାର ନେବାକୁ ଚେଷ୍ଟା କରୁଥିବା ଚର୍ଚ୍ଚା ହେଉଛି।  ପରୋକ୍ଷ ପୃଷ୍ଠଭୂମିରେ ରହି ସେ ହିଁ ଆଗାମୀ ନିର୍ବାଚନରେ କଂଗ୍ରେସ ଓ ବିଜେପିକୁ ଛାଡି, ଅନ୍ୟ ଦଳଙ୍କ ସହାୟତାରେ ତୃତୀୟ ସାମ୍ମୁଖ୍ୟ ଗଠନ ଲାଗି ଗୋଟି ଚାଳନା କରୁଥିବା ନେଇ ଜାତୀୟ ଗଣମାଧ୍ୟମରେ ଜୋରଦାର୍ ଚର୍ଚ୍ଚା ହେଉଛି।

ଅନ୍ୟପଟେ ଆରଏସ୍ଏସ ବୈଠକକୁ ପ୍ରଣବ ଅତିଥି ହୋଇ ଯିବା କଥାକୁ ଅନେକ ବିଶ୍ୱାସ କରୁନାହାନ୍ତି । ତେବେ ଏହା ସତ ଯେ, ପ୍ରଣବ ଆରଏସ୍‌ ଏସ୍‌ ବୈଠକରେ ଅତିଥି ହେବାକୁ ସହମତି ପ୍ରଦାନ କରିଛନ୍ତି ।  ଏଥିସହିତ ଏକ ଭିନ୍ନ ସିଗ୍ନାଲ ମଧ୍ୟ ଦେଇଛନ୍ତି, ଯେ ତାଙ୍କ ଦେହରେ  ଆଉ ଲାଗିନି ହାର୍ଡକୋର କଂଗ୍ରେସ ନେତାର ଟ୍ୟାଗ୍ । ତାଙ୍କ ଏଭଳି ଆଭିମୁଖ୍ୟ ପରିବର୍ତ୍ତନ ପଛର କାରଣକୁ ନେଇ ଚର୍ଚ୍ଚା ଚାଲିଥିବା ବେଳେ ଭାରତୀୟ ରାଜନୀତିର ଏହି ପୁରୁଖା ନେତା ଭିନ୍ନ ଗୋଟିଚାଳନା କରୁଥିବା ଚର୍ଚ୍ଚା ଚାଲିଛି ।

ଗୁରୁତ୍ୱପୂର୍ଣ୍ଣ କଥା ହେଉଛି ନବୀନ ନିବାସରେ ଗତ ଜାନୁଆରୀ ମାସରେ ଏ ଲଞ୍ଚ ଡିପ୍ଲୋମାସିରୁ ହିଁ କୁଆଡ଼େ ତୃତୀୟ ସାମ୍ମୁଖ୍ୟ ଗଠନର ମୂଳଦୁଅ ପଡିଥିବା ଜାତୀୟ ଗଣମାଧମୟରେ ଚର୍ଚ୍ଚା ହେଉଛି। ବିଜୁ ବାବୁଙ୍କ ଜୀବନୀ ପୁସ୍ତକ ଉନ୍ମୋଚନ ଅବସରରେ ଏକାଠି ହୋଇଥିଲେ ପ୍ରଣବ, ନବୀନ, ଆଡଭାନୀ, ଦେବେଗୌଡ଼ା ଓ ସୀତା ରାମ ୟେଚୁରୀ । ତେବେ ଏହାର ବହୁ ଆଗରୁ ରାଷ୍ଟ୍ରପତି ଭବନରେ ନବୀନ, ମମତା ଓ ପ୍ରଣବଙ୍କ ମଧ୍ୟରେ ଏହାର ପ୍ରାରମ୍ଭିକ ଆଲୋଚନା ହୋଇଥିବା କୁହାଯାଉଛି ।  ସେପଟେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ପ୍ରଣବଙ୍କ ଘନିଷ୍ଠତା ଏବଂ ଏବେ ମମତା ଓ ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ ତୃତୀୟ ସାମ୍ମୁଖ୍ୟ ଗଠନ ଉଦ୍ୟମର ଆଗରେ ରହିଥିବାରୁ ଏଥିରେ ପ୍ରଣବଙ୍କ ଗୋଟିଚାଳନା ଥିବା ଚର୍ଚ୍ଚା ହେଉଛି।

କଂଗ୍ରେସର ଜଣେ ପ୍ରଗାଢ ଅନୁରକ୍ତ ହୋଇଥିଲେ ବି ଦଳ ପ୍ରଣବଙ୍କୁ ଅନେକ ଥର ନିରାଶ କରିଛି। ଖାସ୍ କରି ୨୦୦୪ରେ ପ୍ରଣବ ପ୍ରଧାନମନ୍ତ୍ରୀ ପଦ ଲାଗି ପ୍ରମୁଖ ଦାବିଦାର୍ ମନେ କରାଯାଉଥିଲେ ମଧ୍ୟ ମନମୋହନଙ୍କୁ ଗାଦିରେ ବସାଇ ଥିଲେ ସୋନିଆ।  ଏହା ପ୍ରଣବଙ୍କ ପାଇଁ ଥିଲା ସବୁଠୁ ବଡ଼ ଝଟ୍‌କା। ପ୍ରଣବ ନିଜ ବହିରେ ମଧ୍ୟ ମନର ନୈରାଶ୍ୟକୁ ବର୍ଣ୍ଣନା କରିଛନ୍ତି । ତେଣୁ କେନ୍ଦ୍ରରେ ଏକ ଅଣ ବିଜେପି, ଅଣ କଂଗ୍ରେସ ସରକାର ଗଠନ ଲାଗି ସେ ପ୍ରୟାସ କରୁଥିବା ଚର୍ଚ୍ଚା ଚାଲିଛି ।

ପ୍ରଣବ

ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କୁ ନେଇ ବଢୁଛି ରାଜନୈତିକ ଉଷ୍ମତା : ଏଥର କିନ୍ତୁ କଂଗ୍ରେସ ନୁହଁ ! ଦେଖନ୍ତୁ ଭିଡିଓ ଷ୍ଟୋରୀ

Posted by Odisha Reporter on 30 मे 2018

Previous ArticleNext Article

Send this to a friend