ଦୋକାନ ଭିତରେ ୧୧ ନାଗ ସାପ ଛୁଆ

snake

ଉଦଳା (ମାନସ ପାଣି):  ମୟୂରଭଞ୍ଜ ଜିଲ୍ଲା ଉଦଳା ଥାନା ରାଢ଼ୋ ଗାଁର ଏକ ଦୋକାନରୁ ଆଜି ୧୧ଟି ନାଗସାପ ଛୁଆ ଉଦ୍ଧାର କରାଯାଇଛି। ଏ ଦୋକାନଟି କୃପାସିନ୍ଧୁ  ରାଉତଙ୍କର। ସେ ଆଜି ଦୋକାନ ଘର କାମ କରୁଥିବା ବେଳେ ଏକ ଗାତରେ ସାପଗୁଡ଼ିକୁ ଦେଖିବାକୁ ପାଇଥିଲେ। ଏହା ପରେ ସେ ସ୍ଥାନୀୟ ସ୍ନେକ୍ ଲାଇଫ୍ ଲାଇନ୍ ସଦସ୍ୟଙ୍କୁ ଖବର ଦେଇଥିଲେ। ସ୍ନେକ୍ ଲାଇଫ୍ ଲାଇନ୍‌ର ସଦସ୍ୟମାନେ ଆସିବା ପରେ ସାପଗୁଡ଼ିକୁ ଗାତରୁ ବାହାର କରିଥିଲେ। ସାପ ଦେଖିବା ପାଇଁ କୃପାସିନ୍ଧୁଙ୍କ ଦୋକାନ ଘର ସାମ୍ନାରେ ଲୋକଙ୍କ ଭିଡ଼ ଜମିଥିଲା।

ଜଗତସିଂହପୁର ଓ କଟକରେ ବି ସାପ ଛୁଆ ଉଦ୍ଧାର

ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ୍ ଅନ୍ତର୍ଗତ ମଙ୍ଗରାଜପୁର ଗାଁର ପାଇକସାହି ଅଞ୍ଚଳରେ ଆଜି ୭ଟିରୁ ଅଧିକ ସାପ ଛୁଆ ଉଦ୍ଧାର କରାଯାଇଛି। ସିନ୍ଧୁ ରାଉତଙ୍କ ଘରୁ ଏହି ସାପଗୁଡ଼ିକୁ ଉଦ୍ଧାର କରାଯାଇଛି। ଏଥିରୁ ୪ଟି ସାପ ମରିଯାଇଥିବା ବେଳେ ୩ଟି ଜୀବିତ ଅଛନ୍ତି। ସାପଗୁଡ଼ିକ କେଉଁ ପ୍ରଜାତିର ସ୍ପଷ୍ଟ ହୋଇନାହିଁ।

ସିନ୍ଧୁଙ୍କ ଘରେ ପ୍ରଥମେ ଗୋଟିଏ ସାପ ଛୁଆ ବୁଲୁ ଥିବା ଘର ଲୋକେ ଦେଖିବାକୁ ପାଇଥିଲେ। ଘର ଲୋକେ ସାପଟିକୁ ବାଡ଼େଇ ମାରି ଦେଲେ। ଏହା ପରେ ଆଉ ଦୁଇଟି ସାପ ଛୁଆ ବାହାରି ଥିଲେ। ପରେ ଖୋଜାଖୋଜି କରିବା ପରେ ଅନ୍ୟ ସାପଗୁଡ଼ିକୁ ଠାବ କରାଯାଇଥିଲା। ଗୋଟେ ଘରୁ ଏତେ ସାପ ବାହାରିବା ପରେ ଗାଁ ଲୋକେ ଆତଙ୍କିତ ହୋଇପଡ଼ିଛନ୍ତି। ଏହାର ପ୍ରତିକାର ବ୍ୟବସ୍ଥା କରିବାକୁ ଗାଁ ଲୋକେ ଦାବି କରିଛନ୍ତି।

ସେହିପରି କଟକ ଜିଲ୍ଲା ମାହାଙ୍ଗା ବ୍ଲକ କାଳିଅଣ୍ଟି ଗାଁରୁ ୩ଟି ନାଗସାପ ଉଦ୍ଧାର କରାଯାଇଛି। ଗାଁରେ ଥିବା ଭାଗବତ ଗାଦି ଠାକୁର ଘରୁ ୩ଟି ନାଗସାପ ଉଦ୍ଧାର କରାଯାଇଛି। ଅଧିକ ସାପ ଥିବା ସନ୍ଦେହରେ ସ୍ନେକ୍ ହେଲ୍‌ପ ଲାଇନ୍‌ର ସହାୟତା ଲୋଡ଼ାଯାଇଛି।

ଗତ କିଛି ଦିନ ହେବ ରାଜ୍ୟର ବିଭିନ୍ନ ସ୍ଥାନରୁ ଏମିତି ସାପ ଉଦ୍ଧାର କରାଯାଉଛି। କେବଳ ଭଦ୍ରକର ଏକ ଗାଁରୁ ଗୋଟିଏ ଘରୁ ପ୍ରାୟ ୧୩୦ଟି ନାଗ ସାପ ଉଦ୍ଧାର କରାଯାଇଥିଲା।

Previous ArticleNext Article

Send this to a friend