ସୁପାରିର ଦାମ ଛିଡ଼ିଥିଲା ୭ ଲକ୍ଷ, ଧରାପଡ଼ିଗଲେ ରାଜନେତା

ବ୍ରହ୍ମପୁର (ଓଡ଼ିଶା ରିପୋର୍ଟର): ସାତ ଲକ୍ଷର ସୁପାରି ଡିଲ୍। ଚୁକ୍ତି ଥିଲା କୋର୍ଟ ପରିସରରେ ଗଡ଼ିବ ମୁଣ୍ଡ। ହତ୍ୟାର ପ୍ରତିଶୋଧ ହତ୍ୟାରେ ନିଆଯିବ। ପିଏଲ୍ଏଫ୍ଆଇର ପୂର୍ବତନ ସଦସ୍ୟ ବବଲୁ ପାଶୱାନ ସହ ହୋଇଥିଲା ଏଭଳି ହାଇପ୍ରୋଫାଇଲ୍ ଡିଲ୍। ଏଥିପାଇଁ ଆଗୁଆ ମିଳିଥିଲା ୩ ଲକ୍ଷ ଟଙ୍କା। ହତ୍ୟାକାଣ୍ଡ ପରେ ଆଉ ୪ ଲକ୍ଷ ଟଙ୍କା। ଏହାଛଡ଼ା ଅନ୍ୟାନ୍ୟ ଖର୍ଚ୍ଚ ବାବଦକୁ ୫୦,୦୦୦ ଟଙ୍କା ମିଳିଥିଲା। ଝାଡ଼ଖଣ୍ଡରର ଦୁର୍ଦ୍ଦାନ୍ତ ଅପରାଧୀ ବବଲୁ ପାଶୱାନ ସହ ଏଭଳି ଡିଲ୍ କରିଥିଲେ ଆସକା ଏନ୍ଏସିର ପୂର୍ବତନ ଅଧ୍ୟକ୍ଷ ସୂର୍ଯ୍ୟ ପଲାଇ। ବବଲୁ ଏନ୍‌କାଉଣ୍ଟର ପରେ ଏଭଳି କ୍ରାଇମ ପ୍ଲଟର ଗୁମର ଖୋଲିଛି ଗଞ୍ଜାମ ପୋଲିସ।

୨୦୧୭ ନଭେମ୍ବର ୬ ତାରିଖରେ ବସ୍ ଭିତରେ ସୂର୍ଯ୍ୟ ପଲାଇଙ୍କ ସମ୍ପର୍କୀୟ ଭାଇ ତଥା ବ୍ୟବସାୟୀକ ପାର୍ଟନର୍ ପ୍ରତାପ ପଲେଇକୁ ହତ୍ୟା କରାଯାଇଥିଲା। ଏହି ହତ୍ୟାକାଣ୍ଡର ପ୍ରତିଶୋଧ ନେବା ପାଇଁ ତିଆରି ହୋଇଥିଲା ବ୍ଲୁ ପ୍ରିଣ୍ଟ। ତେବେ ଡିସେମ୍ବର ୭ ତାରିଖରେ ପୂର୍ବ ଯୋଜନା ମୂତାବକ ରାଉରକେଲାରୁ ଭଞ୍ଜନଗର ଆସିଥିଲେ ବବଲୁ ଓ ତାଙ୍କ ସହଯୋଗୀ ଜିତେନ୍ଦ୍ର ନାୟକ। ଏହାପରେ ସୂର୍ଯ୍ୟ ପଲାଇ ସହ ମିଶି ପ୍ରସ୍ତୁତ କରିଥିଲେ ଯୋଜନା। ପ୍ରତାପ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ରବି ନାହାକକୁ ୮ ତାରିଖରେ ଆସକା ଜେଲରୁ କୋର୍ଟକୁ ନିଆଯିବା ବେଳେ ଗୁଳି କରି ହତ୍ୟା କରିବାକୁ ତିଆରି ହେଲା ବ୍ଲୁ ପ୍ରିଣ୍ଟ। ଆଉ ଯୋଜନା ମୂତାବକ ସୂର୍ଯ୍ୟ ପଲାଇଙ୍କ କାରରେ ବାହାରିଲେ ୩ ଅଭିଯୁକ୍ତ। ଏ ସମ୍ପର୍କରେ ପୋଲିସ ଜାଣିପାରି ଆସକା ପହଞ୍ଚିବା ପୂର୍ବରୁ ଅଧା ରାସ୍ତାରେ ଏନ୍‌କାଉଣ୍ଟର କରି ବବଲୁକୁ ଧରିବାରେ ସଫଳ ହୋଇଥିଲା। ତେବେ ଘଟଣାସ୍ଥଳରୁ ଜିତେନ୍ଦ୍ର ଓ ସୂର୍ଯ୍ୟ ପଲେଇ ଫେରାର ହୋଇଯାଇଥିଲେ। ପରେ ପୋଲିସ ଏନ୍‌କାଉଣ୍ଟର କରି ଜିତେନ୍ଦ୍ରକୁ ଧରିଥିଲା। ଫେରାର ଥିବା ଅନ୍ୟତମ ଅଭିଯୁକ୍ତ ସୂର୍ଯ୍ୟକୁ ଗତକାଲି ରାତିରେ ପୋଲିସ ଗିରଫ କରିଛି।

ଆସକା ଏନ୍ଏସିର ପୂର୍ବତନ ଅଧ୍ୟକ୍ଷ ସୂର୍ଯ୍ୟ ପଲାଇ ମଧ୍ୟ ଜଣେ ଦୁର୍ଦ୍ଦାନ୍ତ ଅପରାଧୀ। ତାଙ୍କ ନାଁରେ ବିଭିନ୍ନ ଥାନାରେ ରହିଛି ୧୮ରୁ ଅଧିକ ମାମଲା। ରାଉରକେଲାରେ ରହି ନିଜର ବ୍ୟାବସାୟିକ କାରବାର ଜାରି ରଖିଥିଲେ ସୂର୍ଯ୍ୟ। ତେବେ ସୁପାରି ପାଇଁ କେଉଁଠୁ ଏତେ ଟଙ୍କା ପାଇଲା ସୂର୍ଯ୍ୟ ପଲାଇ ? ଏହାପଛରେ ଆଉ କାହାର ହାତ ରହିଛି କି? ସମସ୍ତ ଦିଗକୁ ଧରି ଏବେ ପୋଲିସ ଜାରି ରଖିଛି ତନାଘନା।

Previous ArticleNext Article

Send this to a friend