ବନ୍ଦ ହେଲା ୭ ଖଣି

mines

ଭୁବନେଶ୍ୱର (ଓଡ଼ିଶା ରିପୋର୍ଟର): ବନ୍ଦ ହେଲା ୭ଟି ଖିଲାପି ଖଣି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ମୁତାବକ ଧାର୍ଯ୍ୟ ସମୟ ଅର୍ଥାତ ୩୧ ଡିସେମ୍ବର ଭିତରେ ଜରିମାନା ଦେଇପାରି ନଥିବାରୁ ଏସବୁ ଖଣିକୁ ବନ୍ଦ କରିଛନ୍ତି ରାଜ୍ୟ ସରକାର।

ସିରାଜୁଦ୍ଦିନର ବଲଦା ମାଇନ୍ସ, ମେସ୍କୋର ରଇଡା, ଆଇଡିସିର ରଇଡା, ନ୍ୟାସନାଲ୍ ଏଣ୍ଟରପ୍ରାଇଜେସ୍‌ର କୋଇଡା, କ୍ରପ୍ ରିସୋରେସ୍‌ର ତନ୍ତ୍ର ମାଇନ୍ସ, ଏସେଏଲ୍ ମାଇନ୍‌ସ୍‌ କୋଇଡା, ପାଟବାଡ ଓଏମ୍ଏମ୍ ଖଣି ଡିସେମ୍ବର ୩୧ ଭିତରେ ଜରିମାନା ବାବଦକୁ ପ୍ରାୟ ୪ହଜାର କୋଟି ଟଙ୍କା ଦେଇ ନଥିବାରୁ ରାଜ୍ୟ ସରକାର ଏସବୁ ଖଣି ଖୋଲିବା ଉପରେ ରୋକ୍ ଲାଗାଇଛନ୍ତି।

ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ରାଜ୍ୟ ଖଣି ବିଭାଗ ମୋଟ ୧୩୧ ଲିଜ୍‌ଧାରୀଙ୍କୁ ଡିମାଣ୍ଡ ନୋଟିସ୍ ଜାରି କରିଥିଲା। ଯେଉଁଥିରେ କାର୍ଯ୍ୟକ୍ଷମ ଥିବା ୪୬ଟି ଆଇରନ୍ ଓର୍ ଓ ୮ଟି ମାଙ୍ଗନିଜ୍  ଖଣି ରହିଥିଲା। ସେଥିମଧ୍ୟରୁ ପ୍ରାୟ ୪୩ ଖଣି ଲିଜ୍‌ଧାରୀ ଜରିମାନା ପ୍ରଦାନ କରିଛନ୍ତି। ଅନ୍ୟ କାର୍ଯ୍ୟକ୍ଷମ ନଥିବା ୭୭ଟି ଖଣି ମଧ୍ୟରୁ ୩୦ଖଣି ଲିଜଧାରୀ ମଧ୍ୟ  ଫାଇନ ଦେଇଛନ୍ତି। ତେବେ ୧୭ ହଜାର ୫ଶହ କୋଟି ମଧ୍ୟରୁ ସରକାରଙ୍କ ଖାତାକୁ ଆସିଛି ୮ ହଜାର ୨୨୩ କୋଟି ଟଙ୍କା। ଆସନ୍ତା ୪ ତାରିଖରେ ରାଜ୍ୟ ସରକାର ସେଣ୍ଟ୍ରାଲ ଏମ୍ପପାଓ୍ୱାର୍ କମିଟି (ସିଇସି) ପାଖରେ ଷ୍ଟାଟସ୍ ରିପୋର୍ଟ ଦାଖଲ କରିବେ। ଆସନ୍ତା ୧୭ ତାରିଖରେ କୋର୍ଟରେ ଶୁଣାଣି ହେବ।

ଅନ୍ୟପକ୍ଷରେ ୫୮ଟି ଖଣି ଲିଜଧାରୀ ଜରିମାନା ଦେଇନାହାନ୍ତି। ତେଣୁ ପ୍ରାୟ ୯ହଜାର ୭ଶହ କୋଟି ରାଜ୍ୟ ସରକାରଙ୍କ ଖାତାକୁ ଆସିନାହିଁ। ଏସବୁ ଖଣି ବନ୍ଦ ରହିଛି ସତ, ହେଲେ କିଭଳି ଜରିମାନା ଆଦାୟ ହେବ, ତାକୁ ନେଇ ଦ୍ୱନ୍ଦ ଲାଗି ରହିଛି।

ଜରିମାନା ଦେଇ ନଥିବା ଲିଜଧାରୀମାନେ ଅଧିକ ସମୟ ମାଗିବା ସହ ଇନ୍‌ଷ୍ଟଲମେଣ୍ଟ ଆଧାରରେ ଜରିମାନା ଦେବା, ଖଣିଗୁଡିକର କାର୍ଯ୍ୟକ୍ଷମ ପାଇଁ ଅନୁମତି ଦେବା ନେଇ କୋର୍ଟକୁ ଅବଗତ କରାଇବେ।

ଖଣି ଲିଜ୍‌ଧାରୀଠାରୁ ଆଦାୟ ହୋଇଥିବା ଅର୍ଥ ରାଜ୍ୟ ସରକାର କିଭଳି ଖର୍ଚ୍ଚ କରୁଛନ୍ତି ଓ ଅନାଦେୟଜରିମାନା କିଭଳି ଆଦାୟ କରୁଛନ୍ତି ତାହା ଉପରେ ଏବେ ସମସ୍ତଙ୍କ ନଜର।

Previous ArticleNext Article

Send this to a friend