ଚୋରର ଦୁର୍ଭାଗ୍ୟ: ଛେଳି ଚୋରି କରି ପଳାଉଥିବା ବେଳେ ନଳକୂଅରେ ପିଟି ହୋଇ ପ୍ରାଣ ଗଲା

Dead-body

ବଲାଙ୍ଗିର: ବାଇକ୍‌ରେ ଛେଳି ଚୋରି କରି ପଳାଉଥିବା ସମୟରେ ନଳକୂଅରେ ପିଟି ହୋଇ ଚୋରର ମୃତ୍ୟୁ। ଘଟଣାଟି ଘଟିଛି ବଲାଙ୍ଗିର ଜିଲ୍ଲା ତୁଷୁରା ଥାନା ଫଟାମୁଣ୍ଡା ଗାଁରେ। ମୃତ ଯୁବକଙ୍କ ନାଁ ରାଜେଶ ନାଗ।

ଆଜି ଅପରାହ୍ନ ପ୍ରାୟ ଗୋଟାଏ ବେଳେ ପୁଇଁନ୍ତଲା ଗାଁର ସୁବ୍ରତ ନନ୍ଦ, କଏଁରୁ ନନ୍ଦ ଓ ରାଜେଶ ନାଗ ଫଟାମୁଣ୍ଡା ଗାଁକୁ ଏକ ବାଇକ୍‌ରେ ଆସିଥିଲେ। ସେତେବେଳେ ଗାଁ ବାହାରେ ଭୀମ ରାଏ ନାମକ ଜଣେ ବ୍ୟକ୍ତି ଛେଳି ଚରାଉ ଥିଲେ। ଏହି ତିନି ଜଣ ତାଙ୍କର ଏକ ଛେଳିକୁ ଉଠାଇ ନେଇ ସେଠାରୁ ଫେରାର ହୋଇଯାଇଥିଲେ। ତେବେ ବେଶି ବାଟ ଯାଇପାରି ନଥିଲେ। ବାଇକ୍‌ଟି ଭାରସାମ୍ୟ ହରାଇ ଏକ ନଳକୂଅରେ ପିଟି ହୋଇଯାଇଥିଲା। ତିନି ଜଣ ଯାକ କଚାଡ଼ି ହୋଇ ସେଠାରେ ପଡ଼ି ଯାଇଥିଲେ। ରାଜେଶ ଆହତ ଅବସ୍ଥାରେ ଘଟଣାସ୍ଥଳରୁ ଦୌଡ଼ି ପଳାଇବାକୁ ଉଦ୍ୟମ କରିଥିଲେ। ତେବେ ମାତ୍ର ୧୦୦ ମିଟର ଦୂରରେ ଗରୀବ ବାଗଙ୍କ ଘର ସମ୍ମୁଖରେ ସେ ତଳେ ପଡ଼ି ଯାଇଥିଲେ ଓ ପ୍ରାଣ ହରାଇଥିଲେ। ଅନ୍ୟ ଦୁଇ ଜଣଙ୍କୁ ପରିବାର ଲୋକେ ଆସି ହସ୍‌ପିଟାଲକୁ ନେଇଥିଲେ। ଦେଓଗାଁ ପୋଲିସ୍ ଆସି ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଥିଲା।

ରାଜେଶଙ୍କ ପରିବାର ଲୋକେ ଅଭିଯୋଗ କରିଛନ୍ତି ଯେ ଫଟାମୁଣ୍ଡା ଗାଁ ଲୋକେ ମାର୍‌ପିଟ୍‌ କରିଥିବାରୁ ତାଙ୍କର ମୃତ୍ୟୁ ଘଟିଛି। ଗାଁ ଲୋକେ ଏହାକୁ ଖଣ୍ଡନ କରିଛନ୍ତି। ପୋଲିସ୍ ଘଟଣାର ତଦନ୍ତ କରୁଛି।

ମୃତ ଯୁବକଙ୍କ ଜଣେ ସଂପର୍କୀୟ କହିଛନ୍ତି,“ଯଦି ସେମାନେ ଚୋରି କରିବାକୁ ଆସିଥିଲେ ତା’ହେଲେ ଗାଁ ଲୋକେ ତାକୁ ପିଟି ପିଟି ମାରି ଦେଇଛନ୍ତି।”

କଏଁରୁ ନନ୍ଦ କହିଛନ୍ତି,“ନଳକୂଅରେ ପିଟି ହେବା ପରେ ଆମେ ପଡ଼ି ଯାଇଥିଲୁ। ଗାଁ ଲୋକେ ମୋତେ ଓ ସୁବ୍ରତକୁ ବାଡ଼ିରେ ପିଟି ଥିଲେ। ତେବେ ସେତେବେଳେ ରାଜେଶ ସେଠାରେ ନଥିଲା। ସେ ସେଠାରୁ ପଳାଇଥିଲା। ଗାଁ ଲୋକେ ତାକୁ ପିଟି ପିଟି ମାରି ଦେଇଛନ୍ତି, ନ ହେଲେ ଦୁର୍ବଳରୁ ସେ ମରି ଯାଇଛି।”

ଗରୀବ ନାଏକ ନାମକ ଜଣେ ଗ୍ରାମବାସୀ କହିଛନ୍ତି ଯେ କେହି ସେମାନଙ୍କୁ ଛୁଇଁ ନାହାନ୍ତି। ନିଜେ ନିଜେ ପିଟି ହେଲେ। ଜଣେ ଛଟପଟ ହୋଇ ମରିଗଲା।

ତଦନ୍ତକାରୀ ଅଧିକାରୀ ଉପେନ୍ଦ୍ର ବିଶ୍ୱାଳ କହିଛନ୍ତି,“ମୃତଦେହଟି ଘଟଣାସ୍ଥଳରୁ ପ୍ରାୟ ୧୦୦ ମିଟର ଦୂରରେ ପଡ଼ିଥିଲା। ଘଟଣାସ୍ଥଳରୁ ସେପର୍ଯ୍ୟନ୍ତ ରକ୍ତ ପଡ଼ି ପଡ଼ି ଯାଇଥିଲା। ତଦନ୍ତ ପରେ ଜଣାପଡ଼ିବ ସେ ଦୁର୍ଘଟଣାରେ ଆହତ ହୋଇ ପ୍ରାଣ ହରାଇଛି ନା ଲୋକେ ତାକୁ ପିଟିଛନ୍ତି। ଗାଁ ଲୋକେ ପୋଲିସ୍‌କୁ ସେମାନେ ଚୋରି ପଳାଉଥିବା ନେଇ ଖବର ଦେଇଥିଲେ।”

Previous ArticleNext Article

Send this to a friend