୧୩ର ସ୍ୱପ୍ନ ପୂରା ହୋଇନି, ୧୮ରେ ପୁଣି କହିଲେ ଜମି ନ ଥିଲେ ବି ପକ୍କାଘର ମିଳିବ

cropped-Biju-Pucca-Ghar-Yojana-logo

ଭୁବନେଶ୍ୱର (ଓଡ଼ିଶା ରିପୋର୍ଟର):୧୩ର ସ୍ୱପ୍ନ ପୂରା ହୋଇନି। ୧୮ ‌ଆରମ୍ଭରେ ଭୂମିହୀନଙ୍କୁ ପୁଣି ସ୍ୱପ୍ନ ଦେଖେଇଲେ ରାଜ୍ୟ ସରକାର। ଖଣି ଅଞ୍ଚଳରେ ଭୂମିହୀନଙ୍କୁ ମାଗଣାରେ ଘରଡ଼ିହ ଯୋଗାଇବାକୁ ନିର୍ଦ୍ଦେଶ ନାମା ଜାରି ହୋଇଛି। ବିଜୁ ପକ୍କାଘର କିମ୍ବା ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ ହୋଇଥିବା ହିତାଧିକାରୀ ନିଜର ଜମି ନ ଥିଲେ ବି ଘର କରିପାରିବେ। ସରକାର ଘରୋଇ ଜମି କିଣି ହିତାଧିକାରୀଙ୍କୁ ୧୦ ଡିସିମିଲ ପର୍ଯ୍ୟନ୍ତ ଜମି ମାଗଣାରେ ଦେବେ। ଏଥିପାଇଁ ଡିଷ୍ଟ୍ରିକ୍ଟ ମିନେରାଲ୍ ଫଣ୍ଡରୁ ଅର୍ଥ ଖର୍ଚ୍ଚ ହେବ।

ସରକାରୀ ଜମି ନ ଥିଲେ ଭୂମିହୀନ ଗରିବଙ୍କୁ ଘରୋଇ ଜମି କିଣି ମାଗଣାରେ ଦେବାକୁ ପୂର୍ବରୁ ୨୦୧୩ରେ ନିଷ୍ପତ୍ତି ନେଇଥିଲେ ସରକାର। ଏଥିପାଇଁ ବ୍ୟୟ ବରାଦ କରି ଟଙ୍କା ବି ପଠାଇଥିଲେ। କିନ୍ତୁ ବାସ୍ତବତା ହେଉଛି ଜିଲ୍ଲାପାଳମାନେ ନା ଘରୋଇ ଜମି କିଣି ଗରିବଙ୍କୁ ଦେଲେ ନା ଟଙ୍କା ଖର୍ଚ୍ଚ କଲେ ।

ଡିସେମ୍ବର ୨୨ରେ ରାଜସ୍ୱ ସଚିବ ସବୁ ଜିଲ୍ଲାପାଳ ଓ ଆରଡିସିଙ୍କୁ ଏ ନେଇ ଚିଠି ଲେଖି ୨ ମାସ ଭିତରେ ଟଙ୍କା ଖର୍ଚ୍ଚ କରିବାକୁ ନିର୍ଦ୍ଦେଶ ଦେଇଛନ୍ତି।  ଘରୋଇ ଜମି କିଣିବାକୁ ଜିଲ୍ଲାପାଳଙ୍କୁ ସରକାର ୭ କୋଟି ୯ ଲକ୍ଷ  ୬୬ ହଜାର ଟଙ୍କା ଦେଇଥିଲେ। କେବଳ ଗଞ୍ଜାମ ଜିଲ୍ଲାପାଳ ତାଙ୍କୁ ଦିଆଯାଇଥିବା ଦେଢକୋଟି ଟଙ୍କା ଖର୍ଚ୍ଚ କରିଛନ୍ତି। ଅନ୍ୟ ୧୧ଟି ଜିଲ୍ଲାର ଜିଲ୍ଲାପାଳ ଟଙ୍କାଟିଏ ବି ଖର୍ଚ୍ଚ କରିନାହାଁନ୍ତି।

ଏପଟେ ଟଙ୍କା ଥାଇ ବି ଗରିବଙ୍କୁ ଜମି ଓ ଘର ଦେଇ ପାରୁ ନଥିବା ଅଭିଯୋଗ ଆଣି ସରକାରଙ୍କ ପାରିବା ପଣିଆ ଉପରେ ପ୍ରଶ୍ନଚିହ୍ନ ଲଗାଇଛି ବିଜେପି।

 

Previous ArticleNext Article

Send this to a friend