କେମିତି କୂଅ ଭିତରକୁ ଖସିଲା ରାଧା ? ଆସିଲା ରିପୋର୍ଟ, କାଲି ଜୀବନ ସହ ଜୁଝୁଥିଲା ଆଜି ଖେଳୁଛି

rd-1

ଅନୁଗୁଳ,(ଓଡ଼ିଶା ରିପୋର୍ଟର): ଅନୁଗୁଳ ଜିଲ୍ଲା ଗୁଲାସର ବୋରେଓ୍ୱଲ୍ ଟ୍ରାଜେଡି ଘଟଣାରେ ଜିଲ୍ଲାପାଳଙ୍କୁ ରିପୋର୍ଟ ଦେଇଛନ୍ତି ଜିଲ୍ଲା ଉଠା ଜଳସେଚନ ବିଭାଗ ନିର୍ବାହୀ ଯନ୍ତ୍ରୀ।ଅଘଟଣ ପାଇଁ ଛତିଶଗଡ଼ର ଗଣେଶ ବୋରେଓ୍ୱଲ୍ ସଂସ୍ଥା ସହ କିଶୋରନଗର ବ୍ଲକ୍‌ର ବିଭାଗୀୟ ଜେଇଙ୍କୁ ଦାୟୀ କରାଯାଇଛି । ସେହିପରି ୭ଦିନ ଭିତରେ ଦୁର୍ଘଟଣାର କାରଣ ଅନୁଧ୍ୟାନ କରି ରିପୋର୍ଟ ଦେବାକୁ କହିଛି ଓଡ଼ିଶା ଲିଫ୍ଟ ଇରିଗେସନ କର୍ପୋରେସନ।  ସେପଟେ  ମୃତ୍ୟୁକୁ  ଜୟ କରି ବୋରୱେଲରୁ ସୁରକ୍ଷିତ ଉଦ୍ଧାର ପାଇଥିବା କୁନି ଝିଅ ରାଧା ଏବେ ପୁରା ସୁସ୍ଥ।

କାଲି ଜୀବନ ସହ ଜୁଝୁଥିଲା

କାଲି ଜୀବନ ସହ ଜୁଝୁଥିଲା,ଆଉ ଆଜି ହସ ଖେଳରେ ମାତିଛି । କେତେବେଳେ ବାପାଙ୍କ କୋଳରେ ବସି ଗେଲ ହେଉଛି ତ ପୁଣି କେତେବେଳେ ମାଆର ପଣତକୁ ଧରି କାଖ ହେବାକୁ ଅଳି କରୁଛି।  ଇଏ ହେଉଛି ସେହି ରାଧା।  ଯିଏ ଖାଲି  ମୃତ୍ୟୁକୁ ଅତି ନିକଟରୁ ଦେଖିନି ବରଂ ତାକୁ ଜିତି ବି ଯାଇଛି । ଅନୁଗୁଳ ଗୁଲାସର ଗାଁରେ ଗତକାଲି ଅଚାନକ ଗଭୀର ବୋରୱେଲରେ ଖସି ପଡିଥିଲା ଏହି ଅଢ଼େଇ ବର୍ଷର କୁନି ଝିଅ ରାଧା । ଦୀର୍ଘ ସାଢ଼େ ସାତ ଘଣ୍ଟାର ରେସ୍‌କ୍ୟୁ ଅପରେସନ ପରେ ତାକୁ ଅକ୍ଷତ ଅବସ୍ଥାରେ ଉଦ୍ଧାର କରିବାରେ ସକ୍ଷମ ହୋଇଥିଲେ ଅଗ୍ନିଶମ ବାହିନୀ।  ହୁଏତ କାଲିର ସେ ଅଘଟଣକୁ କୁନି ଝିଅ ରାଧା ସିନା ଭୁଲିଯାଇଛି ହେଲେ ତା ବାପା କିନ୍ତୁ ଇଶ୍ୱରଙ୍କୁ ବାରମ୍ବାର ଧନ୍ୟବାଦ ଦେଉଛନ୍ତି।  ଆଉ ଡାକ୍ତର କହିଛନ୍ତି ରାଧା ଏବେ ପୁରା ସୁସ୍ଥ।

କେମିତି ଖସିଲା ରାଧା

କେମିତି ବୋରେୱଲ୍ ଭିତରକୁ ଖସିଲା ରାଧା । ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଆଜି ରିପୋର୍ଟ ଦେଇଛନ୍ତି ଉଠା ଜଳସେଚନ ବିଭାଗ ନିର୍ବାହୀଯନ୍ତ୍ରୀ । ଅଘଟଣ ପାଇଁ ଛତିଶଗଡ଼ର ଗଣେଶ ବୋରୱେଲ୍ ସଂସ୍ଥା ସହ କିଶୋରନଗର ବ୍ଲକ ଉଠାଜଳସେଚନ ପ୍ରକଳ୍ପ ଜେଇଙ୍କୁ ଏଥାପାଇଁ ଦାୟୀ କରାଯାଇଛି।  ବିଜୁ କୃଷକ ଯୋଜନାରେ ବୋରେୱେଲ ଖୋଳାଯାଇଥିଲା।  ହେଲେ ସେଥିରୁ ଠିକ୍‌ରେ ପାଣି ନ ବାହାରିବାରୁ ଅଧାରେ କାମ ବନ୍ଦ ରହିଥିଲା । କିନ୍ତୁ ବୋରେଓ୍ୱଲ୍କୁ ପୋତା ନଯାଇ ଛାଡି ଦିଆଯାଇଥିଲା।  ଯାହା ଫଳରେ ଏତେବଡ଼ ଅଘଟଣ ଘଟିଲା ।

Previous ArticleNext Article

Send this to a friend