ହଟ୍ଟଗୋଳ ମଧ୍ୟରେ ଧୋଇ ଗଲା ବିଧାନସଭା ଅଧିବେଶନର ପ୍ରଥମ ଦିନ

assembly

ଭୁବନେଶ୍ୱର (ଓଡ଼ିଶା ରିପୋର୍ଟର): ବିଧାନସଭା ବଜେଟ ଅଧିବେଶନ ଆରମ୍ଭରୁ ଗୃହରେ ତାତି ଦେଖିବାକୁ ମିଳିଛି। ଆଜି ପ୍ରଥମେ ରାଜ୍ୟପାଳଙ୍କ ଅଭିଭାଷଣକୁ ବିରୋଧ କରି କକ୍ଷତ୍ୟାଗ କରିଥିଲେ କଂଗ୍ରେସ ସଦସ୍ୟ। ଏହାବାଦ ରାଜ୍ୟପାଳଙ୍କ ଅଭିଭାଷଣ ପରେ ଧନ୍ୟବାଦ ପ୍ରସ୍ତାବ ଉପରେ ଆଲୋଚନା ହେବା ବେଳେ କଂଗ୍ରେସ ବିଧାୟକମାନେ ହଟ୍ଟଗୋଳ କରିଥିଲେ।

ସରକାର ଚାଷୀ ମାରଣ ନୀତି କରୁଥିବା ଅଭିଯୋଗ କରି ବାଚସ୍ପତିଙ୍କ ପୋଡିଅମ ପାଖରେ ହଟ୍ଟଗୋଳ ମଧ୍ୟ କରିଥିଲେ। ଚାଷୀଙ୍କ ଅନଶନ ପ୍ରସଙ୍ଗ ଉଠାଇ ସ୍ଲୋଗାନ ଦେଇଥିଲେ। ଏହା ପରେ ବାଚସ୍ପତି ଗୃହକୁ ଆସନ୍ତାକାଲି ପାଇଁ ମୁଲତବୀ କରିଦେଇଥିଲେ।

ବଜେଟ ଅଧିବେଶନର ପ୍ରଥମ ଦିନରେ ରାଜ୍ୟପାଳ ନିଜ ଅଭିଭାଷଣ ରଖି ସରକାରଙ୍କ ଦ୍ୱାରା ପ୍ରସ୍ତୁତ ଗୋଲାପୀ ଚିତ୍ର ରଖିଥିଲେ। ରାଜ୍ୟପାଳ କହିଥିଲେ, “କିଛିଦିନ ତଳେ ମହାନଦୀ ଟ୍ରିବ୍ୟୁନାଲ୍‌ ଗଠିତ ହୋଇଛି। ଟ୍ରିବ୍ୟୁନାଲ୍‌ ଗଠନ ଦ୍ୱାରା ଓଡ଼ିଶା ଲୋକେ ଆଶ୍ୱସ୍ତ ହୋଇଛନ୍ତି। ସରକାର ଓଡ଼ିଶା ଭାଷା ଆଇନ ଲାଗୁ କରିଛନ୍ତି। ଓଡ଼ିଆ ଭାଷା ବ୍ୟବହାର ନକଲେ ଦଣ୍ଡ ବ୍ୟବସ୍ଥା ହୋଇଛି। ଆଦିବାସୀଙ୍କ ଉନ୍ନତି ପାଇଁ ସରକାର ବିଶେଷ ବ୍ୟବସ୍ଥା କରିଛନ୍ତି। ୯ଟି ଜିଲ୍ଲାରେ ସ୍ୱତନ୍ତ୍ର ଜନଜାତି ପରିଷଦ ଗଠନ କରାଯାଇଛି। ପୂରାତନ ଛାତ୍ରଛାତ୍ରୀଙ୍କୁ ଯୋଡ଼ିବାକୁ ‘ମୋ ସ୍କୁଲ’ ଯୋଜନା ଆରମ୍ଭ ହୋଇଛି। ନିଜ ଶିକ୍ଷାନୁଷ୍ଠାନର ଉନ୍ନତି ପାଇଁ ‘ମୋ ସ୍କୁଲ’ ଫଳପ୍ରଦ ହେବ। ‘ଆମ ଗାଁ, ଆମ ବିକାଶ’ କାର୍ଯ୍ୟକ୍ରମ ଗାଁର ବିକାଶ ପ୍ରତି ସମର୍ପିତ। ଗାଁ ଲୋକଙ୍କ ସହ ମୁଖ୍ୟମନ୍ତ୍ରୀ ସିଧା କଥା ହେଉଛନ୍ତି। ଗାଁର ସମସ୍ୟା ଲୋକ ପ୍ରତିନିଧି କହୁଛନ୍ତି, ଏହା ତୁରନ୍ତ ସମାଧାନ ହେଉଛି। ୯୦ ଦିନରେ ରାଜ୍ୟ ସରକାର ଏସିଆନ ଆଥଲେଟିକ ମିଟ୍ ଆୟୋଜନ  କରିଛନ୍ତି। ବିଶ୍ୱ ହକି ଲିଗ୍ କରି ଭୁବନେଶ୍ୱରକୁ ସ୍ପୋର୍ଟସ ହବ୍ କରାଯାଇଛି।”

କୃଷି ଓ କୃଷକ କଲ୍ୟାଣ ଯୋଜନା ସଂପର୍କରେ ଅଭିଭାଷଣରେ ରାଜ୍ୟପାଳ କହିଥିଲେ, “ଫସଲ ବୀମା, ଜଳସେଚନ ଯୋଜନା ଚାଷୀଙ୍କୁ ଆଶ୍ୱସ୍ତ କରିଛି। ଗ୍ରାମାଞ୍ଚଳ ଗରିବଙ୍କୁ ୧୫.୫ ଲକ୍ଷ ପକ୍କା ଘର ବଣ୍ଟନ ହୋଇଛି। ପାଇପ ଯୋଗେ ଫ୍ଲୋରାଇଡ ମୁକ୍ତ ପାନୀୟ ଜଳ ବ୍ୟବସ୍ଥା ହୋଇଛି। ରପ୍ତାନୀ ଅଭିବୃଦ୍ଧି ପାଇଁ ଓଡ଼ିଶାକୁ ଚାମ୍ପିଅନ ଷ୍ଟେଟ ସ୍ୱୀକୃତି ମିଳିଛି।

ଅନ୍ୟପକ୍ଷରେ ରାଜ୍ୟପାଳଙ୍କ ଅଭିଭାଷଣକୁ ବିରୋଧ କରି କଂଗ୍ରେସ ବିଧାୟକମାନେ କକ୍ଷତ୍ୟାଗ କରିଥିଲେ।

Previous ArticleNext Article

Send this to a friend