ପାର୍ସଲରେ ମୃତ୍ୟୁ ଉପହାର ଘଟଣା: ଏହି ଇଣ୍ଟରନେଟ କାଫେରୁ ହୋଇଥିଲା ପାର୍ସଲ ଟ୍ରାକ୍

ବଲାଙ୍ଗିର: ସାଇବର କାଫେରେ ବଲାଙ୍ଗିର ପାଟଣାଗଡ଼ କିଲର୍ ବମ୍ ପଛର ସୁରାକ୍ ଖୋଜୁଛି ପୋଲିସ । ଭବାନୀପାଟଣାର ଏକ ଇଣ୍ଟରନେଟ୍ ସେଣ୍ଟରରେ ପାର୍ସଲକୁ ଦୁଇ ଥର ଟ୍ରାକ୍ କରାଯାଇଥିବା ସୂଚନା ମିଳିବା ପରେ ପୋଲିସ କାଫେ ଉପରେ ଚଢାଉ କରିବା ସହ ମଡେମ୍ ଜବତ କରିଛି । ଏହା ପୋଲିସକୁ ଅପରାଧୀ ପାଖରେ ପହଞ୍ଚାଇବା ଆଶା କରାଯାଉଛି।  ସେପଟେ କେବଳ ଝିଅ ଘର ପଟୁ ତଦନ୍ତ ନକରି ପୁଅ ଘରୁ ପଟୁ ମଧ୍ୟ ତଦନ୍ତ କରାଯାଉ ବୋଲି ମୃତ ସୌମ୍ୟଶେଖରଙ୍କ ଶ୍ୱଶୁର ଦାବି କରିଛନ୍ତି। ବଲାଙ୍ଗିର ପାଟଣାଗଡ଼ ପାର୍ସଲ ବିସ୍ଫୋରଣର ଗୁମର ଖୋଲିବାରେ ଫେଲ ମାରିଛି ପୋଲିସ।  ତେବେ ଘଟଣାକୁ ୧୫ ଦିନ ବିତି ଯାଇଥିବାରୁ କୌଣସି ବି ସୁରାକ୍‌  ହାତଛଡ଼ା କରିବାକୁ ଚାହୁଁନାହିଁ ।

ଏବେ ପୋଲିସ ପାଇଁ ସାହାରା ପାଲଟିଛି ଭବାନୀପାଟଣା ମହାବୀରପଡ଼ା ମାର୍କେଟ୍ କଂପ୍ଲେକ୍ସରେ ଥିବା ଏହି ସାଇବର୍ କାଫେ।  ଏଠାରୁ ହିଁ ପ୍ରାଣଘାତୀ ପାର୍ସଲକୁ ଦୁଇ ଥର ଟ୍ରାକ୍ କରାଯାଇଥିଲା।  ପାର୍ସଲ ଆଣିଥିବା ସ୍କାଏ କିଙ୍ଗ କୋରିୟରର କଲିକତାରେ ଥିବା ସେଣ୍ଟ୍ରାଲ ସର୍ଭର ଯାଞ୍ଚ ପରେ  ଭବାନୀପାଟଣା ଇଣ୍ଟରନେଟ୍ କାଫେରୁ ଏହାକୁ ଟ୍ରାକ୍ କରାଯାଇଥିବା ସୂଚନା ମିଳିଥିଲା।  ଆଉ ଏହି ସୂଚନା ଆଧାରରେ ପୋଲିସ ଏଠାରେ ଖୋଳତାଡ଼ କରିବା ସହ କାଫେର ମଡେମକୁ ଜବତ କରିଛି ।

ମଡେମ୍ ଯାଞ୍ଚ ଦ୍ୱାରା କେଉଁ ବ୍ୟକ୍ତିଙ୍କ ଆଇଡିରୁ ପାର୍ସଲକୁ ଟ୍ରାକ୍ କରାଯାଇଥିଲା ତାହା ଜଣାପଡିବା ଆଶା କରାଯାଉଛି।  ମାତ୍ର ଇଣ୍ଟରନେଟ୍ କାଫେରେ ସିସିଟିଭି ନ ଥିବାରୁ ଏହା ମଧ୍ୟ ସମ୍ଭବ ହେବା ନେଇ ଆଶଙ୍କା ଦେଖାଦେଇଛି।  ସେପଟେ ଘଟଣାକୁ ନେଇ ମୁହଁ ଖୋଲିଛନ୍ତି ମୃତ ସୌମ୍ୟଶେଖରଙ୍କ ଶ୍ୱଶୁର ସୁବଳ ସାହୁ।  ଏକ ପାଖିଆ  ତଦନ୍ତ ନକରି ପୁଅ ଘର ପଟୁ ମଧ୍ୟ ତଦନ୍ତ କରିବାକୁ ସେ ଦାବି କରିଛନ୍ତି। ଅପରାଧୀ ଯେଭଳି ସୁଚିନ୍ତିତ ଢଙ୍ଗରେ ଷଡ଼ଯନ୍ତ୍ରକୁ କାର୍ଯ୍ୟକାରୀ କରିଛି ପୋଲିସର ଅକଲ ଗୁଡୁମ୍ ମାରିଛି। ତେବେ କେବେ ଓ କେମିତି ପୋଲିସ ଅଭିଯୁକ୍ତର ଚାଲାକି ଧରିବାରେ ସଫଳ ହେଉଛି ତାକୁ ସମସ୍ତଙ୍କ ଅପେକ୍ଷା।

Previous ArticleNext Article

Send this to a friend