ବିଜେପୁରରେ ଏ ଯାଏଁ ବାଜିଲାନି ନିର୍ବାଚନୀ ବିଗୁଲ୍‌, ଆରମ୍ଭ ହେଲାଣି ଦୋଷ ଲଦାଲଦି

ଭୁବେନଶ୍ୱର(ଓଡିଶା ରିପୋର୍ଟର): ବିଜେପୁର ଉପନିର୍ବାଚନ ତାରିଖ ଘୋଷଣାରେ ବିଳମ୍ବକୁ ନେଇ ବିବାଦ ଆରମ୍ଭ ହୋଇଛି।  ଏହାକୁ ନେଇ ପ୍ରଶ୍ନ ଉଠାଇଛି ବିଜେଡି । ସିଧାସଳଖ କେନ୍ଦ୍ର ଓ ବିଜେପି ଉପରେ ଦୋଷ ଲଦିଛି ବିଜେଡି । କେନ୍ଦ୍ର ସରକାରଙ୍କ ଚାପରେ ନିର୍ବାଚନ କମିଶନ୍ ଜାଣିଶୁଣୀ ନିର୍ବଚନ ପ୍ରକ୍ରିୟାରେ ବିଳମ୍ବ କରୁଛନ୍ତି ବୋଲି ସାଂଘାତିକ ଅଭିଯୋଗ ଆଣିଛନ୍ତି ଶ୍ରମମନ୍ତ୍ରୀ ସୁଶାନ୍ତ ସିଂ। ଏଣେ ଏହାକୁ ଅବାନ୍ତର ଯୁକ୍ତି ବୋଲି କହି ତାଚ୍ଛଲ୍ୟ କରିଛି ବିଜେପି । କଥାରେ ନଥା ଯୋଡି କଂଗ୍ରେସ୍ କହିଛି ଏହାକୁ ବିଳମ୍ବ ନୁହେଁ ଛକାପଞ୍ଝା କୁହାଯାଇପାରେ ।

ସୁବଳ ସାହୁଙ୍କ ଦେହାନ୍ତର ୩ ମାସ ପରେ ବି ନିର୍ବଚନ ତାରିଖ ଘୋଷଣା ହୋଇ ନ ଥିବାରୁ ରାଜ୍ୟର ୩ ପ୍ରମୁଖ ରାଜନୈତିକ ଦଳ ଏହାକୁ ନେଇ ଭିନ୍ନ ଭିନ୍ନ ମତ ରଖିଛନ୍ତି ।  ଶ୍ରମମନ୍ତ୍ରୀ ସୁଶାନ୍ତ ସିଂ ଅଭିଯୋଗ ପୂର୍ବରୁ ବିଜେଡି ଉପସଭାପତି ଦେବୀପ୍ରସାଦ ମିଶ୍ର ଓ ମୁଖପାତ୍ର ସମୀର ଦାଶ ମଧ୍ୟ ଏଭଳି ବିଳମ୍ବ ନେଇ ପ୍ରଶ୍ନ ଉଠାଇଥିଲେ।

ଏପଟେ ବିଜେପି ସୁଶାନ୍ତଙ୍କ ଯୁକ୍ତିକୁ ଅବାନ୍ତର ବୋଲି କହିଛି । ବିଜେଡି ନିର୍ବାଚନ  ହାରିବା ଭୟରେ ଏଭଳି ବୟାନ ଦେଉଛି ବୋଲି ଦଳ ପକ୍ଷରୁ କୁହାଯାଇଛି । ଭାଜପା ମୁଖପାତ୍ର ସଜ୍ଜନ ଶର୍ମା, କଂଗ୍ରେସ ନେତା ନିରଂଜନ ପଟ୍ଟନାୟକ ପ୍ରମୁଖ ନିଜ ମତ ରଖି ପରସ୍ପରକୁ ଦୋଷାରୋପ କରିଛନ୍ତି ।

ସୂଚନାଯାଗ୍ୟ  ବିଜେପୁର ଉପନିର୍ବାଚନ ପାଇଁ ଏବେ ଫୋକସରେ ଅଛନ୍ତି ଗାଇସିଲେଟ୍ ବ୍ଳକ୍ର କଂଗ୍ରେସ ନେତା ତଥା ବ୍ଲକ ଉପାଧ୍ୟକ୍ଷ ପ୍ରଣୟ ସାହୁ । କଂଗ୍ରେସ୍ ପ୍ରାର୍ଥୀ ଦୌଡ଼ରେ ସେ ଅଛନ୍ତି ଆଗରେ। ସେପଟେ ବିଜେପି ଓ ବିଜେଡି ନଜରରେ ବି ରହିଛନ୍ତି ପ୍ରଣୟ । ପ୍ରଣୟ କଂଗ୍ରେସରୁ ପ୍ରାର୍ଥୀ ହେଲେ ତ୍ରିମୁଖୀ ଲଢେଇ ହୋଇପାରେ ବୋଲି ବିଜେପି ଆକଳନ କରୁଛି । କିନ୍ତୁ ଏପରି ହେଲେ ଦଳକୁ ଫାଇଦା ମିଳିବ ବୋଲି ମଧ୍ୟ ବିଜେଡି ଆଶା ରଖିଛି।  ନିର୍ବାଚନ ତାରିଖ ଘୋଷଣାରେ ବିଳମ୍ବ ଯୋଗୁଁ ରାଜ୍ୟ ସରକାର ବିଜେପୁର ପାଇଁ ଯେଉଁ ସବୁ ପ୍ରକଳ୍ପ ଘୋଷଣା କରିଥିଲେ ତାର ପ୍ରଭାବ ଏଥିରେ ପଡିବ ନାହିଁ ବୋଲି ଚର୍ଚ୍ଚା ହେଉଛି । ଏଣେ ଚାଷୀ ଆତ୍ମହତ୍ୟା ପ୍ରସଙ୍ଗରେ ବ୍ୟାକ୍‌ଫୁଟ୍‌ରେ ଥିବା ବିଜେଡିକୁ ଘେରିବା ପାଇଁ ବିରୋଧୀଙ୍କୁ ପର୍ଯ୍ୟପ୍ତ ସମୟ ମିଳୁଥିବା କୁହାଯାଉଛି । ଏଭଳି ସ୍ଥିତିରେ ପ୍ରକୃତରେ କାହକୁ ଫାଇଦା ମିଳିବ ତାକୁ ନେଇ ଆରମ୍ଭ ହୋଇଛି ଅଙ୍କକଷା ।

Previous ArticleNext Article

Send this to a friend