‘ବ୍ଲାକରୋଜ’ର ଯାଜପୁର ଲିଙ୍କ୍‌: ଶାସକ ଦଳକୁ ଘାଇଲା କଲେ ଦାମ

ଭୁବନେଶ୍ୱର/ପାରାଦୀପ (ଓଡ଼ିଶା ରିପୋର୍ଟର): ‘ବ୍ଲାକରୋଜ’ କେଳେଙ୍କାରୀ ପଛରେ କାହାର ହାତ? ଘଟଣାର ୯ ବର୍ଷ ପରେ ସିବିଆଇ ତଦନ୍ତ ପାଇଁ କେନ୍ଦ୍ର ଜାହଜ ମନ୍ତ୍ରାଳୟର ସୁପାରିଶ ପରେ ଆରମ୍ଭ ହୋଇଯାଇଛି ରାଜନୈତିକ ବୟାନବାଜି। ବିଜେପି ଆଜି ସିଧାସଳଖ ବ୍ଲାକରୋଜ ସହ ଯାଜପୁରର ଲିଙ୍କ ଯୋଡିଛି। ସେପଟେ ଦଳ ଭିତରୁ ସରକାରଙ୍କୁ ବାଣ ମାରିଛନ୍ତି ବିଧାୟକ ଦାମୋଦର ରାଉତ।

‘ବ୍ଲାକରୋଜ’ ଜାହାଜର ଯାଜପୁର ଲିଙ୍କ। ଏହି ଲିଙ୍କର ଅଭିଯୋଗ ଆଣି ପୂର୍ବତନ ମନ୍ତ୍ରୀ ଓ ବର୍ତ୍ତମାନର ଯାଜପୁର ବିଧାୟକଙ୍କୁ ବ୍ଲାକରୋଜ ସହ ଯୋଡିଛି ବିଜେପି। ଦଳ କହିଛି, ମାର୍ଚ୍ଚ ୨୫ରେ ଯାଜପାରୁ ପୌରପାଳିକାର ୧୫୦ ବର୍ଷ ପୂର୍ତ୍ତି  ଉତ୍ସବପାଳନ ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବେଟରୀ ଚାଳିତ ଗାଡିରେ ବୁଲାଉଥିବା ଲୋକ ଜଣଙ୍କର ‘ବ୍ଲାକରୋଜ’ ସହ ରହିଛି ନିବିଡ଼ ସଂପର୍କ। ଆଉ ସେ ବ୍ୟକ୍ତି ହେଉଛନ୍ତି ବିଧାୟକଙ୍କ ଭାଇ। ତେଣୁ ‘ବ୍ଲାକରୋଜ’ କେଳେଙ୍କାରୀର ଖଳନାୟକଙ୍କୁ ମୁଖ୍ୟମନ୍ତ୍ରୀ ସୁରକ୍ଷା ଦେଉଛନ୍ତି ବୋଲି ସାଂଘାତିକ ଅଭିଯୋଗ ଆଣିଛି ବିଜେପି। ଏପଟେ କଂଗ୍ରେସ ମଧ୍ୟ ସମାନ ଢଙ୍ଗରେ ସରକାରଙ୍କୁ ଟାର୍ଗେଟ କରିଛି।

ବିଜେପି ରାଜ୍ୟ ଉପସଭାପତି ସମୀର ମହାନ୍ତି କହିଛନ୍ତି-“‘ବ୍ଲାକରୋଜ’ କେଳେଙ୍କାରୀରେ ଯାଜପୁର ଜିଲ୍ଲାର ଜଣେ ବିଧାୟକ ତଥା ପୂର୍ବତନ ମନ୍ତ୍ରୀଙ୍କ ସମ୍ପୃକ୍ତି ରହିଛି। ସମ୍ପୃକ୍ତ ବିଧାୟକଙ୍କୁ ମୁଖ୍ୟମନ୍ତ୍ରୀ ସୁରକ୍ଷା ଦେଉଛନ୍ତି।”

କଂଗ୍ରେସ ନେତା ଅଶୋକ ସାମଲ କହିଛନ୍ତି-“‘ଏହି ଘଟଣାରେ ବିଜେଡିର ଜଣେ ବିଧାୟକଙ୍କ ସମ୍ପୃକ୍ତି ରହିଛି। ସେ ମୁଖ୍ୟମନ୍ତ୍ରୀଙ୍କ ପାଖ ଲୋକ। ସେପରିସ୍ଥିତିରେ କ୍ରାଇମବ୍ରାଞ୍ଚ କେମିତି ତଦନ୍ତ କରିବ?”

‘ବ୍ଲାକରୋଜ’କୁ ନେଇ ବୟାନବାଜି ଚାଲିଥିବା ବେଳେ ଏହି ପ୍ରସଙ୍ଗରେ ଦଳ ଭିତରୁ ସରକାରଙ୍କୁ ଘାଇଲା କରିଛନ୍ତି ବରିଷ୍ଠ ବିଜେଡି ନେତା ଦାମୋଦର ରାଉତ। ଦାମ ପ୍ରଶ୍ନ କରିଛନ୍ତି, ଆର୍‌ଟିଆଇରେ ଯେତେବେଳେ ’ବ୍ଲାକରୋଜ’ ସଂପର୍କରେ ତଥ୍ୟ ମିଳିପାରିଲା, ସେତେବେଳେ କ୍ରାଇମବ୍ରାଞ୍ଚ କିପରି ଜାହଜର ମାଲିକ କିଏ ଜାଣିପାରିଲା ନାହିଁ।

ଦାମ ଆହୁରି ମଧ୍ୟ କହିଛନ୍ତି-“‘ବ୍ଲାକରୋଜ’ ଜାହାଜର ବୀମା ହୋଇନଥିଲା। ବୀମା ହୋଇଥିବା ଜାହାଜ ସମୁଦ୍ରରେ ଚାଲିବା କଥା ନୁହଁ। ବେଆଇନ୍‌ ଭାବେ ଜାହାଜଟି କେମିତି ଚାଲୁଥିଲା ଓ କେତେ ପରିମାଣରେ ଖଣିଜ ଦ୍ରବ୍ୟ ରତ୍ପାନୀ କରୁଥିଲା ତାହାର ସବୁ ତଥ୍ୟା ପାରାଦୀପ ପୋର୍ଟରେ ଥିବ। ତେବେ କ୍ରାଇମବ୍ରାଞ୍ଚକୁ ସେସବୁ ତଥ୍ୟ କେମିତି ମିଳିଲା ନାହିଁ। କ୍ରାଇମବ୍ରାଞ୍ଚ କେଉଁଠି ତଦନ୍ତ କରୁଥିଲା? ଯଦି କ୍ରାଇମବ୍ରାଞ୍ଚକୁ ମିଳିଲା ନାହିଁ, ତାହାହେଲେ ହରିଦାଶପୁର ଅଞ୍ଚଳର ବ୍ୟକ୍ତିଙ୍କୁ ଆର୍‌ଟିଆଇ ଆକ୍ଟରେ କେମିତି ସବୁ ତଥ୍ୟ ମିଳିଲା? ସିବିଆଇ ବିଭିନ୍ନ ଦିଗରୁ ତଦନ୍ତ କରିବ। ବିଭିନ୍ନ ଲୋକଙ୍କୁ ମଧ୍ୟ ପଚରାଉଚରା କରିବ। ସିବିଆଇ ମୋ ପାଖକୁ ଆସିଲେ ସବୁ କହିବି।”

ପାରାଦୀପ ପୋର୍ଟ ଟ୍ରଷ୍ଟ, ସର୍ବେଶ୍ୱର ବେହୁରା ନାମକ ଜଣେ ବ୍ୟକ୍ତିଙ୍କୁ ଦେଇଥିବା ତଥ୍ୟ ଅନୁସାରେ ରପ୍ତାନୀ ହେଉଥିବା ଜିନିଷରେ ଅଧିକ ଜଳୀୟ ଅଂଶ ଥିବାରୁ ଭାରସ୍ୟାମ ହରାଇ ଜାହଜଟି ବୁଡି ଯାଇଥିଲା। ଜାହଜରେ ଏ.ବି. ମିନେରାଲସର ୧୧ ହଜାର ୬୯୯ ମେଟ୍ରିକ୍‌ ଟନ ଆଇରନ ଓର ଓ ରେକଟର ମାଇନସର ୧୨,୧୪୮ ମେଟ୍ରିକ ଟନ୍‌ ଆଇରନ ଓର ଥିଲା। ଜାହାଜ ବୁଡିଥିଲା  ୨୦୦୯ ସେପେମ୍ବର ୯ରେ। ତେବେ ପ୍ରଶ୍ନ କିଏ ଏ.ବି  ମିନେରାଲସ ଓ ରେକଟର ମାଇନସର ମାଲିକ? କୋଟି କୋଟି ଟଙ୍କାର ମାଲ୍ ବୁଡିଗଲା ପରେ ଏମାନେ କାହିଁକି ଚୁପ ରହିଲେ? ବିରୋଧୀ ଆଣୁଥିବା ବ୍ଲାକରୋଜର ଯାଜପୁର ଲିଙ୍କର ସତ୍ୟତା ଅଛି କି?

ବିଜେଡି ମୁଖପାତ୍ର ସମୀର ଦାଶ କହିଛନ୍ତି-“ବ୍ଲାକ ରୋଜ ବୁଡ଼ିବା ଘଟଣାର ସିବିଆଇ ତଦନ୍ତ ହେଉଛି ହେବ। ଏହା ଭିତରକୁ ମୁଖ୍ୟମନ୍ତ୍ରୀଙ୍କୁ ଟାଣିବା ଚିରାଚରିତ ପ୍ରଥା ହୋଇଗଲାଣି। ଏଥିରେ କିଛି ସତ୍ୟତା ନାହିଁ।”

Previous ArticleNext Article

Send this to a friend