ରାଜ୍ୟ ସରକାରଙ୍କ ନୂଆ ଫର୍ମୁଲା: ବ୍ଲକଗ୍ରାଣ୍ଟ୍‌ ଆଉଟ୍‌, ଗ୍ରାଣ୍ଟ ଇନ୍‌ ଏଡ୍‌ ଇନ୍‌

Grant-in-Aid-instead-of-Block-Grant

ଭୁବନେଶ୍ୱର (ଓଡ଼ିଶା ରିପୋର୍ଟର): ୨୦୦୪ ମସିହାରେ ଲାଗୁ ହୋଇଥିବା ବ୍ଲକଗ୍ରାଣ୍ଟ୍‌ ବ୍ୟବସ୍ଥାକୁ ଆଜି ରାଜ୍ୟ ସରକାର ଉଚ୍ଛେଦ କରିଦେଇଛନ୍ତି। ଏହା ବଦଳରେ ଗ୍ରାଣ୍ଟ ଇନ୍‌ ଏଡ୍‌ ବ୍ୟବସ୍ଥା ଲାଗୁ କରାଯାଇଛି। ଏହାର ସବୁ ସୁବିଧା ଶିକ୍ଷକ ଓ ଅଧ୍ୟାପକମାନେ ପାଇବେ। ଏନେଇ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀଙ୍କ ସୂଚନା ପରେ ପିଏମ୍‌ଜିରେ ଶିକ୍ଷକ ଓ ଅଧ୍ୟାପକମାନେ ଆନ୍ଦୋଳନକୁ ଆନ୍ଦୋଳନ ରଖିଛନ୍ତି।

ବ୍ଲକଗ୍ରାଣ୍ଟ ଉଚ୍ଛେଦ ପାଇଁ ଦୁଇ ଥର ଆଲୋଚନା ବିଫଳ ହେବା ପରେ ଆଜି ସଚିବାୟରେ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ। ଏଥିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଗଣଶିକ୍ଷା ମନ୍ତ୍ରୀ ବଦ୍ରି ନାରାୟଣ ପାତ୍ର, ଉଚ୍ଚଶିକ୍ଷା ମନ୍ତ୍ରୀ ଅନନ୍ତ ଦାସ ଓ ଶିକ୍ଷକ ସଂଘର କର୍ମକର୍ତ୍ତା ଯୋଗଦେଇ ଥିଲେ। ଦୀର୍ଘ ସମୟ ଧରି ଚାଲିଥିଲା ଆଲୋଚନା। ପରେ ମୁଖ୍ୟମନ୍ତ୍ରୀ ବାହାରକୁ ଆସି ବ୍ଲକଗ୍ରାଣ୍ଟ୍‌ ଉଚ୍ଛେଦ ନେଇ ସୂଚନା ଦେଇଥିଲେ।

ବିଦ୍ୟାଳୟ ଶିକ୍ଷକ ମହାସଂଘ ଆବାହକ ପ୍ରକାଶ ମହାନ୍ତି କହିଛନ୍ତି-“ଆମର କିଛି ଦାବି ପୂରଣ ହୋଇଛି। ପରବର୍ତ୍ତୀ ସମୟରେ ଅନ୍ୟାନ୍ୟ ଦାବି ଉପରେ ଆଲୋଚନା ହେବ। ଏଥିପାଇଁ ରାଜ୍ୟ ସରକାରଙ୍କୁ ୨ ମାସ ସମୟ ଦିଆଯାଇଛି। ଏହି ଦୁଇ ମାସ ମଧ୍ୟରେ ଦାବି ପୂରଣ କରିବାକୁ କୁହାଯାଇଛି।”

୬୬୨ ବର୍ଗ କଲେଜ ଅଧ୍ୟାପକ ସଂଘ ସଭାପତି ଗୋପାଳ ନାୟକ କହିଛନ୍ତି-“ଆଜି ହୋଇଥିବା ଆଲୋଚନାରେ ରାଜ୍ୟ ସରକାର ଆମର ବହୁ ଦାବି ପୂରଣ ପାଇଁ ରାଜି ହୋଇଛନ୍ତି। ସପ୍ତମ ବେତନ ଲାଗୁ କରିବା ପାଇଁ ମଧ୍ୟ କୁହାଯାଇଛି। ଅନ୍ୟାନ୍ୟ ଦାବି ପୂରଣ ନହେଲେ ଦୁଇ ମାସ ପରେ ଆମେ ପୁଣି ଆନ୍ଦୋଳନକୁ ଆସିବୁ।”

୪୮୮ ବର୍ଗ କଲେଜ ଅଧ୍ୟାପକ ସଂଘ ସଭାପତି ପବିତ୍ର ମହଲା କହିଛନ୍ତି-“ଦାବି ମୁତାବକ ଆମେ ସ୍କେଲ ପେ, ଗ୍ରେଡ୍‌ ପେ, ୧୩୨ ପ୍ରତିଶତ ଡିଏ ଓ ପିଛିଲା ଇନ୍‌କ୍ରିମେଣ୍ଟ ପାଇବୁ। ୨୦୧୮ ଜାନୁଆରୀ ୧ ଠାରୁ ସପ୍ତମ ବେତନ ଲାଗୁ ନେଇ ସରକାର ପ୍ରତିଶ୍ରୁତି ଦେଇଛନ୍ତି।”

ବ୍ଲକଗ୍ରାଣ୍ଟ ଉଚ୍ଛେଦ ଓ ଅନ୍ୟାନ୍ୟ ଦାବି ପୂରଣ ପାଇଁ ଶିକ୍ଷକ, ଅଧ୍ୟାପକମାନେ ଦୀର୍ଘ ୧୭ ଦିନ ଧରି ପିଏମ୍‌ଜିରେ ଅହୋରାତ୍ର ଧାରଣାରେ ବସିଥିଲେ। ଫଳରେ ଅନେକ ସ୍କୁଲରେ ପାଠ ପଢ଼ା ଠପ୍‌ ହୋଇଯାଇଥିଲା। କେତେକ ସ୍କୁଲରେ ଚଳିତବର୍ଷ ଗଣେଶ ପୂଜା ମଧ୍ୟ ହୋଇ ନଥିଲା। ଦାବି ପୂରଣ ନ ହେଲେ ଗୁରୁଦିବସକୁ କଳା ଦିବସ ରୂପେ ପାଳନ କରିବେ ବୋଲି ଶିକ୍ଷକ ସଂଘ ଚେତାବନୀ ଦେଇଥିଲା।

Previous ArticleNext Article

Send this to a friend