ବିଦ୍ୟୁତ ନାହିଁ, ମୋବାଇଲ ଲାଇଟ୍‌ରେ ଚାଲିଛି ବ୍ଲଡ୍‌ ଗ୍ରୁପ୍‌ ଟେଷ୍ଟ

କେନ୍ଦୁଝର (ପ୍ରଣୟ କୁମାର ପାଣି): ବିନା ବିଜୁଳିରେ ଚାଲିଛି ରକ୍ତ ପରୀକ୍ଷା। ଜେନେରେଟର ନଥିବାରୁ ଘଣ୍ଟା ଘଣ୍ଟା ଧରି ବାହାରେ ରହୁଛି ସଂଗୃହୀତ ରକ୍ତ। କେନ୍ଦୁଝର ଜିଲ୍ଲା ରକ୍ତଭଣ୍ଡାରର ଏମିତି ବିଚିତ୍ର ଚିକିତ୍ସା ପଦ୍ଧତ୍ତି ପଦାକୁ ଆସିଛି। ଯାହାକୁ ନେଇ ରୋଗୀଙ୍କ ସମ୍ପର୍କୀୟଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ରକ୍ତଭଣ୍ଡାରରେ ଏଭଳି ଅବ୍ୟବସ୍ଥାକୁ କର୍ମଚାରୀ ସ୍ୱୀକାର କରୁଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ହାତ ଟେକିଦେଇଛନ୍ତି।

ବୁଧବାର ରାତି ପ୍ରାୟ ୯ଟା। କିଟିକିଟି ଅନ୍ଧାର। ତା’ ଭିତରେ ଚାଲିଛି ବ୍ଲଡ଼ ଗ୍ରୁପିଂ ଟେଷ୍ଟ। ଜୀବନ ରକ୍ଷା ପାଇଁ ସଂଗୃହୀତ ରକ୍ତର ପରୀକ୍ଷା କରାଯାଉଛି ମୋବାଇଲ ଟର୍ଚ୍ଚ ଆଲୁଅରେ। ଏଠି ନା ବିଜୁଳି ଅଛି ନା ଜେନେରେଟର ସୁବିଧା। କେନ୍ଦୁଝର ଜିଲ୍ଲା ବ୍ଲଡ୍ ବ୍ୟାଙ୍କରେ ଚାଲିଛି ଏମିତି ଅନ୍ଧାରୀ ରକ୍ତ ପରୀକ୍ଷା। ସଂଗୃହିତ ରକ୍ତ ରଖାଯାଇଥିବା ଫ୍ରିଜ୍ ବି ବନ୍ଦ। ଆଉ ଏପଟେ ରକ୍ତ ଅପେକ୍ଷାରେ ଅଛନ୍ତି ରୋଗୀଙ୍କ ସମ୍ପର୍କୀୟ। କାରଣ ରକ୍ତ ନେଲେ ଜୀବନ ବଞ୍ଚିବ। ହେଲେ ଗ୍ରୁପିଂ ଛଡ଼ା ଅନ୍ୟ କୌଣସି ପରୀକ୍ଷା କରାଯାଇପାରୁନଥିବାରୁ ସେମାନେ ବି ନିରାଶ।

ରୋଗୀଙ୍କ ସମ୍ପର୍କୀୟ ଯୋଗେନ୍ଦ୍ର ମାଝୀ କହିଛନ୍ତି-“ଆମର ରୋଗୀ ଗୁରୁତର ଅଛନ୍ତି। ଡାକ୍ତର ରକ୍ତ ଆଣିବା ପାଇଁ କହିଥିଲେ। ସେଥିପାଇଁ ରକ୍ତ ନେବାକୁ ଆସିଛି। ବହୁ ସମୟ ଧରି ଅପେକ୍ଷା କରିଥିଲେ ମଧ୍ୟ ରକ୍ତି ମିଳିନି।’’

ରକ୍ତଭଣ୍ଡାରର ଏଭଳି ଦୁର୍ଦ୍ଦଶା ସମ୍ପର୍କରେ ରୋଗୀଙ୍କ ସମ୍ପର୍କୀୟଙ୍କଠାରୁ ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚିଥିଲେ ଆମ ପ୍ରତିନିଧି। ଆଉ କ୍ୟାମେରାରେ କଏଦ୍ ହୋଇଛି ସେହି ସମୟର ଚିତ୍ର। ବିଜୁଳି କାଟ୍ ପରେ ରକ୍ତଭଣ୍ଡାରରେ ଜେନେରେଟର ନଥିବାରୁ ୩ ଘଣ୍ଟା ଧରି ମୋବାଇଲ୍ ଲାଇଟରେ ଚାଲିଥିଲା ରକ୍ତ ପରୀକ୍ଷା। କେବଳ ବିଜୁଳି ସମସ୍ୟା ନୁହେଁ, ଏଠି ପିଇବା ପାଣି ବ୍ୟବସ୍ଥା ନାହିଁ। ରକ୍ତଦାନ ପାଇଁ ଆସୁଥିବା ଲୋକଙ୍କୁ ପାଣି ଟୋପାଏ ମିଳେନାହିଁ।

ଲାବ୍ରୋଟାରୀ ଆସିଷ୍ଟାଣ୍ଡ ମୋନାଲିସା ପୁହାଣ କହିଛନ୍ତି-“ଟର୍ଚ୍ଚ ଲାଇଟ୍‌ରେ ଗ୍ରୁପିଂ କରାଯାଇପାରିବ। ମାତ୍ର ବ୍ଲଡ୍‌ ମ୍ୟାଚିଂ ହୋଇପାରିବ ନାହିଁ। ଏହାଛଡ଼ା ଏଠାରେ ପାନୀୟ ଜଳର ବ୍ୟବସ୍ଥା ନାହିଁ। ଫଳରେ ରକ୍ତ ଦେବାକୁ ଆସୁଥିବା ଲୋକେ ପାନୀୟ ଜଳ ମୁନ୍ଦାଏ ପାଇଁ ନାହିଁନଥିବା ଅସୁବିଧାରେ ପଡ଼ୁଛନ୍ତି।”

କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଧିକାରୀ ସ୍ୱପ୍ନେଶ୍ୱର ଗଡ଼ନାୟକ କହିଛନ୍ତି-“ଆମ ଦ୍ୱାରା ଯେତେ ସମ୍ଭବ ୱାର୍ଡ଼ ଓ ଆଉଟ୍‌ ଡୋରରେ ଜେନେରେଟର ବ୍ୟବସ୍ଥା କରିଛୁ।”

ଏଠାରେ ଯଦି ଆବଶ୍ୟକ ଭିତ୍ତିଭୂମି ନାହିଁ, ତାହାହେଲେ ରକ୍ତ ଭଣ୍ଡାର ଖୋଲାଯାଉଛି କାହିଁକି? ଏହା ରୋଗୀଙ୍କ ଜୀବନ ସହ ଖେଳ ନୁହେଁ କି? ରାଜ୍ୟରେ ରକ୍ତର ଅଭାବ ରହୁଥିବାବେଳେ ସଂଗୃହୀତ ରକ୍ତକୁ ଯଦି ଠିକ୍‌ରେ ସଂରକ୍ଷଣ କରାଯାଇନପାରେ ତେବେ ତାହା ନିଶ୍ଚିତ ଭାବେ ଚିନ୍ତାଜନକ ବିଷୟ।

Previous ArticleNext Article

Send this to a friend