ମାଆ ମଙ୍ଗଳାଙ୍କ ହୁକୁମ୍‌- ବଞ୍ଚିବାର ଅଛି ତ ମଶାଣିରେ ରହ…

ପୁରୀ/ବ୍ରହ୍ମଗିରି(ଓଡ଼ିଶା ରିପୋର୍ଟର): ଆମର ବିଶ୍ୱାସ ବି ବଡ଼ ଅଜବ। କଥାରେ ଅଛି- ଶ୍ମଶାନ ହେଉଛି ପ୍ରଭୁ ଶିବଙ୍କ ଆସ୍ଥାନ। ଏଠାରେ ରହିଲେ କାଳେ ବାବାଙ୍କ ଆଶୀର୍ବାଦ ମିଳିବ, ଆଉ କ୍ୟାନସର ପରି ଦୁରାରୋଗ୍ୟ ବ୍ୟାଧି ମଧ୍ୟ ଭଲ ହୋଇଯିବ। ଏହି ବିଶ୍ୱାସ ଟିକକ ପାଇଁ ମା’ ମଙ୍ଗଳାଙ୍କ ହୁକୁମ ପାଇବା ପରେ ପ୍ରଭାତ ଚାଲିଯାଇଥିଲେ ଶ୍ମଶାନକୁ। ଭାବିଥିଲେ ରୋଗ ଭଲ ହେବ ଓ ସେ ଘରକୁ ଫେରିବେ। ହେଲେ ସତରେ କଣ ତାଙ୍କର ଏହି ବିଶ୍ୱାସ ଫଳବତୀ ହୋଇଥାନ୍ତା? ବୋଧହୁ ନାଁ। ଏମିତି ହଁ ନାହିଁ ଦ୍ୱନ୍ଦ୍ୱ ଭିତରେ ହୁଏତ ତାଙ୍କ ଜୀବନ ଚାଲି ଯାଇଥାଆନ୍ତା। ଏହି କଥାକୁ ଅନୁଭବ କରିବା ପରେ ସ୍ଥାନୀୟ ପ୍ରଶାସନ ତାଙ୍କୁ ଉଦ୍ଧାର କରି ଏବ ଡାକ୍ତରଖାନାରେ ଭର୍ତ୍ତି କରିଛି।  ଆଶା ସେ ଭଲ ହୋଇଯିବେ।

ସ୍ୱାଧୀନତାର ୭୦ ବର୍ଷ ପରେ ମଧ୍ୟ ଏପରି ଅନ୍ଧ ବିଶ୍ୱାସ ଲୋକଙ୍କ ମନରେ ଘର କରି ରହିଛି। ଯନ୍ତ୍ରଣାମୟ ଜୀବନରୁ ଉପସମ ପାଇବା ପାଇଁ ଶ୍ମଶାନ ଚାଲି ଯାଇଥିଲେ ପୁରୀ ଜିଲ୍ଲା ବ୍ରହ୍ମଗିରି ବିଜେପୁର ଗାଁର ପ୍ରଭାତ ବରାଳ। ଏନେଇ ଖବର ପ୍ରକାଶ ପାଇବା ପରେ ପ୍ରଶାସନ ତତ୍ପର ହୋଇ ଉଠିଛି। ଶ୍ମଶାନରେ ରହୁଥିବା ପ୍ରଭାତ ବରାଳଙ୍କୁ ଉଦ୍ଧାର କରି ମେଡ଼ିକାଲରେ ଭର୍ତ୍ତି କରିଛି।

ବ୍ରହ୍ମଗିରି ବ୍ଲକ ବିଜେପୁର ଗାଁର ପ୍ରଭାତ ବରାଳ। ଦେହ ସୁସ୍ଥ ହେବାରୁ ମେଡ଼ିକାଲରେ ଭର୍ତ୍ତି ହୋଇଥିଲେ। ତେବେ ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଭୁବନେଶ୍ୱର ଏମ୍‌ସରେ ଭର୍ତ୍ତି ହୋଇଥିଲେ। ପରୀକ୍ଷା ନିରୀକ୍ଷା ପରେ ତାଙ୍କୁ କ୍ୟାନସର ହୋଇଥିବା ଜଣାପଡ଼ିଥିଲା। ଏମ୍‌ସରେ ଏକ ବର୍ଷ ୬ ମାସ ଧରି ଚିକିତ୍ସିତ ହୋଇଥିଲେ ମଧ୍ୟ ରୋଗରୁ ଉପସମ ମିଳିଥିଲା। ପରେ ପ୍ରଭାତ କଟକ ବଡ଼ ମେଡ଼ିକାଲ ଯାଇଥିଲେ। ମାତ୍ର ପାଖରେ ଅର୍ଥ ନଥିବାରୁ ସେଠାରେ ଚିକିତ୍ସା କରିପାରିଲେ ନାହିଁ। ସେଠାରୁ ଆସି ପୁରୀ ଆୟୂର୍ବେଦିକ ମେଡ଼ିକାଲରେ ଡାକ୍ତରଙ୍କୁ ଦେଖାଇ ଔଷଧ ଖାଉଥିଲେ। ହେଲେ ରୋଗ ଭଲ ହେଉନଥିବାରୁ ଦିନକୁ ଦିନ ଯନ୍ତ୍ରଣା ବଢ଼ିବାରେ ଲାଗୁଥିଲା। ଯାହା ସହ୍ୟ କରିବା ତାଙ୍କ ପକ୍ଷେ ସମ୍ଭବ ହେଉନଥିଲା। ଶେଷରେ ସମସ୍ତଙ୍କଠାରୁ ନିରାଶ ହୋଇ ପ୍ରଭାତ ମା’ ମଙ୍ଗଳାଙ୍କଠାରୁ ହୁକୁମ ପାଇଁ ଗାଁ ମୁଣ୍ଡ ଶ୍ମଶାନରେ ରହୁଥିଲେ। ଶ୍ମଶାନରେ ଦୁଇ ଦିନ ରହିବା ପରେ ଏନେଇ ଖବର ପ୍ରକାଶ ପାଇଥିଲା। ବ୍ରହ୍ମଗିରି ତହସିଲଦାର ଓ ନୂଆଁ ଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିକାରୀ ଗାଁରେ ପହଞ୍ଚି ପ୍ରଭାତଙ୍କୁ ଚିକିତ୍ସା କରୁଛନ୍ତି।

Previous ArticleNext Article

Send this to a friend