ଶେଷ ହେବାକୁ ଲାଗିଲା ୧୦ ବର୍ଷ: ଉଦ୍‌ଘାଟନର ୨ ମାସରେ ଫାଟ

ପାରଳାଖେମୁଣ୍ଡି(ଆଦର୍ଶ ଦାସ): ବ୍ରିଜ୍‌ ତିଆରି ହେବାକୁ ଲାଗିଲା ୧୦ ବର୍ଷ। ବଦଳିଲେ ୬ ଜଣ ଠିକାଦାର। ଖର୍ଚ୍ଚ ହେଲା ସାଢେ ୭ କୋଟି ଟଙ୍କା। ହେଲେ ଉଦ୍‌ଘାଟନର ୨ ମାସ ମଧ୍ୟରେ  ପଦାକୁ ଆସିଗଲା ସତ। ବ୍ରିଜ୍‌ ଦୁଇ ପାଖରେ ହୋଇଥିବା ପଥର ପ୍ୟାକିଂ ଖସି ଯାଇଛି। ପୋଲ ମଝିରେ ବିରାଟକାୟ ଗାଢ଼ ସୃଷ୍ଟି ହୋଇଛି। ଯାହା ଯେକୌଣସି ସମୟରେ ବଡ଼ଧରଣର ଦୁର୍ଘଟଣାକୁ ଆମନ୍ତ୍ରଣ କରିପାରେ। ଏପରି ଅବସ୍ଥା ରହିଛି ମହେନ୍ଦ୍ର ତନୟା ନଦୀ ଉପରେ ନିର୍ମିତ ବ୍ରିଜ୍‌। ପାରଳାଖେମୁଣ୍ଡିର ଲାଇଫ୍ ଲାଇନ୍‌ କୁହାଯାଉଥିବା ଏହି ବ୍ରିଜ୍‌ ଏବେ ବିପଦସଙ୍କୁଳ ଅବସ୍ଥାରେ ରହିଛି। ନିମ୍ନମାନର କାମ ଯୋଗୁଁ ୨ ମାସ ମଧ୍ୟରେ ଏହା ଭାଙ୍ଗିବାକୁ ବସିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।

ଗଜପତି ଜିଲ୍ଲା ମହେନ୍ଦ୍ରତନୟା ନଦୀ ଉପରେ ପୂର୍ବରୁ ଥିବା ଦେଢଶହ ବର୍ଷର ପୁରୁଣା ବ୍ରିଜ୍‌କୁ ବିପଦସଙ୍କୁଳ ଦର୍ଶାଇ ଏଇ ନୂଆ ବ୍ରିଜ୍ ତିଆରି ହୋଇଥିଲା। ହେଲେ ନୂଆ ବ୍ରିଜ୍‌ର ଏଭଳି ଦୂରାବସ୍ଥାରେ ଥିବାରୁ ପୁଣିଥରେ ପୁରୁଣା ବ୍ରିଜ୍ ଉପରେ ଗାଡି ଚଳାଚଳ ଆରମ୍ଭ କରିଛି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖାଦେଇଛି।

ସୂଚନାଯୋଗ୍ୟ,ପାରଳାଖେମୁଣ୍ଡିରୁ ଆନ୍ଧ୍ରକୁ ସଂଯୋଗ କରୁଥିବା ଏହି ନୂଆ ବ୍ରିଜ୍ ତିଆରି ହେବାକୁ ୧୦ ବର୍ଷ ଲାଗିଥିଲା। ବଦଳିଥିଲେ ୬ ଠିକାଦାର।  ଖର୍ଚ୍ଚ ହୋଇଥିଲା ସାଢେ ୭ କୋଟି ଟଙ୍କା। ହେଲେ ଏତେ ବର୍ଷ ଧରି ଚାଲିଥିବା ନିର୍ମାଣଧୀନ ବ୍ରିଜ୍‌ର ଏଭଳି ନିମ୍ନମାନର କାମ ସହ ଅନିୟମିତତା ନେଇ ଅସନ୍ତୁଷ୍ଟ  ବ୍ୟକ୍ତ କରିଛନ୍ତି ଲୋକେ।

ଅନ୍ୟପକ୍ଷରେ ପୂର୍ତ୍ତ ବିଭାଗ ସହକାରୀ ଯନ୍ତ୍ରୀ ପ୍ରମୋଦ ମହାପାତ୍ର କହିଛନ୍ତି,“ବ୍ରିଜ୍‌ର ଏକ୍ସପ୍ଲାନସନ୍ ଜଏଣ୍ଟ୍‌ ଖରାଦିନ ହେଲେ ବଢ଼ିଥାଏ।ଏହସହ ଥଣ୍ଡା ହେଲେ କମି ଥାଏ। ସେହି ଜାଗାରେ ପ୍ଲେଟ୍ ଦିଆଯାଉଛି। ସେହି ପ୍ଲେଟ୍ ଠିକ୍ ଅଛି କି ନାହିଁ ତାର ତଦାରଖ କରାଯିବ।”

Previous ArticleNext Article

Send this to a friend