ପିଲାଙ୍କ କାର୍ଯ୍ୟକ୍ରମରେ ପଲିଟିକାଲ୍‌ ଟଚ୍‌: ଶିଶୁଦିବସରେ ବିତର୍କ ବିଷୟକୁ ନେଇ ପ୍ରଶ୍ନ ଉଠାଇଲେ ଅଭିଭାବକ

ଭୁବନେଶ୍ୱର (ଓଡ଼ିଶା ରିପୋର୍ଟର): ଶିଶୁ ଦିବସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଷ୍ଟାଇଲରେ ମନ କଥା କହିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ତା’ପୂର୍ବରୁ ଆଜି ଟ୍ୱିଟ୍ କରି ଛାତ୍ରଛାତ୍ରୀଙ୍କୁ ନିମନ୍ତ୍ରଣ କରିଛନ୍ତି। ଏଥିରେ “ଆମେ ପଢିବୁ, ଗଢିବୁ…ଶ୍ରେଷ୍ଠ ହେବୁ” ସ୍ଲୋଗାନ ଦେଇଛନ୍ତି ମୁଖ୍ୟମନ୍ତ୍ରୀ। ତେବେ ପିଲାମାନଙ୍କ ପାଇଁ ଏସବୁ ଆୟୋଜନକୁ ସହଜରେ ଗ୍ରହଣ କରିପାରୁ ନାହାନ୍ତି ଅଭିଭାବକ। ଶିଶୁ ଦିବସରେ ସ୍କୁଲରେ ଆୟୋଜନ ହେବାକୁ ଥିବା ବକ୍ତୃତା ପ୍ରତିଯୋଗିତାରେ “ଆମ ସରକାର ଆମ ବିକାଶ” ଓ “ମୁଖ୍ୟମନ୍ତ୍ରୀଙ୍କୁ ମିଳିଲା ସର୍ବଶ୍ରେଷ୍ଠ ପ୍ରଶାସକ ପୁରସ୍କାର” ବିଷୟକୁ ସାମିଲ କରାଯିବାକୁ ଅବିଭାବକ ନାପସନ୍ଦ କରିଛନ୍ତି। କେବଳ ରାଜନୈତିକ ଉଦ୍ଦେଶ୍ୟରେ ଏହା କରାଯାଇଥିବା ସେମାନେ ଅଭିଯୋଗ କରିଛନ୍ତି।

ଅଭିଭାବକ ଜ୍ୟୋତିର୍ମୟୀ ପଣ୍ଡା କହିଛନ୍ତି-“ଜୀବଯନ୍ତୁ ଉପରେ ବକ୍ତୃତା ପ୍ରତିଯୋଗିତା ହୋଇଥିଲେ, ଏହାର ପ୍ରଭାବ ପିଲାମାନଙ୍କ ଉପରେ ପଡ଼ିଥାନ୍ତି। ମାତ୍ର ମୁଖ୍ୟମନ୍ତ୍ରୀଙ୍କୁ ମିଳିଲା ସର୍ବଶ୍ରେଷ୍ଠ ପ୍ରଶାସକ ପୁରସ୍କାର ଉପରେ ତର୍କ ରଖିଲେ ପିଲାମାନେ କଣ ଶିଖିବେ?”

ଅଭିଭାବକ ଶେଖ୍ ପିର ବକ୍ସ କହିଛନ୍ତି-“ପିଲାମାନଙ୍କୁ ପାଠ ପଢ଼ାଯାଉ। ମାତ୍ର ସରକାର ତାହା ନକରି ନିଜ ପ୍ରଚାର ପାଇଁ ଏପରି ସବୁ କାର୍ଯ୍ୟକ୍ରମ ଆୟୋଜନ କରୁଛନ୍ତି।”

ଶିଶୁ ଦିବସ ସମାରୋହକୁ ସଫଲ କରିବା ଲାଗି ଭୁବନେଶ୍ୱର କ୍ୟାପିଟାଲ୍ ହାଇସ୍କୁଲ୍ ପରିସରରେ ଚାଲିଛି ଜୋରଦାର ପ୍ରସ୍ତୁତି। ସ୍କୁଲ ଓ ଗଣଶିକ୍ଷା, ପୂର୍ତ୍ତ, ଗୃହ ଓ ନଗର ଉନ୍ନୟନ, ବିଡିଏ ଓ ବିଏଏମ୍‌ସି ଅଧିକାରୀଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ କାର୍ଯ୍ୟକ୍ରମର ରୂପରେଖ ପ୍ରସ୍ତୁତ କରାଯାଉଛି। ଦିନ ୧୧.୧୫ରୁ ୧୨ ଟାଏ ମୁଖ୍ୟମନ୍ତ୍ରୀ ଅଭିଭାଷଣ ଦେବେ। ଏହାକୁ ଗଣମାଧ୍ୟମ ଓ ସୋସିଆଲ୍ ମିଡିଆରେ ସିଧା ପ୍ରସାରଣ ଲାଗି ବ୍ୟବସ୍ଥା କରାଯାଉଛି।

ପୂର୍ତ୍ତ ବିଭାଗ ସୁପରିଣ୍ଟେଣ୍ଡିଂ ଇଞ୍ଜିନିୟର ରଞ୍ଜିତ କୁମାର ସାହୁ କହିଛନ୍ତି-“ଶିଶୁ ଦିବସ ଅବସରରେ ହେବାକୁ ଥିବା କାର୍ଯ୍ୟକ୍ରମ ପାଇଁ ୩୦,୦୦୦ ସ୍କୋୟାରଫୁଟ୍‌ର ଟେଣ୍ଟ୍‌ କରାଯାଇଛି। ଏଥିରେ ୬୦୦୦ ପିଲା ବସିବାର ବ୍ୟବସ୍ଥା କରାଯାଇଛି। ଏଥିପାଇଁ ଅଗ୍ନିନିରାପତ୍ତା, ପାଇଖାନା ଓ ପାନୀୟର ବ୍ୟବସ୍ଥା କରାଯାଇଛି।”

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ମୋଦି ଷ୍ଟାଇଲ୍ ଫର୍ମୁଲା କାମ ଦେବନି ବୋଲି କହିଛନ୍ତି ବିରୋଧୀ। ରାଜ୍ୟରେ ବହୁ ମହାମନିଷୀ ଥିବା ବେଳେ ନବୀନ ନିଜ ଟେକ ପାଇଁ ସ୍କୁଲ୍ ଛାତ୍ରଛାତ୍ରୀଙ୍କ ମଧ୍ୟରେ ପ୍ରତିଯୋଗିତା କରାଇବା ନିନ୍ଦନୀୟ ବୋଲି ବିଜେପ ଓ କଂଗ୍ରେସ କହିଛନ୍ତି।

ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକ କହିଛନ୍ତି-“ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୧୭ ବର୍ଷ ଧରି ଶାସନ କରୁଛନ୍ତି। କେବେହେଲେ ପିଲାମାନଙ୍କ କଥା ମନେ ପଡ଼ୁନଥିଲା। ଏବେ ପିଲା ଓ ଶ୍ରମିକଙ୍କ କଥା ମନେ ପଡ଼ୁଛି। ପବ୍ଲିସିଟି ପାଇବା ପାଇଁ ଦିଲ୍ଲୀରେ ମୋଦି ଓ ଓଡ଼ିଶା ନବୀନବାବୁ ଚେଷ୍ଟା କରୁଛନ୍ତି।”

ବିଜେପି ସମ୍ପାଦିକା ଲେଖାଶ୍ରୀ ସାମନ୍ତ ସିଂହାର କହିଛନ୍ତି-“ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାଣିସାରିଲେଣି ଓଡ଼ିଶାବାସୀଙ୍କ ସମର୍ଥନ ତାଙ୍କ ସହିତ  ନାହିଁ। ସେଥିପାଇଁ ଛାତ୍ରଛାତ୍ରୀଙ୍କ ସହିତ ଯୋଡ଼ି ହେବାକୁ ଚେଷ୍ଟା କରୁଛନ୍ତି। ମାତ୍ର ଏଥିରେ ସେ ସଫଳ ହେବେନାହିଁ।”

ବିଜେଡି ନେତା ତେଜେଶ୍ୱର ପରିଡ଼ା କହିଛନ୍ତି-“‘ଆମେ ପଢ଼ିବୁ ଗଢ଼ିବୁ… ଶ୍ରେଷ୍ଠ ହେବୁ’କୁ ସଫଳ କରିବା ପାଇଁ ଯେଉଁମାନେ ଚାହୁଁ ନାହାନ୍ତି ସେମାନେ ଶିକ୍ଷା ବିରୋଧୀ। ସେମାନେ କେବେ ହେଲେ ଚାହୁଁ ନାହାନ୍ତି ଓଡ଼ିଶାରେ ଶିକ୍ଷା କ୍ଷେତ୍ରରେ ବିକାଶ ହେଉ।”

Previous ArticleNext Article

Send this to a friend