ଆସିଲା ସସ୍‌ପେନ୍ସ ବୟାନ୍‌ : ତାନିଆଙ୍କ କିଲର ସାଜିଲା କି କସ୍‌ମେଟିକ୍‌ ?

Tania

ଭୁବନେଶ୍ୱର:(ଓଡ଼ିଶାରିପୋର୍ଟର) : ସନ୍ଦେହଘେରରେ ରହିଛି ଭୁବନେଶ୍ୱର ୟୁନିଟ୍ -୮ ଡିଏଭି ମ୍ୟାନେଜମେଣ୍ଟ ଛାତ୍ରୀ ତାନିଆ  ବାନାର୍ଜୀଙ୍କ ଆତ୍ମହତ୍ୟା ଘଟଣା।  କସ୍‌ମେଟିକ ଚୋରିକୁ ନେଇ କ’ଣ ସତରେ ତାନିଆ ଆତ୍ମହତ୍ୟା କରିଛନ୍ତି? ଏହାକୁ ନେଇ ଚର୍ଚ୍ଚା ଚାଲିଥିବା ବେଳେ ଆଜି ମୁହଁ ଖୋଲିଛନ୍ତି ଶିକ୍ଷାନୁଷ୍ଠାନର ଅଧ୍ୟକ୍ଷ। ତାନିଆଙ୍କ ରୁମ୍‌ମେଟ୍‌ ଉଭୟ କଲେଜ କର୍ତ୍ତୃପକ୍ଷ  କସ୍‌ମେଟିକ୍‌ ଚୋରି କଥାକୁ  ସ୍ୱୀକାର କରିଛନ୍ତି।  ତେବେ ପୂର୍ବରୁ ହଷ୍ଟେଲ ଓ୍ୱାର୍ଡେନ୍ କସମେଟିକ୍‌ ଚୋରି କଥାକୁ ଅସ୍ୱୀକାର କରିଥିବାରୁ ତାନିଆଙ୍କ ମୃତ୍ୟୁ କାରଣକୁ ନେଇ ସନ୍ଦେହ ଘନୀଭୂତ ହେଉଛ। ଏ ସବୁ କାରଣରୁ ବିବିଏ ଛାତ୍ରୀ ତାନିଆ ବାନାର୍ଜୀ ଆତ୍ମହତ୍ୟାର କାରଣକୁ ନେଇ ଡିଏଭି କର୍ତ୍ତୃପକ୍ଷଙ୍କ ମଧ୍ୟରେ ଦ୍ୱନ୍ଦ୍ୱ ଉପୁଜିଛି। ଶିକ୍ଷାନୁଷ୍ଠାନର ଅଧ୍ୟକ୍ଷ ଓ ହଷ୍ଟେଲ ଓ୍ୱାର୍ଡେନଙ୍କ କଥାରେ ତାଳମେଳ ନ ଥିବାରୁ ଆତ୍ମହତ୍ୟାର ପ୍ରକୃତ କାରଣକୁ ନେଇ ସନ୍ଦେହ ଘନୀଭୂତ ହୋଇଛି। ପୂର୍ବରୁ ହଷ୍ଟେଲ ଓ୍ୱାର୍ଡେନ୍ କସ୍‌ମେଟିକ୍‌ ଚୋରି କଥାକୁ ସଂପୂର୍ଣ୍ଣ ରୂପେ ଖଣ୍ଡନ କରିଥିଲେ।

ହଷ୍ଟେଲରେ ସେମିତି କିଛି ଘଟି ନ ଥିବା ସେ କହିଥିଲେ।  ତେବେ ଆଜି କଲେଜ୍ ଅଧ୍ୟକ୍ଷ ଏନେଇ ମୁହଁ ଖୋଲିଛନ୍ତି।  ହଷ୍ଟେଲର କିଛି ଝିଅଙ୍କ କସ୍‌ମେଟିକ୍‌ ଚୋରି ହୋଇଥିଲା। ସୁପରିଟେଣ୍ଡେଣ୍ଟ ପାଖରେ ତା’ର ସମାଧାନ ହୋଇଥିବା ସେ କହିଛନ୍ତି  ଘଟଣାର ଅନୁଧ୍ୟାନ ଲାଗି ଇଣ୍ଟରନାଲ କମିଟି ଗଠନ କରାଯାଇଥିବା ସେ ସୂଚନା ଦେଇଛନ୍ତି। ସେପଟେ କସ୍‌ମେଟିକ୍‌ ଚୋରି ପ୍ରସଙ୍ଗରେ ବି ଆଜି ମୁହଁ ଖୋଲିଛନ୍ତି ତାନିଆଙ୍କ ରୁମ୍‌ମେଟ୍‌। ତାନିଆଙ୍କ ଆତ୍ମହତ୍ୟା ଦିନ ସେ ହଷ୍ଟେଲରେ ନଥିଲେ।

ତେବେ ଚୋରି କସମେଟିକ୍‌ ତାନିଆଙ୍କ ରୁମ୍‌ରୁ ବାହାରିଥିବା ନେଇ ସେ ଶୁଣିଥିବା କହିଛନ୍ତି।  ସେପଟେ ଝିଅକୁ ହରାଇବା ପରେ ମର୍ମାହତ ହୋଇପଡିଛନ୍ତି ତାନିଆଙ୍କ ବାପା-ମାଆ। ତାଙ୍କୁ ନ୍ୟାୟ ଦିଆଯାଉ ବୋଲି କହିଛନ୍ତି ତାନିଆଙ୍କ ବାପା।  ଅନ୍ୟପକ୍ଷରେ ପ୍ରକୃତ କଥା ପଦାକୁ ଆଣିବା ଲାଗି ସିବିଆଇ ତଦନ୍ତ ଦାବି କରିଛନ୍ତି ତାନିଆଙ୍କ ମା। ଏବେ ପ୍ରଶ୍ନ କିଏ ସତ କହୁଛନ୍ତି ? ଓ୍ୱାର୍ଡେନ୍ ନା ସୁପରିଟେଣ୍ଡେଣ୍ଟ୍ ? ବିଭ୍ରାନ୍ତିକର ବୟାନ ଦେଇ ଏମାନେ ସତକୁ ଲୁଚାଇକୁ ଉଦ୍ୟମ କରୁ ନାହାନ୍ତି ତ? ତେବେ ସତ ଖୋଜିବାକୁ ତଦନ୍ତ ଜାରି ରହିଥିବା କହିଛନ୍ତି ଭୁବନେଶ୍ୱର ଡିସିପି ସତ୍ୟବ୍ରତ ଭୋଇ। ସୂଚନାଯୋଗ୍ୟ ଯେ, ଭୁବନେଶ୍ୱରର ୟୁନିଟ୍ ୮ ଡିଏଭି ସ୍କୁଲ ଅଫ୍ ବିଜ୍‌ନେସ୍‌ ମ୍ୟାନେଜମେଣ୍ଟରେ  ଛାତ୍ରୀ ତାନିଆ ବାନାର୍ଜୀଙ୍କ ଗତ ୨୭ ତାରିଖ ରାତିରେ ସନ୍ଦେହଜନକ ମୃତ୍ୟୁ ଘଟିଲା।

Previous ArticleNext Article

Send this to a friend