ପୁରୀରେ ଭିକ୍ଷାବୃତ୍ତି କରୁଥିବା ଋଷୀୟ ନାଗରିକ ଦିଲ୍ଲୀ ଗଲେ

puri

ପୁରୀ(ଓଡ଼ିଶା ରିର୍ପୋଟର): ଶ୍ରୀମନ୍ଦିର ସମ୍ମୁଖରେ ଭିକ୍ଷା ମାଗୁଥିବା ଋଷୀୟ ପର୍ଯ୍ୟଟକ ଆନ୍ଦେରି ଗ୍ଲାଗୋଲେଭ୍ ଆଜି ଦିଲ୍ଲୀ ଯାତ୍ରା କରିଛନ୍ତି। ସେ ଆସନ୍ତା ୮ତାରିଖରେ ଜାତିସଂଘର ହାଇକମିଶନରଙ୍କ ନିକଟରେ ହାଜର ହେବେ।  ଆନ୍ଦେରି  ଭାରତରେ ଶରଣାର୍ଥୀ ହୋଇ ରହିବା ପାଇଁ ପୂର୍ବରୁ ଆବେଦନ କରିଥିଲେ।  ସେ ସମ୍ପର୍କରେ ଦିଲ୍ଲୀରେ ଶୁଣାଣି ହେବ। ଆଜି ପର୍ଯ୍ୟଟନ ବିଭାଗ ପକ୍ଷରୁ ପୁରୁଷୋତ୍ତମ ଏକ୍ସପ୍ରେସରେ ତାଙ୍କୁ  ଦିଲ୍ଲୀ ପଠାଯିବା ସହ ବାଟ ଖର୍ଚ୍ଚ ପାଇଁ ୪ହଜାର ୩ଶହ ଟଙ୍କା ଦିଆଯାଇଛି।

ସୂଚନାଯୋଗ୍ୟ, କିଛି ଦିନ ତଳେ ଆନ୍ଦେରି ଶ୍ରୀମନ୍ଦିର ସମ୍ମୁଖରେ ଭିକ୍ଷା ଗ୍ରହଣ କରୁଥିବା ବେଳେ ଗଣମାଧ୍ୟମର ନଜରକୁ  ଆସିଥିଲେ। ବିଦେଶୀ ନାଗରିକ ଭିକ ମାଗିବା ଖବର  ଜଣାପଡ଼ିବା ପରେ ପୋଲିସ ତତ୍ପର ହୋଇ ପଡ଼ିଥିଲା। ସେ ପୁରୀକୁ କେବେ ଓ କାହିଁକି ଆସିଛନ୍ତି ସେ ସମ୍ପର୍କରେ ଜାଣିବା ପାଇଁ ସିଂହଦ୍ୱାର ଥାନାରେ ତାଙ୍କ ଭିସା ଯାଞ୍ଚ କରାଯାଇଥିଲା। ଏହାପରେ ପର୍ଯ୍ୟଟନ ବିଭାଗ ପକ୍ଷରୁ ତାଙ୍କୁ ପୁରୀ ସର୍ବୋଦୟ ନଗର ସେଲଟର ହୋମରେ ରଖାଯାଇଥିଲା।

ପୁରୀର ପର୍ଯ୍ୟଟନ ଅଧିକାରୀ ବିଜୟ କୁମାର ଜେନା କହିଛନ୍ତି,“ଡିସେମ୍ୱର ୧୦ ତାରିଖରେ ଆନ୍ଦେରିଙ୍କୁ  ସେଲଟର ହୋମରେ ରଖାଯାଇଥିଲା। ସେଠାରେ ତାଙ୍କୁ ସମସ୍ତ ପ୍ରକାର ସୁବିଧା ଦିଆଯାଇଥିଲା। ଆମେ ତାଙ୍କର ଟ୍ରେନ୍ ଟିକଟ୍‌ ମଧ୍ୟ କରି ଦେଇଛୁ। ଏହାସହିତ ତାଙ୍କୁ ୪,୩୦୦ ଟଙ୍କା ଦିଆଯାଇଛି।”

Previous ArticleNext Article

Send this to a friend