ଅବସର ନେଲେ ଜଗା ଓ କାଳିଆଙ୍କ ଅପରେସନ୍‌ କରିଥିବା ପ୍ରଫେସର

Aiims

ଯୋଡ଼ାମୁଣ୍ଡ ଶିଶୁ ଜଗା ଓ କାଳିଆଙ୍କ ଅପରେସନ୍‌ ୨୦୧୭ ମସିହାରେ ଚର୍ଚ୍ଚିତ ହୋଇଥିଲା। ଏହାକୁ ଚ୍ୟାଲେଞ୍ଜ ଭାବେ ନେଇ ନୂଆଦିଲ୍ଲୀ ଏମ୍‌ସରେ ଅପରେସନ୍‌ କରାଯାଇଥିଲା। ଚାଲିଲା ନନ୍‌ଷ୍ଟପ୍‌ ଅପରେସନ୍‌। ପରେ ଜଗା ଓ କାଳିଆ ଅଲଗା ହେଲେ। ଏବେ ସେମାନେ ଆରୋଗ୍ୟ ହେଉଛନ୍ତି। ଏହାର ନେତୃତ୍ୱ ନେଇଥିଲେ ଏମ୍‌ସ ନ୍ୟୁରୋ ସର୍ଜନ ଡାକ୍ତର ଅଶୋକ ମହାପାତ୍ର। ଗତକାଲି ସେ ଅବସର ନେଇଛନ୍ତି। ତାଙ୍କ ସହ ଓଡ଼ିଶା ରିପୋର୍ଟରର ଏକ ସାକ୍ଷାତକାର।

ପ୍ରଶ୍ନ: ଜଗା-କାଳିଆଙ୍କ ଅପରେସନ୍‌ ସମୟର ଅନୁଭୁତି କେମିତି ରହିଥିଲା ?

ଉତ୍ତର: ନୂଆଦିଲ୍ଲୀ ଏମ୍‌ସରେ ଯୋଡ଼ାମୁଣ୍ଡ ଶିଶୁ ଜଗା ଓ କାଳିଆଙ୍କ ଅପରେସନ କରାଯାଇଥିଲା। ଏହା ଏକ ଜଟିଳ ଅପରେସନ୍‌ ହୋଇଥିଲେ ମଧ୍ୟ ମହାପ୍ରଭୁ ଜଗନ୍ନାଥ ଓ ଓଡ଼ିଶାବାସୀ ଦୟା ଏବଂ ପ୍ରାର୍ଥନା ଯୋଗୁଁ ସବୁ କିଛି ଠିକ୍‌ଠାକ ହୋଇଥିଲା। ଅପରେସନ୍‌ ପୂର୍ବରୁ ଯାହା ଆଶା କରିଥିଲୁ, ତାହାଠାରୁ ଅଧିକ ସଫଳତା ପାଇଛୁ। ଆଗକୁ ସେମାନଙ୍କ ପାଇଁ ବହୁ କିଛି କରିବାର ବାକି ରହିଛି। ଭଗବାନଙ୍କଠାରେ ପ୍ରାର୍ଥନା କରିଛି, ସେମାନେ ଶୀଘ୍ର ସୁସ୍ଥ ହୋଇ ଫେରି ଆସନ୍ତୁ।

ପ୍ରଶ୍ନ: ଜଗା ଓ କାଳିଆ କେବେ ଡିସ୍‌ଚାର୍ଜ ହେବେ?

ଉତ୍ତର: ଜଗା ଓ କାଳିଆ କେବେ ଡିସ୍‌ଚାର୍ଜ ହେବେ, ତାହା କହିହେବ ନାହିଁ। ସମୟ ଆସିଲେ ଏମ୍‌ସ ପକ୍ଷରୁ ଜଣାଇ ଦିଆଯିବ।

ପ୍ରଶ୍ନ: ଜଗା ଓ କାଳିଆଙ୍କ ପାଖରେ ଶେଷ ପର୍ଯ୍ୟନ୍ତ ରହିବ କି ?

ଉତ୍ତର: ଅବସର ପରେ ମୁଁ ୩ ମାସ ପର୍ଯ୍ୟନ୍ତ ଏମ୍‌ସରେ ରହିବି। ମୋ ପରେ ଆଉ ଜଣେ କିଏ ଆସିବେ। ସେ ସେମାନଙ୍କ ଚିକିତ୍ସା କରିବେ। ଏଥିରେ କିଛି ଅସୁବିଧା ହେବ ନାହିଁ। ମୁଁ ଆଶା କରୁଛି ଜଗା ଓ କାଳିଆ ଶୀଘ୍ର ଆରୋଗ୍ୟ ହୋଇ ଘରକୁ ଫେରିଯିବ।

ପ୍ରଶ୍ନ: ପିଲା ଦିନର ସ୍ମୃତିକୁ ନେଇ କ’ଣ କହିବେ ?

ଉତ୍ତର: ପୁରୀ ଜିଲ୍ଲା ବୀରଗୋବିନ୍ଦପୁରରେ ୧୯୫୨ ଡିସେମ୍ୱର ମାସରେ ମୋର ଜନ୍ମ। ସେତେବେଳେ ଆମ ଗାଁରେ ହାଇସ୍କୁଲ ନଥିଲା। ଗାଁ ସ୍କୁଲରେ ପ୍ରଥମରୁ ୫ମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ା ସରିବା ପରେ ବୀରନରସିଂହପୁର ହାଇସ୍କୁଲରେ ପାଠ ପଢ଼ୁଥିଲି। ମୋ ଗାଁଠାରୁ ହାଇସ୍କୁଲ ଦୂର ୬ କିମି। ପ୍ରତିଦିନ ୧୨ କିମି ଯିବାଆସିବା କରି ଘରେ ପାଠ ପଢ଼ୁଥିଲି। ଆମ ସମୟରେ ଗାଁରେ ରାସ୍ତା ନଥିଲା। ବିଜୁଳି ନଥିଲା।

ପ୍ରଶ୍ନ: ଭୁବନେଶ୍ୱର ଏମ୍ସରେ ୪ ବର୍ଷ ଚାକିରି ସମୟର ଅଭିଜ୍ଞତା କେମିତି ଥିଲା ?

ଉତ୍ତର: ଦିଲ୍ଲୀ ଏମ୍ସରେ ଜଣେ ପ୍ରଫେସର ଭାବେ କାମ କରୁଥିଲି। ପରେ ମୋତେ ଲକ୍ଷ୍ନୌ ଏମ୍ସ ନିର୍ଦ୍ଦେଶକ ଭାବେ ବଦଳି କରାଗଲା। ୪ ବର୍ଷ କାର୍ଯ୍ୟକାଳ ସାରି ଦିଲ୍ଲୀ ଫେରିଲି। ପରେ ଭୁବନେଶ୍ୱର ଏମ୍ସ ଆସିବା ପାଇଁ ପରାମର୍ଶ ଦିଆଯାଇଥିଲା। ଏଥିପାଇଁ ମୋର ସହ ପାଠିମାନେ ମୋତେ ମନା କରିଥିଲେ। କାରଣ ଭୁବନେଶ୍ୱର ଏମ୍ସର କୋଠା କାମ ଆରମ୍ଭ ହୋଇ ନଥିଲା। ପରେ ଧୀରେ ଧୀରେ କାମ ଆରମ୍ଭ ହେଲା। ଭଗବାନଙ୍କ ଆଶୀର୍ବାଦରୁ ବର୍ତ୍ତମାନ ଭୁବନେଶ୍ୱର ଏମ୍ସର ବହୁ ପରିପର୍ତ୍ତନ ହୋଇଛି।

ପ୍ରଶ୍ନ: ଅବସର ପରେ କ’ଣ କରିବେ ?

ଉତ୍ତର: ଅବସର ପରେ ଡାକ୍ତର ପେସାରେ ରହିବି। ଆଜିର ଦୁନିଆରେ ୮୦ ବର୍ଷ ପରେ ମଧ୍ୟ ଜଣେ ଅପରେସନ୍‌ କରୁଛନ୍ତି। ଆମର ଅଭିଜ୍ଞତା ଲୋକଙ୍କ କାମରେ ନଲାଗେ, ତାହାହେଲେ ମୁଁ ଲୋକଙ୍କ ପ୍ରତି ଅନ୍ୟାୟ କରିବି। ସାମାଜିକ କାମ କରିବି।

Previous ArticleNext Article

Send this to a friend