ଧରାପଡ଼ିଲା ‘କିସ୍‌’ର ଜମି ହଡ଼ପ ଫନ୍ଦି: ଗ୍ରାମସଭା କବଜା କରି ବିରୋଧର ସ୍ୱର ଚାପିଦେବାକୁ ଉଦ୍ୟମ

gramasabha

ଭୁବନେଶ୍ୱର (ଓଡ଼ିଶା ରିପୋର୍ଟର): ଜଙ୍ଗଲ ଜମି ହଡ଼ପ ପାଇଁ ‘କିସ୍‌’ ଷଡ଼ଯନ୍ତ୍ର କରୁଥିବା ଅଭିଯୋଗ ଆସିଛି। କଳେ ବଳେ କୌଶଳେ, ଭୁବନେଶ୍ୱର ପଥରଗାଡ଼ିଆ ଅଞ୍ଚଳରେ ଥିବା ଜଙ୍ଗଲ କିସମର ୧୦ ଏକର ଜମିକୁ ନିଜ ଅକ୍ତିଆରକୁ ନେବାକୁ ସଂସ୍ଥା ଆରମ୍ଭ କରିଛି ପ୍ରୟାସ। ଏନେଇ ଆଜି ଅନୁଷ୍ଠିତ ଗ୍ରାମସଭାରେ ‘କିଟ୍’ ଓ ‘କିସ୍’ ଛାତ୍ରଛାତ୍ରୀଙ୍କୁ ସ୍ଥାନୀୟ ବାସିନ୍ଦା ସଜେଇ ସଂଖ୍ୟା ଅଧିକ ବୋଲି ଦର୍ଶାଇବାକୁ ସଂସ୍ଥା ଉଦ୍ୟମ କରିଥିବା ଅଭିଯୋଗ ହୋଇଛି। ଯାହାକୁ ନେଇ ଅସନ୍ତୋଷ କୁହୁଳିବାରେ ଲାଗିଛି।

‘କିସ୍‌’ର ଏହି ଷଡ଼ଯନ୍ତ୍ରକୁ ଗ୍ରାମସଭାରେ ବିରୋଧ କରାଯାଇଥିବା ଦେଖିବାକୁ ମିଳିଥିଲା। ହେଲେ ଯେଉଁମାନେ ବିରୋଧ କରିବାକୁ ଚାହିଁଥିଲେ ସେମାନଙ୍କୁ ନିଜ ମତ ରଖିବାକୁ ଗ୍ରାମସଭାରେ ସୁଯୋଗ ଦିଆଯାଇ ନଥିଲା। ଏପରିକି ଗଣମାଧ୍ୟମ ଆଗରେ ନିଜ ମତ ରଖିବାକୁ ଚାହୁଁଥିବା ବ୍ୟକ୍ତିଙ୍କୁ ଧକ୍କା ମାରି ବାହାର କରି ଦିଆଯାଇଥିଲା।

ଅଭିଯୋଗ ଅନୁସାରେ, କିସ୍ ପାଇଁ ଜଙ୍ଗଲ ଜମି କିସମ ପରିବର୍ତ୍ତନ ଲାଗି ‘କିଟ୍’ ନିକଟ ପଥରଗାଡ଼ିଆରେ ବସିଥିଲା ଗ୍ରାମସଭା। ହେଲେ ଏହି ଗ୍ରାମସଭାରେ ପଥରଗାଡ଼ିଆ ବାସିନ୍ଦା କମ୍,‘କିସ୍‌’ ଓ ‘କିଟ୍‌’ର ବେଶି ଛାତ୍ରଛାତ୍ରୀ ବସିଥିଲେ। ଯିଏ ବି ବିରୋଧରେ କହିବାକୁ ଚାହୁଁଥିଲା ତାଙ୍କୁ କୁହାଇ ଦିଆଯାଉ ନଥିଲା। ପୂର୍ବ ପ୍ରସ୍ତୁତି ସହ ଘେରି ରହିଥିଲେ ‘କିଟ୍’ ଓ ‘କିସ୍’ ସମର୍ଥିତ ବ୍ୟକ୍ତି। ଏତେ ଚେଷ୍ଟା ପରେ ବି ଶୁଭିଥିଲା ବିରୋଧର ସ୍ୱ।ର।

ସୂଚନାଯୋଗ୍ୟ ଯେ, ପଥରଗାଡ଼ିଆରେ ଥିବା ଛୋଟ ଜଙ୍ଗଲ କିସମର ୧୦ ଏକର ଜମିକୁ ଶହ ଶହ ବର୍ଷ ଧରି ଜଙ୍ଗଲ ଜମିର ମାନ୍ୟତା ଦିଆଯାଇ ଆସିଛି। ଏବେ ଏହି ଜମି ଉପରେ ପଡ଼ିଛି ‘କିସ୍‌’ର ନଜର। ଜମିର କିସମ ପରିବର୍ତ୍ତନ କରି ନିଜ ନାଁକୁ ନେବା ଲାଗି ଆୟୋଜିତ ଗ୍ରାମସଭାରେ ମତକୁ ନିଜ ସପକ୍ଷରେ ନେବାକୁ“କିଟ୍’ ଓ ‘କିସ୍’ ପିଲାଙ୍କୁ ଭରପୁର ଉପଯୋଗ କରାଯାଇଥିବା ଦେଖିବାକୁ ମିଳିଥିଲା। ଗ୍ରାମବାସୀଙ୍କ ବଦଳରେ ଗ୍ରାମସଭାରେ ବସିଥିଲେ ରାଜ୍ୟର ବିଭିନ୍ନ ଆଡୁ ଆସି ଏଠି ପାଠ ପଢୁଥିବା ଶହଶହ ଛାତ୍ରଛାତ୍ରୀ।

ଏପରିକି ଗ୍ରାମସଭାରେ ଯୋଗ ଦେଇଥିବା ସ୍ଥାନୀୟ ଲୋକ ପ୍ରତିନିଧି ମଧ୍ୟ କିଓକୁ ଜମି ପ୍ରଦାନର ବିରୋଧ କରିଥିଲେ। ତେବେ ପ୍ରଶ୍ନ ଉଠୁଛି ଶହ ଶହ ବର୍ଷ ଧରି ଗାଁ ମୁଣ୍ଡରେ ଥିବା ଜଙ୍ଗଲ ଜମିକୁ ଏକ ଘରୋଇ ଅନୁଷ୍ଠାନକୁ ଟେକି ଦିଆଯିବା କେତେଦୂର ଠିକ୍? ଏହି ଜମି ପ୍ରତିବଦଳରେ ପଥରଗାଡ଼ିଆ ବାସିନ୍ଦାଙ୍କୁ ପ୍ରାୟ ୧୦ କିଲୋମିଟର ଦୂର କୁଜିମହଲଠାରେ ଦେବାକୁ ଯୋଜନା ହୋଇଛି। ହେଲେ ୧୦ କିମି ଦୂରରେ ଥିବା ଏହି ଜମି ପଥରଗାଡ଼ିଆ ବାସିନ୍ଦାଙ୍କ କାମରେ କେମିତି ଆସିବ ତାହା ମଧ୍ୟ ପ୍ରଶ୍ନ ଛିଡା କରିଛି।

ଆଇନ୍‌କୁ ଆଖିଠାର ମାରିବା ପାଇଁ କରାଯାଇଥିବା ଏ ପ୍ରାୟୋଜିତ ଗ୍ରାମସଭାକୁ ନେଇ ଅସନ୍ତୋଷ ତେଜୁଛି। ତେବେ ଏନେଇ ‘କିସ୍’ କର୍ତ୍ତୃପକ୍ଷଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ପ୍ରତିକ୍ରିୟା ମିଳିପାରି ନାହିଁ।

Previous ArticleNext Article

Send this to a friend