ବେତନ କମିଶନ୍ ଲାଗୁ ପରେ ଖୁସିରେ ଗଦ୍‌ଗଦ୍‌ କର୍ମଚାରୀ: କିନ୍ତୁ ଚିନ୍ତାରେ ସରକାର, କେଉଁଠୁ ଆଣିବେ ଟଙ୍କା?

ଭୁବନେଶ୍ୱର (ଓଡ଼ିଶା ରିପୋର୍ଟର): ସଚିବାଳୟରେ ଶୁଭେଛାର ସୁଅ। ସରକାରୀ କର୍ମଚାରୀଙ୍କ ଭିତରେ ଖୁସିର ଲହରୀ। ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧନା ଦେବା ପାଇଁ ଲାଗିଛି କର୍ମଚାରୀଙ୍କ ଭିଡ। ବିଳମ୍ବରେ ହେଲେ ବି ରାଜ୍ୟ ସରକାର ସପ୍ତମ ବେତନ କମିଶନଙ୍କ ସୁପାରିଶ ଲାଗୁ କରି କର୍ମଚାରୀଙ୍କୁ ଦେଇଛନ୍ତି ପୂଜା ଭେଟି। ରାଜ୍ୟ ସରକାର କେନ୍ଦ୍ରୀୟ ଢାଞ୍ଚାରେ ଲାଗୁ କରିବେ। ବେତନ କମିଶନଙ୍କ ସୁପାରିଶ ଅର୍ଥାତ ରାଜ୍ୟ ସରକାରୀଙ୍କ କର୍ମଚାରୀଙ୍କ ମୂଳ ଦରମାରେ ୧୪. ୫ ପ୍ରତିଶତ ବଢିବ। ଏବେ ନଜର ପକାନ୍ତୁ  ଗ୍ରୁପ ଡି ବା ଚତୁର୍ଥ ଶ୍ରେଣୀ କର୍ମଚାରୀଟିଏ କେତେ ଟଙ୍କା ଅଧିକ ପାଇବ। ମୂଳ ଦରମା ୭୦୦୦ ଓ ଗ୍ରେଡ୍ ପେ ୧୮୦୦ ଟଙ୍କା ଥିଲେ  ବର୍ଦ୍ଧିତ ଦରମା ହେବ ସର୍ବନିମ୍ନ ୧୮ ହଜାର ଟଙ୍କା। ସେହିପରି ତୃତୀୟ ଶ୍ରେଣୀ କର୍ମଚାରୀଙ୍କ ମୂଳ ଦରମା ୧୩ ହଜାର ୫୦୦ ଓ ଗ୍ରେଡ୍ ପେ- ୪୨୦୦ ଥିଲେ ବର୍ଦ୍ଧିତ ଦରମା ହେବ ୩୫ ହଜାର ୪୦୦। ଏହି ହିସାବରେ ଗ୍ରୁପ-ବି କର୍ମଚାରୀଙ୍କ ସର୍ବନିମ୍ନ ବର୍ଦ୍ଧିତ ଦରମା ହେବ ୫୬ ହଜାର ୧୦୦ ଓ ଗ୍ରୁପ-ଏ କର୍ମଚାରୀଙ୍କ ଦରମା ହେବ ୧ ଲକ୍ଷ ୧୮ ହଜାର ୫୦୦। ମୁଖ୍ୟଶାସନ ସଚିବ ପାହ୍ୟାର ଆଇଏଏସ୍‌ ଅଧିକାରୀ ପାଇବେ ୨ ଲକ୍ଷ ୨୫ ହଜାର ଟଙ୍କା। ତେବେ ବିଦ୍ଧିବଦ୍ଧ ଭାବେ ଏ ନେଇ ସରକାର ବିଜ୍ଞପ୍ତି ପ୍ରକାଶ କରିବେ। ସରକାରୀ କର୍ମଚାରୀ ଖୁସିଥିଲେ ବି ରାଜ୍ୟ ସରକାରଙ୍କ ବିଜ୍ଞପ୍ତିକୁ ଅପେକ୍ଷା  କରିଛନ୍ତି।

ସେପ୍ଟେମ୍ବରରୁ ନୂଆ ବର୍ଦ୍ଧିତ ଦରମା ପାଇବେ ସରକାରୀ କର୍ମଚାରୀ। ୨୭ରୁ ପୂଜାଛୁଟି ପଡୁଥିବାରୁ ୨୬ ତାରିଖରେ ମିଳବ ନୂଆ ବର୍ଦ୍ଧିତ ଦରମା। ଏଥିପାଇଁ ସରକାରଙ୍କ ବାର୍ଷିକ ଖର୍ଚ୍ଚ ହେବ ୪ ହଜାର ୫୦୦ କୋଟି ଟଙ୍କା। ଏହି ହିସାବରେ ଦେଖିଲେ ସେପ୍ଟମ୍ବରରୁ ଫେବ୍ରୁଆରୀ  ୨୦୧୮ ଭିତରେ ୬ ମାସ ପାଇଁ ସରକାର ଦରମା ଓ ପେନ୍‌ସନ୍ ବାବଦକୁ ଖର୍ଚ୍ଚ କରିବେ ୨ ହଜାର ୨୫୦ କୋଟି।  ପିଛିଲା ଭାବେ ୨୦୧୬ ଜାନୁଆରୀରୁ ଲାଗୁହେଲେ ୨୦ ମାସ ପାଇଁ ଖର୍ଚ୍ଚ ହେବ ପ୍ରାୟ ୭୫୦୦ କୋଟି। ତେବେ ବର୍ତ୍ତମାନ ସୁଦ୍ଧା ସରକାର ସ୍ଥିର କରି ନାହାଁନ୍ତି ବକେୟା ଦରମା କେଉଁ ରୂପରେ ବା କେତେ କିସ୍ତିରେ ଦେବେ। ଅର୍ଥମନ୍ତ୍ରୀ କହିଛନ୍ତି  କର୍ମଚାରୀଙ୍କ ଜିପିଏଫରେ ଜମା କରିବେ କି କିସ୍ତିରେ ଦେବେ ସେନେଇ ବିଚାର ଚାଲିଛି ତେବେ ପ୍ରଶ୍ନ ଏହି ଅତିରିକ୍ତ ବୋଝକୁ ସରକାର କେଉଁ ଉତ୍ସରୁ ଆଣି ଭରଣା କରିବେ।

କର୍ମଚାରୀଙ୍କ ଦରମା ଓ ପେନସନ୍ ବାବଦକୁ ବଜେଟ୍‌ରେ ସରକାର ୩୩ ହଜାର ୩୧୩ କୋଟିର ବ୍ୟୟ ବରାଦ କରିଛନ୍ତି। ୧୭-୧୮ ବର୍ଷରେ ରାଜ୍ୟର ରାଜସ୍ୱ ଆଦାୟର ଲକ୍ଷ୍ୟ ପ୍ରାୟ ୩୬ ହଜାର କୋଟି ରହିଛି। ଏପଟେ ଋଣଭାର ହେବ ୭୬ ହଜାର କୋଟି। ତେଣୁ ସପ୍ତମ କମିଶନ ଲାଗୁ ପରେ ଅତିରିକ୍ତ ଆର୍ଥିକ ବୋଝ ସରକାରଙ୍କ ପାଇଁ ନୂଆ ଚ୍ୟାଲେଞ୍ଜ ହେବ।

Previous ArticleNext Article

Send this to a friend