ରାଜନୈତିକ ଦଳଙ୍କ ପାଇଁ କେମିତି ରହିବ ୨୦୧୮ ?

bjp

ଭୁବନେଶ୍ୱର (ଓଡ଼ିଶା ରିପୋର୍ଟର): ୨୦୧୮କୁ ସ୍ୱାଗତ କରିବାକୁ ସମସ୍ତେ ପ୍ରସ୍ତୁତ। ଏସବୁ ଭିତରେ ନୂଆ ବର୍ଷରେ ନୂଆ ଆଶା, ଉତ୍ସାହ, ଉଦ୍ଦିପନା ନେଇ କାମ କରିବାକୁ ଯୋଜନା କରିଛନ୍ତି ରାଜ୍ୟର ସବୁ ପ୍ରମୁଖ ରାଜନୈତିକ ଦଳ। ନୂଆ ବର୍ଷରରେ ରାଜନୈତିକ ଦଳଗୁଡ଼ିକ କେଉଁ ରଣନୀତି ଆପଣେଇବେ ତାର ବ୍ଲ୍ୟୁ ପ୍ରିଣ୍ଟ୍ ହୁଏତ ପ୍ରସ୍ତୁତ ସରିଥିବେ। ତେବେ ରାଜ୍ୟର ତିନି ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ପାଇଁ ବର୍ଷ ୨୦୧୮ ଚ୍ୟାଲେଞ୍ଜ୍ ସୃଷ୍ଟି କରିବ ବିଜେପୁର ଉପନିର୍ବାଚନ। ଏହାଛଡ଼ା ଏହି ତିନ ଦଳ ପାଇଁ ଆଉ କି କି ଚ୍ୟାଲେଞ୍ଜ୍ ଛିଡ଼ା ହେବ ସେନେଇ ଓଡ଼ିଶା ରିପୋର୍ଟର ବିଶେଷ ଉପସ୍ଥାପନା।

ବିଜେଡି ପାଇଁ ନୂଆ ଆହ୍ୱାନ: ୧୭ ବର୍ଷ ଧରି ରାଜ୍ୟ ଶାସନ କ୍ଷମତାରେ ଥିବା ବିଜେଡି ପାଇଁ ୨୦୧୮ରେ ରହିବ ଅନେକ ଚ୍ୟାଲେଞ୍ଜ। ଦଳ ପାଇଁ ପ୍ରଥମ ଅଗ୍ନି ପରୀକ୍ଷା ହୋଇପାରେ ବିଜେପୁର ଉପନିର୍ବାଚନ। ବିଜେପୁର ଫଳାଫଳ ୧୯ ସାଧାରଣ ନିର୍ବାଚନର ମୂଳଦୁଆ ପକାଇବ ବୋଲି କୁହାଯାଉଛି। ସେହିଭଳି ଏବର୍ଷ ରହିଛି ପୌରନିର୍ବାଚନ। ପଞ୍ଚାୟତ ନିର୍ବାଚନରେ ଦଳକୁ ଝଟକା ଲାଗି ଥିବାରୁ ଦଳ ଉପରେ ଲୋକଙ୍କ ପୂର୍ବ ଆସ୍ଥା ଫେରାଇ ଆଣିବାକୁ ହେଲେ ବିଜେଡିକୁ ବେଶ କସରତ୍ କରିବାକୁ ପଡିବ। ରାଜ୍ୟରେ ବିଜେପି, ବିଜେଡିର ପ୍ରମୁଖ ପ୍ରତିଦ୍ୱନ୍ଦ୍ୱୀ ଭାବେ ଆତ୍ମ ପ୍ରକାଶ କରୁଥିବାରୁ ଦଳକୁ ନୂଆ ଷ୍ଟ୍ରାଟେଜି ଆପଣେଇବାକୁ ପଡିବ। ସେହିପରି ଲାଗି ରହିଥିବା ଅନ୍ତର୍ଦ୍ୱନ୍ଦ୍ୱକୁ ପ୍ରଶମିତ କରି ଏକଜୁଟ୍ ହୋଇ ବଳ ଦେଖାଇବା ବିଜେଡି ପାଇଁ ଆଉ ଏକ ବଡ଼ ଚ୍ୟାଲେଞ୍ଜ ହେବ। ଚାଷୀ ଆତ୍ମହତ୍ୟା, ଖଣି ଦୁର୍ନୀତି ଓ ଚିଟ୍‌ଫଣ୍ଡ ଠକେଇ ଭଳି ପ୍ରସଙ୍ଗରେ ବିରୋଧୀଙ୍କୁ ଦଳ କେମିତି କାଉଣ୍ଟର କରୁଛି ତା’ଉପରେ ନଜର ରହିବ। ସରକାରଙ୍କ ସଫଳତାର ବାର୍ତ୍ତା ଲୋକଙ୍କ ପାଖରେ ପହଞ୍ଚାଇବା ଏବଂ ସରଳତାର ଫର୍ମୁଲା ଆପଣେଇବାକୁ ନବୀନ ଦେଇଥିବା ଆହ୍ୱାନ ନେତା କେମିତି ପାଳନ କରୁଛନ୍ତି ତାହା ବି ଦେଖିବାର କଥା।

ବିଜେପି ପାଇଁ ଅଗ୍ନି ପରୀକ୍ଷାର ବର୍ଷ: ପଞ୍ଚାୟତ ନିର୍ବାଚନରେ ଭଲ ପ୍ରଦର୍ଶନ ପରେ ଉତ୍ସାହିତ ରହିଛି ରାଜ୍ୟ ବିଜେପି। ଆଗାମୀ ବିଧାନସଭା ନିର୍ବାଚନରେ ଦଳ ୧୨୦ ଆସନ ଜିତିବାକୁ ଟାର୍ଗେଟ ରଖିଛି। ତେବେ ବିଜେପୁର ଉପନିର୍ବାଚନ ଦଳର ସ୍ୱପ୍ନ ପୂରଣ ରାସ୍ତାରେ ସବୁଠୁ ବଡ଼ ଚ୍ୟାଲେଜ୍ ରହିବ। ପଞ୍ଚାୟତ ନିର୍ବାଚନର ଧାରା ବଜାୟ ରଖିବା ସହ ଜନ ସମର୍ଥନ ବୃଦ୍ଧି କରିବାକୁ ହେଲେ ବିଜେପିକୁ ନୂଆ ରଣନୀତି ଆଣେଇବାକୁ ପଡିବ। ଦଳ ପାଇଁ ଅଡୁଆ ସୃଷ୍ଟି କରିପାରନ୍ତି ବରିଷ୍ଠ ନେତା ବିଜୟ ମହାପାତ୍ର। ସେହିପରି ଦଳଡିଆଁ ନେତାଙ୍କ ଉପରେ ବିଜେପିକୁ ସତର୍କ ଦୃଷ୍ଟି ରଖିବାକୁ ପଡିବ।

କଂଗ୍ରେସ୍‌ର ଆସ୍ଥା ଫେରି ପାଇବା ଚିନ୍ତା: ସବୁଠୁ ପୁରୁଣା ଦଳ କଂଗ୍ରେସ ପାଇଁ ସବୁଠୁ ଅଧିକ ଆହ୍ୱାନ ଆଣିପାରେ ୨୦୧୮। ଦେଶର ଅଧିକାଂଶ ରାଜ୍ୟରେ ଦଳ ଶାସନରୁ ବିତାଡିତ ହୋଇଥିବା ବେଳେ ଓଡ଼ିଶାରେ ବି  ୧୭ ବର୍ଷ ହେଲା କ୍ଷମତାରୁ ଦୂରରେ ରହିଛି। ଏହାସହ ଗୋଷ୍ଠୀ କନ୍ଦଳ ଚରମସୀମାରେ ପହଞ୍ଚିଛି। ରାହୁଲ ମଙ୍ଗ ଧରିବା ପରେ ଦଳରେ ଜଳୁଥିବା ନିଆଁ ଟିକେ ପ୍ରଶମିତ ହେଲା ପରି ଜଣାପଡୁଛି। ହେଲେ ଏହା କେତେବେଳେ ବିସ୍ଫୋରଣର ରୂପ ନେବ କହିବା ମୁସ୍କିଲ। ରାହୁଲ ନେତାଙ୍କୁ ଏକାଠି କରି ଦଳକୁ ଆଗେଇ ନେବାରେ କେତେ ସଫଳ ହେଉଛନ୍ତି ତା ଉପରେ ନଜର ରହିବ।

୨୦୧୮ ଚ୍ୟାଲେଞ୍ଜକୁ ନେଇ କ’ଣ କହୁଛନ୍ତି ରାଜନୈତିକ ଦଳମାନେ ଦେଖନ୍ତୁ ଏହି ଭିଡିଓ।

Previous ArticleNext Article

Send this to a friend