ଲାଇଟ୍‌ ସାଉଣ୍ଡ କ୍ୟାମେରା…ସବୁ ଡେଡ୍‌: ବିବାଦ ପରେ ସାମ୍ନାକୁ ଆସିଲା ବିବର୍ଣ୍ଣ କଳିଙ୍ଗର ଚେହେରା

ଭୁବନେଶ୍ୱର(ଅତୁଲ୍ୟ ବାଉତ): ରଙ୍ଗହୀନ ଆଜି ରଙ୍ଗମଖା ମଣିଷଙ୍କ ଷ୍ଟୁଡିଓ… ଉଡ଼ିଗଲାଣି ‘କଳିଙ୍ଗ’ କର୍ପୂର। ଦିନେ ନାଚଗୀତ, ଡାଇଲଗ୍‌ରେ ଫାଟି ପଡୁଥିବା କଳିଙ୍ଗ ଷ୍ଟୁଡିଓରେ ଆଜି ଶ୍ମଶାନର ନୀରବତା। କେତେକ’ଣ ସତର ଭ୍ରମ ସୃଷ୍ଟି କରୁଥିବା ସେଟ୍‌, ଆଜି ଜଙ୍ଗଲିଆ ଜାଲ ଭିତରେ। ସତେ ଯେମିତି ସ୍ମୃତି ପାଲଟି ଯାଇଛି ଷ୍ଟୁଡିଓ। ଆଉ ଦିନେ ସ୍ୱପ୍ନର ରାସ୍ତା ପାଲଟିଥିବା କଳିଙ୍ଗ ଷ୍ଟୁଡ଼ିଓ ଆଜି କଳାକାରଙ୍କ ପାଇଁ ବାଟ ବୁଲାଇ ଦେଇଛି।

ଚାରିଆଡ଼େ ବଣବୁଦା ଓ ଅନାବନା ଗଛ। ମଝିରେ ମଝିରେ ଓଡ଼ିଶା ସିନେଜଗତର ଉତ୍‌ଥାନ୍‌ପତନର ମୁକସାକ୍ଷୀ କଳିଙ୍ଗ ଷ୍ଟୁଡିଓର ଅବଶେଷ। ଯନ୍ତ୍ରାଂଶ ଓ ଉପକରଣ କହିଲେ କିଛି କଳଙ୍କିଲଗା ଲୁହା। ଆଉ ଷ୍ଟୁଡିଓ କହିଲେ ଖାଁଖାଁ ଭୂତକୋଠି  ଲାଗୁଛି। ଓଡ଼ିଶାର ପ୍ରଥମ ଓ ଏକମାତ୍ର ୨୫ ଏକରର ଏହି ସିନେ ଷ୍ଟୁଡିଓକୁ ଜଙ୍ଗଲ ଗିଳିବାକୁ ବସିଲାଣି। ସୁରକ୍ଷା କର୍ମୀ ନିୟୋଜିତ ଥିଲେ ବି ଏଠାରେ ଅସାମାଜିକ ବ୍ୟକ୍ତିଙ୍କ ଆଡ୍ଡା ଜମୁଛି। HMI ଲାଇଟ୍, କାଠ ଓ ଗଛ ଆଦି ଚୋରି ହେଉଥିବା ଅଭିଯୋଗ ହେଉଛି। ମନ୍ଦିର, ଭିଲେଜ୍ କମ୍ପ୍ଲେକ୍ସ୍, ଡେକୋରେଟିଭ୍ କଟେଜ୍, ଡବିଂ ଥିଏଟର୍, ଜେନେରେଟର୍ ବସ୍, କ୍ରେନ୍ ଆଉ ୩ ମହଲା ବିଶିଷ୍ଟ ଏଡିଟିଂ ରୁମ୍ ସବୁ ଅଛି। କିନ୍ତୁ ବ୍ୟବହାର ନହେବାରୁ ଖତ ଖାଉଛି।

୧୯୮୨ ମସିହାରେ ଭୁବନେଶ୍ୱର ଉପକଣ୍ଠରେ ପ୍ରତିଷ୍ଠା ହୋଇଥିବା କଳିଙ୍ଗ ଷ୍ଟୁଡିଓ। ଓଡ଼ିଆ ଫିଲ୍ମ ଶିଳ୍ପ ପାଇଁ ଆଣିଥିଲା ବିରାଟ ସୁବିଧା। ସେତେବେଳେ କଲିକତା, ମାଡ୍ରାସ୍ ଓ ବମ୍ବେ ଉପରେ ନିର୍ଭର କରୁଥିବା ଓଡ଼ିଶା ଫିଲ୍ମ ନିର୍ମାତାଙ୍କ ପାଇଁ ଏହା ବରଦାନ ପାଲଟିଥିଲା। ବହୁ ଫିଲ୍ମ ନିର୍ମାତା ଓ କଳାକାରଙ୍କ ଭାଗ୍ୟ ଗଢ଼ିଥିବା ଏହି ଷ୍ଟୁଡିଓକୁ ବାହାର ରାଜ୍ୟରୁ ବି ନିର୍ଦ୍ଦେଶକ ଓ ପ୍ରଯୋଜକ ଆସୁଥିଲେ। ଫିଲ୍ମ ନିର୍ମାଣ ପାଇଁ  ମାତ୍ର କ୍ଷତିରେ ଚାଲୁଥିବା ଦର୍ଶାଇ ୨୦୦୭ରେ କଳିଙ୍ଗ ଷ୍ଟୁଡିଓରେ ତାଲା ପଡ଼ିଲା। ତେବେ ଏହାକୁ ନେଇ ବିବାଦ ଦେଖାଦେବା ପରେ MSME ମନ୍ତ୍ରୀ ପ୍ରଫୁଲ୍ଲ ସାମଲ, କହିଥିଲେ ଷ୍ଟୁଡିଓର ପୁନରୁଦ୍ଧାର ପାଇଁ ଇଡ୍‌କୋକୁ ଦାୟିତ୍ୱ ଦିଆଯାଇଛି।

Previous ArticleNext Article

Send this to a friend