କୋରାପୁଟ ମେଡ଼ିକାଲ କଲେଜରେ ୨ ଜଣ ମୁଖିଆ, ହଇରାଣରେ ରୋଗୀ

କୋରାପୁଟ(ଚିତରଞ୍ଜନ ଚୌଧୁରୀ): କୋରାପୁଟ ଭଳି ପଛୁଆ ଅଞ୍ଚଳରେ ମେଡିକାଲ କଲେଜ ହେଲେ ରୋଗୀ ଉନ୍ନତ ମାନର ସ୍ୱାସ୍ଥ୍ୟ ସେବା ପାଇବା ସହ ଛାତ୍ରଛାତ୍ରୀମାନେ ମଧ୍ୟ ଡାକ୍ତର ପାଇଁ ନାମ ଲେଖାଇ ପାରିବେ। ଏଥିପାଇଁ କୋରାପୁଟ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅପଗ୍ରେଡେସନ କରାଯାଇ ସହିଦ ଲକ୍ଷ୍ଣଣ ନାୟକ ମେଡିକାଲ କଲେଜରେ ପରିଣତ କରାଗଲା। ଏହାରି ଭିତରେ ଏକ ବର୍ଷ ବିତିଯାଇଥିଲେ ମଧ୍ୟ ମେଡିକାଲ କଲେଜର ସମସ୍ୟା ସରିବାରେ ନାଁ ଧରୁନି। ପୂର୍ବରୁ ରୋଗୀ ସେବାକୁ ନେଇ ଅନେକ ଅଭିଯୋଗ ଆସିଥିଲା ବେଳେ ଏବେ ଆସିଛି ଦ୍ୱୈତ ଶାସନକୁ ନେଇ।

ସ୍ୱାସ୍ଥ୍ୟସେବାର ଉନ୍ନତି ପାଇଁ କୋରାପୁଟ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅପଗ୍ରେଡେସନ କରାଯାଇ ୨୦୧୭ ମେ’ ୩୧ରେ ମେଡିକାଲ କଲେଜରେ ପରିଣତ କରାଯାଇଥିଲା।  ହେଲେ ମେଡିକାଲ କଲେଜ ହେବା ଦିନଠାରୁ ହିଁ ସମସ୍ୟା ଏହାର ଯେମିତି ପିଛା ଛାଡୁନି। କେତେବେଳେ ମେଡିକାଲ କଲେଜ ପରିସରରରେ ଥିବା ଡ୍ରେନରେ ଗର୍ଭବତୀ ମହିଳାଙ୍କ ପ୍ରସବ ତ ଆଉ କେତେବେଳେ ଅକ୍ସିଜେନ ଅଭାବ ଯୋଗୁଁ ରୋଗୀଙ୍କୁ ଘରୋଇ ମେଡିକାଲ ସ୍ଥାନାନ୍ତାର। ଏମେତିକି ଚିକିତ୍ସା ଅବହେଳାକୁ ନେଇ ଷ୍ଟାଫ ନର୍ସଙ୍କୁ ମାଡ। ଏହାରି ଭିତରେ ମିଡିକାଲ କଲେଜକୁ ଏକ ବର୍ଷ ପୂରିବାକୁ ଯାଉଥିବାବେଳେ ଏବେ ସମସ୍ୟା ଦେଖାଦେଇଛି ଦୈତ୍ୟ ଶାସନକୁ ନେଇ। ଡାକ୍ତରଖାନାର ପରିଚାଳନା ଦାୟିତ୍ୱ ଉଭୟ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଓ ମେଡିକାଲ ଅଧିକ୍ଷକଙ୍କୁ ଦିଆଯାଇଥିବାରୁ ସମସ୍ୟା ଉପୁଜିଲେ ରୋଗୀ କାହାକୁ ଅଭିଯୋଗ କରିବେ ସେନେଇ ଦ୍ୱନ୍ଦ୍ୱ ସୃଷ୍ଟି ହୋଇଛି।

ନିୟମ ଅନୁସାରେ ଲେଟର ଅଫ୍ ପରିମିସନ ମିଳିବା ପରେ  ଜିଲ୍ଲା ମୁଖ୍ୟ ଚିକିତ୍ସାଳୟର ଲକ୍, ଷ୍ଟକ ଓ ବେଡ୍‌ ମେଡିକାଲ କଲେଜ ଅଧିନକୁ ଆସିବା କଥା। ତାହା ବର୍ତ୍ତମାନ ସୁଦ୍ଧା ଆସିନାହିଁ।  ନନ୍ ଟିଚିଂ, ପାରାମେଡିକାଲ ତୃତୀୟ ଓ ଚତୁର୍ଥ ଶ୍ରେଣୀ କର୍ମଚାରୀ ମେଡିକାଲ କଲେଜ କର୍ତ୍ତୃପକ୍ଷଙ୍କ ଅଧିନରେ ରହିବା କଥା ହେଲେ ତାହା ହୋଇପାରିନି। ତେଣୁ ଜିଲ୍ଲା ମୁଖ୍ୟ ଚିକିତ୍ସାଳୟ ଅଧିନରେ ଥିବା ସମସ୍ତ ଡାକ୍ତର, ଷ୍ଟାଫ୍ ନର୍ସଙ୍କ ସମେତ ହସ୍ପିଟାଲ ମ୍ୟାନେଜରଙ୍କ ଅଫିସ ସଂପୂର୍ଣ୍ଣ ଭାବେ ମେଡିକାଲ କଲେଜ ଅଧିନରେ କାମ କରିବାକୁ ନିର୍ଦ୍ଦେଶନାମା ଜାରି କରିବାକୁ ମେଡିକାଲ କଲେଜ ତରଫରୁ ନିବେଦନ କରାଯାଇଛି।

ଅନ୍ୟପକ୍ଷରେ ଖୁବଶୀଘ୍ର ଜିଲ୍ଲା ମୁଖ୍ୟ ଚିକିତ୍ସାଳୟ ମେଡିକାଲ କଲେଜରୁ ଅଲଗା ହୋଇ ଜୟପୁର ସ୍ଥାନାନ୍ତର ହୋଇଯିବ ବୋଲି ଡିନ୍ ପ୍ରଫେସର କୃଷ୍ଣଚନ୍ଦ୍ର ବିଶ୍ୱାଳ କହିଛନ୍ତି ।

Previous ArticleNext Article

Send this to a friend