ମକର ସଂକ୍ରାନ୍ତିର ଧୂମ୍: ଘରେ ଘରେ ବାସିଲା ମକର ଚାଉଳ, ଆକାଶରେ ଉଡିଲା ହାଇଟେକ୍ ଗୁଡ଼ି

ଭୁବନେଶ୍ୱର: ଆଜି ପବିତ୍ର ମକର ସଂକ୍ରାନ୍ତି । ଏହି ପର୍ବକୁ ନେଇ ଉତ୍ସବମୁଖର ହୋଇପଡିଥିଲା ସାରା ଦେଶ। ଓଡିଆ ଘରେ ମକର ଚାଉଳ ସାଙ୍ଗକୁ ପିଠା ପଣାର ମହକ ଅଜି ବେସ୍‌ ଜମିଛି। ଦେବାଦେବୀଙ୍କୁ ଅର୍ପଣ ପରେ ମକର ଚାଉଳ ପାଇଛନ୍ତି ଶ୍ରଦ୍ଧାଳୁ । ଶ୍ରୀକ୍ଷେତ୍ର ପୁରୀରେ ମଧ୍ୟ ଶ୍ରୀଜଗନ୍ନାଥ ମହାପ୍ରଭୁଙ୍କର ସ୍ୱତନ୍ତ୍ର ନୀତି ପାଳିତ ହୋଇଛି। ଶ୍ରୀ ଜୀଉଙ୍କୁ ମକରଚୌରାସି ବେଶ କରାଯାଇଥିବା ବେଳେ ଶ୍ରୀମନ୍ଦିର ଅଁଳା ବେଢାରେ ଗେରୁ ପ୍ରଲେପ ଦିଆଯାଇଛି। ସମ୍ବଲପୁରର ଅଧିଷ୍ଠାତ୍ରୀ ଦେବୀ ମାଆ ସମଲେଇଙ୍କ ପୀଠରେ ଭକ୍ତଙ୍କ ସମାଗମ ଦେଖିବାକୁ ମିଳିଥିଲା । ସେହିପରି ଖୋର୍ଦ୍ଧା ଅଟ୍ରି ଉଷ୍ଣପ୍ରସବଣ ପରିସରରେ ମାନସିକଧାରୀଙ୍କ ଗହଳି ଲଗିଥିଲା।  ବାରିପଦା ଜଗନ୍ନାଥ ମନ୍ଦିରରେ ଶହ ଶହ ଭକ୍ତ ଜଗନ୍ନାଥଙ୍କୁ ଦର୍ଶନ କରି ମକର ଚାଉଳ ପ୍ରସାଦ ପାଇଛନ୍ତି।

ଆଜିଠାରୁ ସୂର୍ଯ୍ୟଙ୍କ ଉତ୍ତରାୟଣ ଗତି ଆରମ୍ଭ ହେଉଥିବାରୁ ସୂର୍ଯ୍ୟଙ୍କ ପୂଜାର୍ଚ୍ଚନା ସହ ମନ୍ଦିରରେ ସକାଳୁ ସକାଳୁ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଥିଲା।

ମକର ସଂକ୍ରାନ୍ତି ଅବସରରେ ରାଜଧାନୀରେ ଆଜିଠାରୁ ଦେଖିବାକୁ ମିଳିଛି ହାଇଟେକ୍ ଗୁଡି ଉଡା ପର୍ବ। ମକର ସଂକ୍ରାନ୍ତିରେ ଆକାଶରେ ରଙ୍ଗ ବେରଙ୍ଗର ଗୁଡିରେ ଭରି ଯାଇଥିଲା। ଏରୋନଟିକ୍ସ  ଛାତ୍ର ଶୁଭମ୍‌ ତିଆରି କରିଥିବା ଏକ ହାଇଟେକ୍ ଗୁଡି ଉପରେ ଥିଲା ଦେଖଣାହାରୀଙ୍କ ନଜର । ସୂତା ବଦଳରେ ବ୍ୟାଟେରୀ ଓ କିଛି ଇଲୋକଟ୍ରନିକ୍ସ ସଂରଞ୍ଜାମ ରାଜଧାନୀର ନୀଳ ଆକାଶରେ ଉଡିଥିଲା ହାଇଟେକ୍‌ ଗୁଡି । ସେପଟେ ମକର ସଂକ୍ରାନ୍ତି ଅବସରରେ କଟକ  ଆକାଶରେ ଛାଇ ଯାଇଥିଲା ରଙ୍ଗ ବେରଙ୍ଗର ଗୁଡି । କୋଠଯୋଡି ନଦୀ ପଠାରେ ବହୁ ସଂଖ୍ୟାରେ ଲୋକ ଗୁଡି ଉଡାଇଥିଲେ ।

Previous ArticleNext Article

Send this to a friend