ଗାଁକୁ ରାସ୍ତା ନାହିଁ:  ଖଚର ପାଲଟିଛି ସାହାରା

ମାଲକାନଗିରି(ଜିତେନ୍ଦ୍ରେ ବେଉରା/ରତ୍ନାକର ପ୍ରଧାନ): ଗାଁର ଉନ୍ନତି ପାଇଁ ସରକାର ଅନେକ ଯୋଜନା କରୁଛନ୍ତି। ଏହାସହ କୋଟି କୋଟି ଟଙ୍କା ମଧ୍ୟ ଖର୍ଚ୍ଚ କରୁଛନ୍ତି। ହେଲେ ନାଲିଫିତା ତଳେ ଚାପି ହୋଇ ରହିଯାଉଛି ଗାଁର ବିକାଶ। ଆମ ରାଜ୍ୟରେ ଏମିତି ଏକ ଅଞ୍ଚଳ ରହିଛି ଯାହାର ବାସ୍ତବ ଚିତ୍ର ଦେଖିଲେ ଆଶ୍ଚର୍ଯ୍ୟ ହୋଇଯିବେ। କାରଣ ଏ ଅଞ୍ଚଳର କୌଣସି ଗାଁକୁ ରାସ୍ତା ଖଣ୍ଡେ ନାହିଁ। ଫଳରେ ବର୍ଷ ବର୍ଷ ଧରି ଖଚର ସାଜିଛି  ଲୋକଙ୍କ ସାହାରା। ପିଡିଏସ୍‌ ଚାଉଳ ହେଉ, କି ଅନ୍ୟାନ୍ୟ ଅତ୍ୟାବଶକ କାମ, ଏଠି ଖଚର ହିଁ ଏକ ମାତ୍ର ମାଧ୍ୟମ। ମାଓ ଅଧ୍ୟୁଷିତ ମାଲକାନଗିରି ଜିଲ୍ଲାରେ ଏଭଳି ଦୁଇଟି ପଞ୍ଚାୟତ ରହିଛି ଯେଉଁଠି ଲୋକଙ୍କ ଯାତାୟତର ମାଧ୍ୟମ କେବଳ ଖଚର।

ଜିଲ୍ଲାର ରାଲଗେଡ଼ା ଓ ଧୂଳିପୁଟ ପଞ୍ଚାୟତରେ ୬୦ଟି ଗାଁର ୭ ହଜାର ଲୋକ ବସବାସ କରନ୍ତି। ତେବେ ଏହି ଦୁଇ ପଞ୍ଚାୟତରେ ଭଲ ରାସ୍ତାଟିଏ ନଥିବାରୁ ସ୍ଥାନୀୟ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥାନ୍ତି। ଏମିତିକି ନିଜର ଦୈନନ୍ଦିନ କାର୍ଯ୍ୟ ପାଇଁ ବାହାରକୁ ଯିବାକୁ ପଡ଼ିଲେ ଖଚର  ହିଁ ଏକମାତ୍ର ଭରସା। ଭଲ ରାସ୍ତା ଖଣ୍ଡେ ନଥିବାରୁ ୪୦ରୁ ୫୦ କିଲୋମିଟର ଦୂର ଖଚର ସାହାଯ୍ୟରେ ଆସି ପିଡିଏସ୍ ସାମଗ୍ରୀ ନିଅନ୍ତି ଲୋକେ। କିଏ ନିଜର ଖଚର ଧରି ଆସନ୍ତି ତ ଆଉ କିଏ ୩ ଶହରୁ ୫ଶହ ଟଙ୍କା ଭଡ଼ା ଦେଇ ଖଚର ଉପରେ ଜିନିଷପତ୍ର ଲଦି ଯାଆନ୍ତି। ଭାଗ୍ୟକୁ ଆଦରି ବର୍ଷ ବର୍ଷ ଧରି ଏହି ଦୁଇ ପଞ୍ଚାୟତବାସୀ ଜୀବନ ବିତାଉଛନ୍ତି। ପ୍ରଶାସନ ସବୁ ଜାଣି ଅଜଣା ପରି ଚୁପ ହୋଇ ବସି ରହିଥିବା ଅଭିଯୋଗ ହୋଇଛି। ବର୍ଷା ଦିନ ଆସିଲେ ଏହି ଦୁଇ ପଞ୍ଚାୟତ ବାହ୍ୟ ଜଗତ ଠାରୁ ବିଚ୍ଛିନ୍ନ ହୋଇ ରହେ।

ଜଣେ ସ୍ଥାନୀୟ ବାସିନ୍ଦା କହିଛନ୍ତି,“ଗାଁକୁ ଭଲ ରାସ୍ତା ନାହିଁ। ଯାହା ଅଛି ସେଗୁଡ଼ିକ ଭାଙ୍ଗିରୁଜି ଗଲାଣି। ରାସ୍ତା କରିବା ପାଇଁ ଆଜିକୁ ୫ରୁ ୬ ବର୍ଷ ହେଲାଣି  ଜିଲ୍ଲା ପ୍ରଶାସନକୁ ଜଣାଇଥିଲେ ମଧ୍ୟ ଗାଁକୁ ରାସ୍ତା ତିଆରି ହୋଇପାରୁନି।”

ଏନେଇ ମାଲକାନଗିରି ଉପଜିଲ୍ଲାପାଳ ଲିଙ୍ଗରାଜ ପଣ୍ଡା କହିଛନ୍ତି,“ଗୁରୁପ୍ରିୟା ସେତୁ କାମ ସରିବା ପରେ ବ୍ଲକ୍‌ ସ୍ତରରୁ ସମସ୍ତ କାମ ଆରମ୍ଭ ହେବ।”

Previous ArticleNext Article

Leave a Reply

Send this to a friend