ମୁଁ ଡାଇବେଟିସ୍‌ ପେସେଣ୍ଟ, ରାସ୍ତା କଡ଼ରେ ବି ଟଏଲେଟ୍ ନ ଥିଲା, ତେଣୁ…

Surya Patra

ଭୁବନେଶ୍ୱର,(ଓଡ଼ିଶା ରିପୋର୍ଟର):ରାସ୍ତାକଡ଼ରେ ଯୋଗାଣ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ପରିଶ୍ରା କରୁଥିବା ନେଇ ଏକ ଫଟୋ ସୋସିଆଲ ମିଡିଆରେ ଖୁବ୍‌ ଭାଇରାଲ ହୋଇଥିଲା। ମୋଦି ସରକାର ସ୍ୱଚ୍ଛ ଭାରତ ମିଶନ ଉପରେ ଗୁରୁତ୍ୱ ଦେଉଥିବା ବେଳେ ମନ୍ତ୍ରୀ ଖୋଲାସ୍ଥାନରେ ପରିଶ୍ରା କରୁଥିବା ସମ୍ପର୍କରେ ଖୁବ୍‌ ଚର୍ଚ୍ଚା ହୋଇଥିଲା। ହେଲେ ଏ ବାବଦରେ ଗତକାଲି ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର ନିଜର ପ୍ରତିକ୍ରିୟା ରଖିଛନ୍ତି। କହିଛନ୍ତି “ମୁଁ ଜଣେ ଡାଇବେଟିସ୍‌ ରୋଗୀ। ବିଗତ ୩୦ ବର୍ଷ ହେଲା ମୁଁ ଏହି ରୋଗରେ ପୀଡ଼ିତ।  ବ୍ରହ୍ମପୁରରୁ ଭୁବନେଶ୍ୱର ଗଲାବେଳେ ବାଟରେ କେଉଁଠି ପରିଶ୍ରାଗାର ନାହିଁ। ସାଧାରଣତଃ ବାଟରେ ପରିଶ୍ରା ଲାଗିଲେ ଆପଣମାନେ ଯେମିତି ଜଙ୍ଗଲକୁ ଯାଆନ୍ତି ମୁଁ ସେମିତି ଜଙ୍ଗଲ ଭିତରକୁ ମୁଁ ଯାଇଥିଲି। କିନ୍ତୁ ଆଜିକାଲି ହେଉଛି ମୋବାଇଲର ଜମାନା। ତେଣୁ ପରିଶ୍ରା ସାରି ଫେରିଲା ବେଳେ କିଏ କେମିତି ଫଟୋ ଉଠାଇ ଦେଇଥିବ ବୋଲି ସେ କହିଛନ୍ତି।  ପ୍ରତିକ୍ରିୟା ଦେବା ପରେ ମନ୍ତ୍ରୀ ଟିକେ ମୁରୁକି ହସିଥିଲେ। କିନ୍ତୁ ଯଦି ଓଡ଼ିଶା ପ୍ରସଙ୍ଗକୁ  ଏହାକୁ ଗୁରୁତର ଭାବେ ଅନୁଧ୍ୟାନ କରାଯାଏ ତେବେ ସାମ୍ନାକୁ କିଛି ସଂଘାତିକ୍‌ ଚିତ୍ର ଆସୁଛି। ମନ୍ତ୍ରୀ କହିଛନ୍ତି ଯେ, ଭୁବନେଶ୍ୱରରୁ- ବ୍ରହ୍ମପୁର ମଧ୍ୟରେ ଆଦୌ ଟଏଲେଟ୍ ନାହିଁ।

ଅନ୍ୟପଟେ ଦେଖିଲେ ଏବେ ବି ରାଜ୍ୟରେ ୫୦ ଲକ୍ଷ ପରିବାର ଖୋଲାସ୍ଥାନରେ ମଳତ୍ୟାଗ କରୁଛନ୍ତି। କାରଣ ସମସ୍ତଙ୍କ ପାଖରେ ସ୍ୱଚ୍ଛ ଭାରତ ମିଶନ ଅଧୀନରେ ପାଇଖାନା ପହଞ୍ଚି ପାରି ନାହିଁ। ଆଉ କେତେକ କ୍ଷେତ୍ରରେ ପାଇଖାନା ସମ୍ପୂର୍ଣ୍ଣ ତିଆରି ହୋଇ ନ ପାରି ଅଧାପନ୍ତରିଆ ଅବସ୍ଥାରେ ପଡ଼ି ରହିଛି। ଗତ କିଛିମାସ ତଳେ କେନ୍ଦ୍ରର ପାନୀୟଜଳ ଓ ପରିମଳ ରାଷ୍ଟ୍ର ମନ୍ତ୍ରୀ ରମେଶ ଜିଗାଜିନାଗି ରାଜ୍ୟ ସଭାରେ ଏହି ତଥ୍ୟ ଦେଇଥିଲେ। ସେ କହିଥିଲେ ଯେ, ଓଡ଼ିଶାରେ ୪୯,୬୦,୦୦ ପରିବାର ନିକଟରେ ପାଇଖାନା ନାହିଁ। ହେଲେ ଓଡ଼ିଶା ତୁଳନାରେ ଗୁଜରାଟ, ହିମାଚଳପ୍ରଦେଶ , ହରିୟାଣା, ଉତ୍ତରପ୍ରଦେଶ, ଉତ୍ତରାଖଣ୍ଡ,  ସିକିମ ଏବଂ  କେରଳ ରାଜ୍ୟ ଗୁଡ଼ିକରେ ସ୍ୱଚ୍ଛଭାରତ ମିଶନ ଶହେ ପ୍ରତିଶତ ସଫଳ ହୋଇଥିବା କହିଥିଲେ।

ଅବଶ୍ୟ ସେତେବେଳେ ବିଜେଡି ପକ୍ଷରୁ ଏହାର ଜବାବ ରଖାଯାଇଥିଲା। ବିଜେଡିର କହିବା ଅନୁଯାୟୀ ଆବଶ୍ୟକ ଅନୁଦାନ ଦେବାରେ କେନ୍ଦ୍ର ଅବହେଳା କରୁଛି। ଯଦି କେନ୍ଦ୍ର ଅବହେଳା କରୁଥିବା ନେଇ ବିଜେଡି କଥା ସତ ହୋଇଥାଏ ତେବେ ଓଡ଼ିଶାରେ ସ୍ୱଚ୍ଛ ଭାରତ ମିଶନ ସଫଳତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାରଣ ଯେଉଁଠି ପ୍ରତିପରିବାର ପାଖରେ ପାଇଖାନା ପହଞ୍ଚି ପାରୁନି ସେଠି ମନ୍ତ୍ରୀଙ୍କ ହିସାବରେ ରାସ୍ତା ପାଖରେ ପରିଶ୍ରାଗାର କେମିତି ତିଆରି ହେବ?  ପୂର୍ବରୁ ବିଜେପିର ବରିଷ୍ଠ ନେତା ତଥା କେନ୍ଦ୍ର କୃଷି ମନ୍ତ୍ରୀ ରାଧାମୋହନ ସିଂ ସର୍ବସାଧାରଣ ସ୍ଥାନରେ ପରିଶ୍ରା କରୁଥିବାର ଦୃଶ୍ୟ କ୍ୟାମେରାରେ ଧରାପଡ଼ିଥିଲା। ସେତେବେଳେ ଏହାକୁ ନେଇ ଖୁବ୍‌ ଚର୍ଚ୍ଚା ହୋଇଥିଲା।

Previous ArticleNext Article

Send this to a friend