ସ୍ୱାଧୀନତାର ୭୦ ବର୍ଷ ପରେ ବି ବିଜୁଳି ଆଲୁଅ ଦେଖିନଥିବା ଏକ ଅନ୍ଧାରୀ ଗାଁର କାହାଣୀ…

ବାରିପଦା: ଅନ୍ଧାର ଇଲାକାର ଗାଁ ମୟୂରଭଞ୍ଜର ଜଉଦା। ସ୍ୱାଧୀନତାର ୭୦ ବର୍ଷ ପରେ ମଧ୍ୟ ଅନ୍ଧକାରରୁ ମୁକୁଳି ପାରିନି ଏହି ଗାଁ। ଡିବିରି ଆଲୁଅ ଓ ଲଣ୍ଠନ ହିଁ ଏମାନଙ୍କ ସାହା ଭରସା। ବର୍ଷେ ତଳେ ରାଜୀବ ଜ୍ୟୋତି ଯୋଜନାରେ ଗାଁ ଲୋକଙ୍କୁ ବିଦ୍ୟୁତ ସେବା ଯୋଗାଇବା ପାଇଁ ସରକାର ପ୍ରତିଶ୍ରୁତି ଦେଇଥିଲେ। ହେଲେ ଏପର୍ଯ୍ୟନ୍ତ ଗାଁରେ ବିଦ୍ୟୁତ ସେବା ପହଞ୍ଚି ପାରିନି। ସରକାରଙ୍କ ପ୍ରତିଶ୍ରୁତି କେବଳ ପ୍ରତିଶ୍ରୁତିରେ ରହିଯାଇଛି।

ଜଉଦା ଗାଁରେ ୨୦୦ରୁ ଅଧିକ ଲୋକେ ବାସ କରନ୍ତି। ଏମାନେ ସାଧାରଣତଃ ଆଦିବାସୀ ସମ୍ପ୍ରଦାୟର। ମାତ୍ର ଏହି ଗାଁକୁ ଆଜିପର୍ଯ୍ୟନ୍ତ ବିଦ୍ୟୁତ ସେବା ପହଞ୍ଚି ପାରିନାହିଁ। ଏନେଇ ଅଭିଯୋଗ ହେବା ପରେ ଗାଁକୁ ବିଦ୍ୟୁତ ଯୋଗାଇ ଦିଆଯିବ ବୋଲି ସରକାର ପ୍ରତିଶ୍ରୁତି ଦେଇଥିଲେ। ଏପରିକି ଗାଁ ଲୋକଙ୍କୁ ବିଦ୍ୟୁତ ସେବା ଯୋଗାଇବା ପାଇଁ ଖୁଣ୍ଟ ପୋତା ଯାଇଛି। ଘରକୁ ତା’ର ସଂଯୋଗ ହୋଇଛି। କାନ୍ଥରେ ମିଟର ଓ ସୁଇଜ୍‌ ମଧ୍ୟ ଲାଗିଛି। ବର୍ଷେ ତଳେ ଏ ସବୁ ବ୍ୟବସ୍ଥା ସରିଛି। ତଥାପି ଘର ଭିତର ଅନ୍ଧାର। ଯାହାଦ୍ୱାରା ଗାଁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି। ଏନେଇ ବାରମ୍ୱାର ପ୍ରଶାସନ ପାଖରେ ଅଭିଯୋଗ କରିଥିଲେ। ମାତ୍ର ପ୍ରଶାସନିକ ଅଧିକାରୀମାନେ ଏଥିପ୍ରତି ନଜର ଦେଉନଥିବା ଗାଁ ଲୋକେ ଅଭିଯୋଗ କରିଛନ୍ତି।

କିଏ କଣ କୁହନ୍ତି

ଗ୍ରାମବାସୀ ପ୍ରତାପ ମହାପାତ୍ର କହିଛନ୍ତି-“ନିର୍ବାଚନ ପୂର୍ବରୁ ବିଦ୍ୟୁତ ସେବା ଦିଆଯିବ ବୋଲି କହି ଖୁଣ୍ଟି ପୋତି ଦେଇ ଚାଲିଗଲେ। ଆଉ ସେମାନଙ୍କ ଦେଖାନାହିଁ। ଅଭିଯୋଗ କଲେ ମଧ୍ୟ କେହି ଶୁଣୁ ନାହାନ୍ତି।”

ସବିତା ଖିଲାର କହିଛନ୍ତି-”ବିଜୁଳି ନଥିବାରୁ ପିଲାମାନେ ପାଠ ପଢ଼ିବା ପାଇଁ ବହୁ ଅସୁବିଧାରେ ପଡ଼ୁଛନ୍ତି। ବାଧ୍ୟ ହୋଇ ଡିବିରି ଆଲୁଅରେ ପାଠ ପଢ଼ୁଛନ୍ତି। ଆମ କଥା କେହି ଶୁଣୁ ନାହାନ୍ତି।”

ଗ୍ରାମବାସୀ ସୁଲୋଚନା ଖିଲାର କହିଛନ୍ତି-“ବିଦ୍ୟୁତ ବିଭାଗ କର୍ମଚାରୀମାନେ ଆସି ଖୁଣ୍ଟ ପୋତି ତାର ଟାଣିଦେଲେ। ହେଲେ ଟ୍ରାନ୍ସଫର୍ମରକୁ ବିଦ୍ୟୁତ  ସଂଯୋଗ ଦେଲେ ନାହିଁ। ଯାହାଦ୍ୱାରା ଆମେ ଅନ୍ଧକାରରେ ରହିଛୁ।”

ନେସ୍କୋ ନିର୍ବାହୀ ଯନ୍ତ୍ରୀ ଦୀପକ ଦାସ କହିଛନ୍ତି-“ଖୁବ୍‌ଶୀଘ୍ର ବିଦ୍ୟୁତ ସଂଯୋଗ ଦେବା ପାଇଁ ବ୍ୟବସ୍ଥା କରିବୁ।’

Previous ArticleNext Article

1 Comment

Send this to a friend