ନୋଟବନ୍ଦୀକୁ ପୂରିଲା ବର୍ଷେ: ବିରୋଧୀ ପାଳିଲେ କଳାଦିବସ, ବିଜେପି ବଖାଣିଲା ସଫଳତା

note-bandi

ଭୁବନେଶ୍ୱର (ଓଡ଼ିଶା ରିପୋର୍ଟର): ବିମୁଦ୍ରାକରଣର ବର୍ଷେ ପରେ ରାଜନୈତିକ ଘମାସାନ` ଗୋଟିଏ ପଟେ ବିଜେପି, ଅନ୍ୟ ପଟେ କଂଗ୍ରେସ ଓ ବାମଦଳ ସହ ୧୮ ଟି ଦଳ। କଳାଦିବସର ପ୍ରତିବାଦକୁ ଆଜି ଟକ୍କର ଦେଇଥିଲା କଳାଟଙ୍କା ନିରୋଧ ଦିବସର ଉଲ୍ଲାସ। ଦିଲ୍ଲୀରୁ ପଲ୍ଲୀଯାଏ ବିମୁଦ୍ରାକରଣର ସାଇଡ୍ ଇଫେକ୍ଟକୁ ନେଇ ଲଢିଥିଲେ ଦେଶର ଦୁଇ ପ୍ରମୁଖ ଜାତୀୟ ଦଳର ନେତା ଓ କର୍ମୀ। ବିଜେପି ସଫଳତାର ଶ୍ରେୟ ମୋଦିଙ୍କୁ ଦେଇ କ୍ୟାମ୍ପେନ କରିଥିଲା ଓ କଂଗ୍ରେସ କଳାପତକା ଧରି  ରାସ୍ତା ଘାଟ ଗଳି କନ୍ଦିରେ ଗର୍ଜିଥିଲା।

ସକାଳୁ ସନ୍ଧ୍ୟା ଯାଏଁ ଥିଲା ରାସ୍ତାରେ ପ୍ରତିବାଦ ଓ ଉତ୍ସବର ପରିବେଶ। ସଫଳତାର ଶ୍ରେୟ ନେଇ ପ୍ରଚାର କରୁଥିଲା ବିଜେପି। ଆଉ ବିଜେପିକୁ ଟକ୍କର ଦେବା ପାଇଁ ରାସ୍ତାକୁ ଓହ୍ଲାଇଛି କଂଗ୍ରେସ। ରାଜଧାନୀ ଭୁବନେଶ୍ୱରରେ କଂଗ୍ରେସ ଭବନରୁ ଶୋଭାଯାତ୍ରାରେ ବାହାରୁଛନ୍ତି କଂଗ୍ରେସେର ହେଭିୱେଟ୍‌ ହାତରେ ଧରିଛନ୍ତି କଳାପତକା ଓ ବାନ୍ଧିଛନ୍ତି କଳାପଟି। ମୋଦିଙ୍କ ବିରୋଧରେ ଗର୍ଜନ କରି ନେତା ପହଁଞ୍ଚିଥିଲେ ଆରବିଆଇ ସମ୍ମୁଖରେ। ସେଠାରେ ହୋଇଥିଲା ପ୍ରତିବାଦ ସଭା। ଜଣକ ପରେ ଜଣେ ବିମୁଦ୍ରାକରଣର କୁପରିଣାମକୁ ନେଇ ମୋଦିଙ୍କ ଉପରେ ବର୍ଷିଲେ।

ସେହିପରି ପିଏମଜି ଛକରେ ତୃଣମୂଳ କଂଗ୍ରେସ ନେତା ବି ପାଟିରେ କଳାକପଡ଼ା ବାନ୍ଧି କଳାଦିବସ ପାଳିଥିଲେ। ଆମ ଆଦମୀ ପାର୍ଟି ମୋଦିଙ୍କ ବିରୋଧରେ ମୋର୍ଚ୍ଚା ବାହାର କରି ଧୋକାଦିବସ ପାଳନ କରିଥିଲା।

ବିରୋଧୀ ଗର୍ଜନ କରୁଥିବା ବେଳେ ବିମୁଦ୍ରାକରଣ ଲାଭର ହିସାବ ରଖି ଦସ୍ତଖତ ଅଭିଯାନ କରୁଥିଲେ ରାଜ୍ୟ ବିଜେପି ନେତା। ସାମ୍ବାଦିକ ସମ୍ମିଳନୀ କରି ଦଳ ବିମୁଦ୍ରାରଣର ସଫଳତା କଥା ବଖାଣିଥିଲା। ବୁଦ୍ଧିଜୀବୀଙ୍କୁ ଡାକି ଅପରାହ୍ନରେ ପୁଣି ସଫଳତାର ଗାଥା ବାଣ୍ଟିଥିଲା। ବିଜେଡି କିନ୍ତୁ ଏସବୁରୁ ନିଜକୁ ଦୂରରେ ରଖି କେବଳ କଥା କଥାରେ ମୋଦିଙ୍କୁ ଟାର୍ଗେଟ କରିଥିଲା।

ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ୱିଟ୍‌ କରି ବିମୁଦ୍ରାକରଣକୁ ପ୍ରଶଂସା କରିଥିଲେ। ଏହା ୧୨୫ କୋଟି ଭାରତୀୟଙ୍କ ଲଢେଇର ବିଜୟ ବୋଲି ସେ ଏଥିରେ ଉଲ୍ଲେଖ କରିଥିଲେ। ଦେଶର ବିଭିନ୍ନ ସ୍ଥାନରେ ବାଣ ଫୁଟାଇ ବିଜେପି ନେତା ଉତ୍ସବ ମନାଇ ଐତିହାସିକ ବିମୁଦ୍ରାକରଣକୁ ନିଷ୍ପତ୍ତିର ସଫଳତା ଦୋହରାଇଥିଲେ। କଂଗ୍ରେସ ବି ଦେଶର ବିଭିନ୍ନ ସ୍ଥାନରେ ବିକ୍ଷୋଭ କରି କଳାଦିବସ ପାଳନ କରିଥିଲା। ତୃଣମୂଳ କଂଗ୍ରେସ ସହ ୧୮ ଟି ଦଳ ବିମୁଦ୍ରାକରଣ ବିରୋଧରେ ଭିନ୍ନ ଭିନ୍ନ ଢଙ୍ଗରେ ପ୍ରତିବାଦ କରିଥିଲେ।

Previous ArticleNext Article

Send this to a friend