ଜାଲ୍‌ ଟିଡିଆର ମାମଲା: ବଣ୍ଟିଙ୍କୁ ଟ୍ରାଞ୍ଜିଟ୍‌ ରିମାଣ୍ଡରେ ଆଣିଲା ନୂଆପଡ଼ା ପୋଲିସ୍‌

tdr

ନୂଆପଡ଼ା (ଓଡ଼ିଶା ରିପୋର୍ଟର): ଜାଲ୍ ଟିଡିଆରରେ କୋଟି କୋଟି ଟଙ୍କା ହଡ଼ପ ଘଟଣାରେ ଠିକାଦାର ବଣ୍ଟି ଅଗ୍ରୱାଲଙ୍କୁ ଓଡିଶା ଆଣିଛି ନୂଆପଡା ପୋଲିସ। ବଣ୍ଟିଙ୍କୁ କୋର୍ଟରେ ହାଜର ପରେ ରିମାଣ୍ଡରେ ନେବ ପୋଲିସ। ନୂଆପଡ଼ା ପୋଲିସ ତାଙ୍କୁ ହରିୟାଣାରୁ ଟ୍ରାଞ୍ଜିଟ ରିମାଣ୍ଡରେ ଆଣିଥିବା ଏସ୍‌ପି ପି.ଏସ୍, ପୁରଷୋତ୍ତମ ଦାସ ସୂଚନା ଦେଇଛନ୍ତି।

ଖୋଲିବ ଟିଡିଆର କେଳେଙ୍କାରୀର ମାଷ୍ଟର ମାଇଣ୍ଡ ବଣ୍ଟି ଅଗ୍ରଓ୍ୱାଲ୍‌ଙ୍କ ଗୁମର। ବଣ୍ଟି, ତାଙ୍କ ପତ୍ନୀ ଓ ବାପାଙ୍କ ନାଁରେ ୫ଟି ଜିଲ୍ଲାରେ ୧୮ଟି ମାମଲା ରହିଛି। ଏମାନେ ସମସ୍ତେ ମିଶି ୨୫ କୋଟିରୁ ଅଧିକ ଟଙ୍କାର ଠକେଇ କରିଥିବା ନୂଆପଡ଼ା ଏସ୍‌ପି ସୂଚନା ଦେଇଛନ୍ତି। ବଲାଙ୍ଗିର ପୋଲିସ୍ ବି ବଣ୍ଟିଙ୍କୁ ରିମାଣ୍ଡରେ ନେବାକୁ ଯୋଜନା ରଖିଛି।

ଜାଲ୍ ଟିଡିଆର୍ ଦେଇ ଟେଣ୍ଡର ହାତେଇବା ମାମଲାରେ ଗିରଫ ଏହି ୩ଜଣ ଅଭିଯୁକ୍ତଙ୍କ ଗୁମର ଖୋଲିବାକୁ ଚେଷ୍ଟା କରୁଛି ପୋଲିସ। ନୂଆପଡ଼ା ଏସ୍‌ପି କହିଛନ୍ତି- “ଏମାନଙ୍କ ନାଁରେ ୨୫ କୋଟି ୩୬ ଲକ୍ଷ ଟଙ୍କାର ଟିଡିଆର୍ ଠକେଇ ଅଭିଯୋଗ ରହିଛି। ଏମାନଙ୍କ ବିରୋଧରେ ୫ଟି ଜିଲ୍ଲା ନୂଆପଡ଼ା, କଳାହାଣ୍ଡି, ବଲାଙ୍ଗିର, ବରଗଡ଼ ଓ ନବରଙ୍ଗପୁରରେ ରୁଜୁ ହୋଇଛି ମୋଟ ୧୮ଟି ମାମଲା। ସେଥିରୁ କେବଳ ବଣ୍ଟିଙ୍କ ନାଁରେ ୧୦ଟି ମାମଲା ରହିଛି। ରାଜେନ୍ଦ୍ରଙ୍କ ନାଁରେ ୬ଟି ମାମଲା ଥିବା ବେଳେ ସବିତାଙ୍କ ବିରୋଧରେ ରହିଛି ୨ଟି ମାମଲା ରହିଛି।”

ବଣ୍ଟିଙ୍କୁ ରିମାଣ୍ଡରେ ନେବା ପାଇଁ ଯୋଜନା କରିଛି ବଲାଙ୍ଗିର ପୋଲିସ। ଜାଲ୍ ଟିଡିଆର ଦେଇ ବଲାଙ୍ଗିର ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ସର୍କଲ ଅର୍ଥାତ୍ ବଲାଙ୍ଗିର, ଭବାନୀପାଟଣା, କଣ୍ଟାବାଞ୍ଜି ଓ ନୂଆପଡ଼ାରେ ପ୍ରାୟ ଶହେ କୋଟିରୁ ଅଧିକ ଟଙ୍କାର କାମ ହାତେଇଥିଲେ ଅଗ୍ରଓ୍ୱାଲ ବାପା-ପୁଅ। ଜାଲ୍ ଟିଡିଆର କଥା ପଦାକୁ ଆସିବା ପରେ ଅଧୀକ୍ଷଣ ଯନ୍ତ୍ରୀ ପୋଲିସରେ ଏତଲା କରି ନଥିଲେ ବରଂ ବଣ୍ଟିଙ୍କୁ ଚିଠି ଲେଖି ଟିଡିଆର ବାବଦ ଅର୍ଥ ଜମା କରିଦେବାକୁ କହିଥିଲେ। ବଣ୍ଟିଙ୍କ ପ୍ରତି ସରକାରୀ ବାବୁଙ୍କ ଏଭଳି ଅନୁଗ୍ରହକୁ ନେଇ ସନ୍ଦେହ ରହିଥିବାରୁ ଅଗ୍ରଓ୍ୱାଲ ବାପା-ପୁଅଙ୍କ ସହ କିଛି ଅଧିକାରୀଙ୍କୁ ଏକାଠି ବସାଇ ପୋଲିସ ଜେରା କରିବାର ସମ୍ଭାବନା ରହିଛି।

ପୂର୍ତ୍ତ ବିଭାଗ ଓ ବ୍ୟାଙ୍କ ଅଧିକାରୀଙ୍କ ସଂପୃକ୍ତି ବିନା ଟିଡିଆର ଜାଲ୍ କରିବା ସମ୍ଭବ ନୁହେଁ ବୋଲି କୁହାଯାଉଛି। ଏବେ ବଣ୍ଟି ଗିରଫ ହୋଇଛନ୍ତି। ତେବେ ଏଥିରେ ଯଦି କେଉଁ ସରକାରୀ ଅଧିକାରୀ ସଂପୃକ୍ତ ଅଛନ୍ତି, ସେମାନଙ୍କ ବିରୁଦ୍ଧରେ ପୋଲିସ କେବେ ଓ କି ପ୍ରକାର କାର୍ଯ୍ୟାନୁଷ୍ଠାନ କରୁଛି ତା’ଉପରେ ସମସ୍ତଙ୍କ ନଜର ରହିଛି।

Previous ArticleNext Article

Send this to a friend