ଷଡ଼ଯନ୍ତ୍ରର ଚକ୍ରବ୍ୟୂହରେ ଅରଟେଲ୍ କମ୍ୟୁନିକେଶନ୍

ଭୁବନେଶ୍ୱର(ଓଡିଶା ରିପୋର୍ଟର):  କେବୁଲ ଓ ଇଣ୍ଟରନେଟ୍ ସେବା ଯୋଗାଉଥିବା ଅରଟେଲ୍ କମ୍ୟୁନିକେସନ୍ ବିରୋଧରେ ପୁଣି ଷଡ଼ଯନ୍ତ୍ର ଅଭିଯୋଗ । ସରକାର ଚାପ ପକାଇ ଅରଟେଲ୍‌ ଭୁବନେଶ୍ୱର ମୁଖ୍ୟାଳୟକୁ ବନ୍ଦ କରିବା ପାଇଁ ଚେଷ୍ଟା କରୁଥିବା ଅଭିଯୋଗ କରିଛନ୍ତି କମ୍ପାନୀ କର୍ତ୍ତୃପକ୍ଷ । ସୋନି ନେଟ୍ଓ୍ୱର୍କ ସହ ଚୁକ୍ତି ଖିଲାପ ଅଭିଯୋଗ ପରେ ଆଜି ଏକ ପୋଲିସ୍ ଟିମ୍ ଚନ୍ଦ୍ରଶେଖରପୁରସ୍ଥିତ ଅରଟେଲ୍ ମୁଖ୍ୟ କାର୍ଯ୍ୟାଳୟକୁ ଯାଇ ଯାଞ୍ଚ କରିଛି। ମିଥ୍ୟା ଅଭିଯୋଗ ଆଧାରରେ ପୋଲିସ୍ ଏଭଳି ପଦକ୍ଷେପ ନେଇଥିବା ଅରଟେଲ୍ ଅଭିଯୋଗ କରିଛି। ହେଲେ ପୋଲିସ୍ କିମ୍ବା ସୋନି ନେଟ୍ଓ୍ୱର୍କ କର୍ତ୍ତୃପକ୍ଷ ଏନେଇ ମୁହଁ ଖୋଲୁ ନ ଥିବା ସନ୍ଦେହ ସୃଷ୍ଟି କରିଛି।

ପୂର୍ବରୁ ପୂର୍ବରୁ ବ୍ରହ୍ମପୁରସ୍ଥିତ ଅରଟେଲ୍ ଅଫିସକୁ ବନ୍ଦ କରିବା ପାଇଁ ମଧ୍ୟ ଚକ୍ରାନ୍ତ ସାମ୍ନାକୁ ଆସିଥିଲା । ଗତ ଏପ୍ରିଲ ୨୬ ତାରିଖରେ ଟ୍ରେଡ୍ ଲାଇସେନ୍ସ ନବୀକରଣ କରାଯାଇ ନ ଥିବା ଓ ଅନ୍ୟ କିଛି କାରଣ ଦର୍ଶାଇ ସ୍ଥାନୀୟ ପ୍ରଶାସନ ପକ୍ଷରୁ ଅରଟେଲର ବ୍ରହ୍ମପୁରସ୍ଥିତ ୨ଟି ଯାକ ଅଫିସକୁ ସିଲ୍ କରାଯାଇଥିଲା । ଏପରିକି ହାଇକୋର୍ଟଙ୍କ ରହିତାଦେଶ ସତ୍ତ୍ୱେ ସାର୍ଟିଫାଏଡ୍ ନକଲ ପାଇ ନ ଥିବା ଆଳ ଦେଖାଇ ଦୀର୍ଘ ୨୩ ଦିନ ଯାଏ ଅଫିସର ସିଲ୍ ଖୋଲି ନ ଥିଲା ପ୍ରଶାସନ। ଏବେ ସଂସ୍ଥାର ମୁଖ୍ୟ କାର୍ଯ୍ୟାଳୟ ଉପରେ ଆଖି ପଡିଛି ବୋଲି ଚର୍ଚ୍ଚା ହେଉଛି।

ସୂଚନାଯୋଗ୍ୟ, ସୋନି ନେଟ୍ଓ୍ୱାର୍କ ସହିତ ଚୁକ୍ତି ଖିଲାପ ନେଇ ଗୁରୁବାର ଚନ୍ଦ୍ରଶେଖରପୁର ଥାନାରେ ଅଭିଯୋଗ ହୋଇଥିଲା। ମାମଲା ରୁଜୁ କରି ଆଜି ଅନୁସନ୍ଧାନ ଆଳରେ କମ୍ପାନୀ ମୁଖ୍ୟାଳୟରେ ଦିନ ତମାମ୍ କମିଶନରେଟ୍ ପୋଲିସ୍‌ ରେଡ୍ କରିଥିଲା। ସକାଳ ୧୦ଟାରୁ ଜଣେ ଏସିପି ଓ ଚନ୍ଦ୍ରଶେଖରପୁର ଆଇଆଇସିଙ୍କ ନେତୃତ୍ୱରେ ୭ ଜଣିଆ ଟିମ୍ ଅଫିସ୍ ଭିତରେ ପଶି କଣ୍ଟ୍ରୋଲ୍ରୁମ୍‌ରୁ ଆରମ୍ଭ କରି ଆଣ୍ଟିନା ପର୍ଯ୍ୟନ୍ତ ତନ୍ନତନ୍ନ କରି ଯାଞ୍ଚ କରିଥିଲେ। ପୋଲିସ୍ ଟିମ୍ ସହିତ ସୋନି ଟିଭିର ଜଣେ କର୍ମଚାରୀଙ୍କୁ ମଧ୍ୟ ଏଇ ତଥାକଥିତ ଅନୁସନ୍ଧାନ ବେଳେ ଉପସ୍ଥିତ ଥିବା ଦେଖିବାକୁ ମିଳିଥିଲା । ହେଲେ ବଡ଼ କଥା ହେଉଛି ନିର୍ଦ୍ଦିଷ୍ଟ କେଉଁ ଅଭିଯୋଗ ଆଧାରରେ ଏହି ଯାଞ୍ଚ ଚାଲିଛି ସେ ନେଇ ନା ପୋଲିସ୍ ମୁହଁ ଖୋଲୁଛି ନା ସୋନି ନେଟ୍ଓ୍ୱର୍କ କର୍ତ୍ତୃପକ୍ଷ ।

ମିଳିଥିବା ସୂଚନା ଅନୁସାରେ ଚୁକ୍ତି ଅବଧି ସରିଯାଇଥିଲା ବେଳେ ଅରଟେଲ୍ ଚୋରାରେ ସୋନି ଚ୍ୟାନେଲ୍ ପ୍ରସାରଣ କରୁଥିବା ନେଇ ସୋନି ନେଟ୍ଓ୍ୱର୍କ ପକ୍ଷରୁ ଚନ୍ଦ୍ରଶେଖର ଥାନାରେ ଅଭିଯୋଗ ହୋଇଛି । ଏହି ଅଭିଯୋଗକୁ ନେଇ ଅରଟେଲ୍ ବିରୋଧରେ ୪୨୦, ୩୪ ଆଇପିସି ଓ ୬୩, ୬୯ କପି ରାଇଟ୍ ଆକ୍ଟରେ ମାମଲା ରୁଜୁ କରିଛି ପୋଲିସ୍ । ତେବେ ଅରଟେଲ୍ କର୍ତ୍ତୃପକ୍ଷ କିନ୍ତୁ ଏଭଳି ଅଭିଯୋଗକୁ ସଂପୂର୍ଣ୍ଣ ଖଣ୍ଡନ କରି ଆସୁଛନ୍ତି । ସୋନି ନେଟ୍ଓ୍ୱର୍କର ମିଥ୍ୟା ଏବଂ କପୋଳକଳ୍ପିତ ଅଭିଯୋଗକୁ ଧରି ଅରଟେଲ୍ ମୁଖ୍ୟାଳୟକୁ ବନ୍ଦ କରିବାକୁ ଏହା ଏକ ଷଡ଼ଯନ୍ତ୍ର ବୋଲି ଅରଟେଲ୍ କର୍ତ୍ତୃପକ୍ଷ ଅଭିଯୋଗ କରିଛନ୍ତି । ଏଥିପାଇଁ ରାଜ୍ୟ ସରକାରଙ୍କୁ ଟାର୍ଗେଟ୍ କରିବା ସହ ପୋଲିସ୍‌କୁ ବ୍ୟବହାର କରି ସରକାର ଅରଟେଲ୍‌କୁ ବନ୍ଦ କରିବାର ଚେଷ୍ଟା କରୁଛନ୍ତି ବୋଲି ଅଭିଯୋଗ ହୋଇଛି। ତେବେ ଏନେଇ ପୋଲିସ୍ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ । ଅନପକ୍ଷରେ ଅନୁସନ୍ଧାନ ପାଇଁ ଯାଇଥିବା ତଦନ୍ତକାରୀ ଅଧିକାରୀଙ୍କ ମୋବାଇଲ୍ ଭିଡିଓ ସୁଟିଂ ସନ୍ଦେହ ସୃଷ୍ଟି କରିଛି।

Previous ArticleNext Article

Send this to a friend