ପାର୍ସଲ ବୋମା ବିସ୍ଫୋରଣର କ୍ରାଇମ୍‌ ପ୍ଲଟ୍‌ ଥିଲା କି ଭଇଁସା କଲେଜ କ୍ୟାମ୍ପସ ?

bolangiri1

ବଲାଙ୍ଗିର (ସସ୍ମିତା ସାହୁ): ପାଟଣାଗଡ଼ ପାର୍ସଲ ବୋମା ବିସ୍ଫୋରଣକୁ ୨ ମାସ ବିତିଛି। ଫେବ୍ରୁଆରୀ ୨୩ରେ ହୋଇଥିବା ଏହି ମର୍ମନ୍ତୁଦ ଘଟଣାରେ ନବ ବିବାହିତ ସୌମ୍ୟଶେଖର ଏବଂ ତାଙ୍କ ଜେଜେମାଆଙ୍କ ମୃତ୍ୟୁ ଘଟିଥିଲା। ନବବଧୂ ରୀମାରାଣି ଗୁରୁତର ଆହତ ହୋଇ ମେଡିକାଲରେ ଭର୍ତ୍ତି ହୋଇଥିଲେ। ପ୍ରାୟ ଏକମାସ ଚିକିତ୍ସିତ ହେବା ପରେ ସେ ମେଡିକାଲରୁ ଫେରି ତାଙ୍କ ବାପାଙ୍କ ଘରେ ରହୁଛନ୍ତି। ଏହି ଦୁଇମାସ ଭିତରେ ମାମଲାର ତଦନ୍ତ ଦାୟିତ୍ୱ ପୋଲିସ ହାତରୁ କ୍ରାଇମବ୍ରାଞ୍ଚକୁ ଯାଇଛି। ହେଲେ ଏହି ଘଟଣା ପଛର ଅସଲ କାରଣ ଓ ଖଳନାୟକ କିଏ ତା’ର ପର୍ଦ୍ଦାଫାସ୍ ହୋଇପାରିନାହିଁ। ତେବେ ୨ଦିନ ମଧ୍ୟରେ କ୍ରାଇମବ୍ରାଞ୍ଚ ଏସଆଇଟି ୮ଜଣଙ୍କୁ ଉଠାଇ ନେଇ ଘନ ଘନ ଜେରା କରୁଛି। ଏବେ ସନ୍ଦେହ କେନ୍ଦ୍ରୀଭୂତ ହୋଇଛି ମୃତ ସୌମ୍ୟଶେଖର ମାଆ ଅଧ୍ୟକ୍ଷା ଥିବା ଭଇଁସା କଲେଜର ଇଂରାଜୀ ଅଧ୍ୟାପକ ପୁଞ୍ଜିଲାଲ ମେହେର ଓ ନୂଆପଡ଼ାର ଜଣେ ଅପରାଧୀ ବୈବସୂତ ବିନ୍ଧାଣିଙ୍କ ଉପରେ। ପୋଲିସ୍‌ ସଙ୍କେତରୁ ଏମିତି ଲାଗୁଛି, ଘଟଣାର କ୍ରାଇମ୍‌ ପ୍ଲଟ୍‌ ଭଇଁସା କଲେଜ କ୍ୟାମ୍ପସରେ ହିଁ ରଚା ଯାଇଥିଲା।

ଏବେ ଭଇଁସା କଲେଜ କ୍ୟାମ୍ପସରେ ପଇଁତରା ମାରୁଛି ଡଗ୍ ସ୍ୱାର୍ଡ। କ୍ରାଇମବ୍ରାଞ୍ଚ ସ୍କାନରରେ ରହିଛନ୍ତି ଇଂରାଜୀ ଅଧ୍ୟାପକ ପୁଞ୍ଜିଲାଲ ମେହେର ଓ କଲେଜର ଆଉ କିଛି କର୍ମଚାରୀ। ମୃତ ସୌମ୍ୟଶେଖରଙ୍କ ମାଆ କଲେଜର ଅଧ୍ୟକ୍ଷା ହେବା ପରେ ଯେଉଁ ବିବାଦ ସୃଷ୍ଟି ହୋଇଥିଲା ତାକୁ ହିଁ ପୁଞ୍ଜି ପୁଞ୍ଜିଲାଲଙ୍କଚ ଘନ ଘନ ଜେରା କରୁଛି କ୍ରାଇମବ୍ରାଞ୍ଚ ଟିମ୍‌। ସେପଟେ ପାର୍ସଲ ଡେଲିଭରି ଦେଇଥିବା ପାଟଣାଗଡ଼ର ସ୍କାଏ କିଙ୍ଗ କୋରିୟର ମାଲିକ ଦିଲୀପ ଦାସ ଓ କୋରିୟର ବଏ ସୁଶାନ୍ତ ସେଠକୁ ମଧ୍ୟ ଗତକାଲି ରାତିରୁ ଉଠାଇ ନେଇଛି କ୍ରାଇମବ୍ରାଞ୍ଚ। ଏସବୁ ଭିତରେ ଆସିଛି ବ୍ଲାଷ୍ଟରେ ନୂଆ ଲିଙ୍କ୍। ନୂଆପଡ଼ା ଜିଲ୍ଲା ସହିନାମୁଣ୍ଡା ଗାଁର ବୈବସୂତ ବିନ୍ଧାଣୀ ନାମକ ଜଣେ ବ୍ୟକ୍ତିଙ୍କୁ ଗତକାଲି ରାତିରୁ ଉଠାଇ ଆଣି ଖୋଳତାଡ କରୁଛି କ୍ରାଇମବ୍ରାଞ୍ଚ। ମିଳିଥିବା ସୂଚନା ଅନୁସାରେ ବୈବସୂତ ପୂର୍ବରୁ ବେଆଇନ ଦେଶୀ ବନ୍ଧୁକ କାରବାର ସହ ଏକ ହତ୍ୟା ମାମଲାରେ ଜେଲ୍ ଯାଇଥିଲେ। ତେଣୁ ତାଙ୍କ ମାଧ୍ୟମରେ ଘଟଣାକୁ ଅନ୍ତିମ ରୂପ ଦିଆଯାଇ ପାରିଥାଏ ବୋଲି ତଦନ୍ତ କରୁଥିବା ଏସ୍ଆଇଟିର ସନ୍ଦେହ ବଢିଛି।

ସେପଟେ ଡିଜିପି ପୁଣି ଥରେ କହିଛନ୍ତି ଖୁବଶୀଘ୍ର ରହସ୍ୟର ପର୍ଦ୍ଦାଫାସ୍ ହେବ।

ପାଟଣାଗଡ ପାର୍ସଲ ବୋମା ବିସ୍ଫୋରଣ ପରେ ସ୍ଥାନୀୟ ପୋଲିସ ମାସେ ଧରି ତନାଘନା କରିଥିଲା। ଏହାପରେ କ୍ରାଇମବ୍ରାଞ୍ଚ ଏସ୍‌ଆଇଟିର ଖୋଳତାଡ଼ ଆରମ୍ଭ କରିଥିଲା। ଏହା ମଧ୍ୟରେ ୬୦ଦିନ ବିତିଛି। ହେଲେ ମୃତ ସୌମ୍ୟଶେଖର ଓ ତାଙ୍କ ସମ୍ପର୍କୀୟ ଜେଜେ ମାଆଙ୍କ ହତ୍ୟାକାରୀ କିଏ ଜଣାପଡିନି। ସେପଟେ ଏସସିବିରୁ ଚିକିତ୍ସିତ ହୋଇ ଫେରିଥିବା ରୀମାରାଣି ଭୁଲି ପାରୁନାହାନ୍ତି ସେ ଛାତିଥରା ଘଟଣାକୁ। ମାତ୍ର ୪ଦିନର ସଂସାର ଭାଙ୍ଗି ତାଙ୍କ ମୁଣ୍ଡରୁ ସିନ୍ଦୂର ଲିଭେଇ ଦେଇଥିବା ହତ୍ୟାକାରୀକୁ ଶୀଘ୍ର ଧରି ଫାଶି ଦେବାକୁ ଦାବି କରିଛନ୍ତି।

ପୁଞ୍ଜିଲାଲଙ୍କ ଘରୁ ନଡ଼ିଆ ବାଣ ଜବତ

ଅନ୍ୟପକ୍ଷରେ ଅଧ୍ୟାପକ ପୁଞ୍ଜିଲାଲଙ୍କ ପୈତୃକ ଘରୁ କ୍ରାଇମବ୍ରାଞ୍ଚ କିଛି ନଡ଼ିଆ ବାଣ ଜବତ କରିଛି। ଆଜି ସନ୍ଧାନୀ କୁକୁର ସହ ଘର ସର୍ଚ୍ଚ କରିଥିଲା କ୍ରାଇମବ୍ରାଞ୍ଚ। ଏହାପରେ ଭଇଁଷା ବିକାଶ କଲେଜରେ ବି କ୍ରାଇମବ୍ରାଞ୍ଚ ଚଢାଉ କରିଥିଲା।

Previous ArticleNext Article

Send this to a friend