ସମବାୟ ସମିତିର ଖୋଲା ଚ୍ୟାଲେଞ୍ଜ: ଧାନ ନେବୁନି କି ଋଣ ଦେବୁନି

co-oparetive socity

ଭୁବନେଶ୍ୱର (ଓଡ଼ିଶା ରିପୋର୍ଟର): ସରକାରଙ୍କୁ ପ୍ରାଥମିକ କୃଷି ସମବାୟ ସମିତି କର୍ମଚାରୀ ଦେଇଛନ୍ତି ଖୋଲା ଚ୍ୟାଲେଞ୍ଜ। ସମିତିର କର୍ମଚାରୀ ଧାନ ସଂଗ୍ରହ କରିବେ ନାହିଁ କି, ଚାଷୀଙ୍କୁ ରବି ଋଣ ବାଣ୍ଟିବେ ନାହିଁ ବୋଲି ଚେତାବନୀ ଦେଇଛନ୍ତି। ଆନ୍ଦୋଳନରତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଲାଗି ସମବାୟ ବିଭାଗର ନାଲିଆଖି ପରେ ଏମିତି ଚ୍ୟାଲେଞ୍ଜ ଦେଇଛନ୍ତି କର୍ମଚାରୀ। ଆଜିଠାରୁ ସରକାର ସମବାୟ ସପ୍ତାହ ପାଳନ କରୁଥିବା ବେଳେ ସମିତି କର୍ମଚାରୀଙ୍କ ଆନ୍ଦୋଳନ ପାଇଁ ଧାନ କିଣା ବାଧାପ୍ରାପ୍ତ ହୋଇଛି। ସେହିପରି ରବି ଋଣ ବଣ୍ଟନ ପ୍ରକ୍ରିୟା ବି ବାଧାପ୍ରାପ୍ତ ହେବା ଆଶଙ୍କା ସୃଷ୍ଟି ହୋଇଛି।

ଭୁବନେଶ୍ୱର, ବଲାଙ୍ଗିର, ଉଦଳାରେ ଦାବି ପୂରଣ ପାଇଁ ସରକାରଙ୍କ ବିରୋଧରେ କର୍ମଚାରୀ ଦେଇଛନ୍ତି ହଲ୍ଲାବୋଲ ଡାକରା। ପ୍ୟାକ୍ସ ଓ ଲ୍ୟାମ୍ପସ ଆଗରେ କଳାବ୍ୟାଚ ପିନ୍ଧି ଧାରଣରେ ବସିଛନ୍ତି ବଲାଙ୍ଗିର ଓ ଉଦଳା କୃଷି ସମବାୟ ସମିତିର କର୍ମଚାରୀ। ଭୁବନେଶ୍ୱରରେ ସମବାୟ ସମିତ ସମୂହର ରେଜିଷ୍ଟ୍ରାରଙ୍କ ଅଫିସ ଆଗରେ ଚାଲିଛି ପ୍ରତିବାଦ ସଭା ଓ ଧାରଣା। ସରକାରୀ କର୍ମଚାରୀ ହେବା ଦାବିରେ ରାଜ୍ୟର ବିଭିନ୍ନ କୃଷି ସମବାୟ ସମିତି ଅଫିସ ଆଗରେ ବିକ୍ଷୋଭ କରୁଛନ୍ତି କର୍ମଚାରୀ। ଏପଟେ ସମିତି ଅଫିସରେ ଝୁଲୁଛି ତାଲା।

ବଲାଙ୍ଗିର ମଲମୁଣ୍ଡା କୃଷି ପ୍ରାଥମିକ ସମବାୟ ସମିତିର ଏବେ ଧାନକିଣାର ସମୟ ଆରମ୍ଭ ହୋଇଥିବାରୁ ସମବାୟ ବିଭାଗର ଚିନ୍ତା ବଢିଯାଇଛି। ବଲାଙ୍ଗିରରେ ୨୫୮ ଟି ମଣ୍ଡି ଖୋଲିବାକୁ ନିଷ୍ପତ୍ତି ହୋଇଥିଲେ ବି କର୍ମଚାରୀଙ୍କ ଆନ୍ଦୋଳନ ଯୋଗୁଁ ଏଯାଏଁ ମାତ୍ର ୩୬ଟି ମଣ୍ଡି ଖୋଲାଯାଇପାରିଛି। ସେହିପରି ରବି ଋଣ ବଣ୍ଟନ ବି ବାଧାପ୍ରାପ୍ତ ହୋଇଛି।

ଅନ୍ୟପକ୍ଷରେ ୧୫ ଦିନ ଧରି ଆନ୍ଦୋଳନ ଚଳାଇଥିବା କର୍ମଚାରୀଙ୍କୁ କାର୍ଯ୍ୟାନୁଷ୍ଠାନର ଚେତାବନୀ ଦେଇଛି ସମବାୟ ବିଭାଗ। ଚକଡ଼ା ଚଡ଼କ ପରେ ଚାଷୀଙ୍କୁ ମୁଖ୍ୟମନ୍ତ୍ରୀ ଘୋଷଣା କରିଥିବା ପ୍ୟାକେଜ ବଣ୍ଟନରେ ଅସୁବିଧା ହେବା ଆଶଙ୍କାରେ ବିଭାଗୀୟ ସଚିବ, ସମବାୟ  ରେଜିଷ୍ଟ୍ରାରଙ୍କୁ ଚିଠି ଲେଖିଛନ୍ତି। ଧାନ ସଂଗ୍ରହ ସହ ସାର ଓ ରବି ଋଣ ବଣ୍ଟନ ଏବଂ ଚାଷୀଙ୍କୁ ଫସଲ ବୀମା ଅନ୍ତର୍ଭୁକ୍ତ କରିବା ପ୍ରକ୍ରିୟା ବାଧାପ୍ରାପ୍ତ ହେଉଥିବାରୁ କର୍ମଚାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ସଚିବ ଲେଖିଛନ୍ତି। ତେବେ ଏ ଧମକକୁ ଖାତିର ନ କରି ଦାବି ପୂରଣ ନହେବା ଯାଏଁ ଆନ୍ଦୋଳନ ଜାରି ରହିବ ବୋଲି ପ୍ରାଥମିକ କୃଷି ସମବାୟ ସଂଘ କହିଛି।

ପୂର୍ବରୁ ମଧ୍ୟ ସମାନ ଦାବିରେ ଭୁବନେଶ୍ୱର ସମେତ ସବୁ ପ୍ୟାକ୍ସ ଓ ଲ୍ୟାମ୍ପସ ଆଗରେ ଧାରଣା ଦେଇଥିଲେ କର୍ମଚାରୀ। ଖରିଫ ପାଇଁ ଚାଷୀ ପଞ୍ଜିକରଣ ଓ ଋଣ ବଣ୍ଟନ ବାଧାପ୍ରାପ୍ତ ହୋଇଥିଲା। ବିଭିନ୍ନ ପର୍ଯ୍ୟାୟରେ ଆଲୋଚନା ପରେ ଅକ୍ଟୋବର ୨୩ ପର୍ଯ୍ୟନ୍ତ ଆନ୍ଦୋଳନକୁ କର୍ମଚାରୀ ସ୍ଥଗତି ରଖିଥିଲେ। ତେବେ ଦାବି ପୂରଣ ନ ହେବାରୁ ପୁଣି ଆନ୍ଦୋଳନକୁ ଓହ୍ଲାଇଛନ୍ତି ରାଜ୍ୟରେ ଥିବା ୨୭୦୮ ପ୍ୟାକ୍ସ ଓ ଲ୍ୟାମ୍ପସ୍‌ର କର୍ମଚାରୀ।

୨୪ ଘଣ୍ଟାରେ କାର୍ଯ୍ୟରେ ଯୋଗଦେବାକୁ ସମୟ ଦେଲା ସମବାୟ ବିଭାଗ

ଅନ୍ୟପକ୍ଷରେ ଆନ୍ଦୋଳନରତ ସମବାୟ କର୍ମଚାରୀଙ୍କୁ ଚେତାବନୀ ଦେଇଛନ୍ତି ସମବାୟ ବିଭାଗ। ରାଜ୍ୟର ସବୁ ଜିଲ୍ଲାପାଳମାନଙ୍କୁ ସମବାୟ ରେଜିଷ୍ଟ୍ରାର ଚିଠି ଲେଖିଛନ୍ତି। ଏଥିରେ ୨୪ ଘଣ୍ଟାରେ କାର୍ଯ୍ୟରେ ଯୋଗଦେବାକୁ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଛି। ୨୭୦୮ ପ୍ୟାକ୍ସ ଓ ଲ୍ୟାମ୍ପସ୍‌ର କର୍ମଚାରୀଙ୍କୁ ବିଭାଗ ପକ୍ଷରୁ ଏହି ନିର୍ଦ୍ଦେଶ ଦିଆଯାଇଛି। ୨୪ ଘଣ୍ଟାରେ କର୍ମଚାରୀମାନେ କାର୍ଯ୍ୟରେ ଯୋଗ ନଦେଲେ ଏହାକୁ ଗୁରୁତର ଅବମାନନା ଧରାଯିବ ଓ କର୍ମଚାରୀଙ୍କୁ ଚାକିରିରୁ ନିଲମ୍ବନ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି। ଚିଠିରେ କୁହାଯାଇଛି, ଆନ୍ଦୋଳନ ଯୋଗୁ ଧାନ ସଂଗ୍ରହ, ସାର, ରବି ଋଣ ବଣ୍ଟନ ଓ ଚାଷୀଙ୍କୁ ଫସଲ ବୀମା ଅନ୍ତର୍ଭୁକ୍ତ ପ୍ରକ୍ରିୟା ବାଧା ହେଉଛି।

Previous ArticleNext Article

Send this to a friend