ରତ୍ନଭଣ୍ଡାରର ଡୁପ୍ଲିକେଟ୍ ଚାବି ଆସିଲା କେଉଁଠୁ? ଗୁମର ଖୋଲିଲେ ଶ୍ରୀମନ୍ଦିରର ପୂର୍ବତନ ଉପ-ପ୍ରଶାସକ

ଭୁବନେଶ୍ୱର (ଓଡ଼ିଶା ରିପୋର୍ଟର): ଶ୍ରୀମନ୍ଦିର ରତ୍ନଭଣ୍ଡାରର ଡୁପ୍ଲିକେଟ୍ ଚାବି ଆସିଲା କେଉଁଠୁ? ଟ୍ରେଜେରୀରେ ଯେଉଁ ଚାବି ରହିବା କଥା ତାହା ରେକର୍ଡ ରୁମ୍‌କୁ ଗଲା କିପରି ? ଏପରି ଅନେକ ପ୍ରଶ୍ନ ଏବେ କୋଟି କୋଟି ଜଗନ୍ନାଥ ପ୍ରେମୀଙ୍କ ମନରେ ଉଙ୍କି ମାରୁଛି। ଏଭଳି ସ୍ଥିତିରେ ଗୁମର ଖୋଲିଛନ୍ତି ଶ୍ରୀମନ୍ଦିରର ପୂର୍ବତନ ସହ ପ୍ରଶାସକ ରବୀନ୍ଦ୍ର ନାରାୟଣ ମିଶ୍ର। କହିଛନ୍ତି, ରତ୍ନଭଣ୍ଡାର ଡୁପ୍ଲିକେଟ୍‌ ଚାବି ଆଦୌ ନଥିଲା।

ଶେଷ ଥର ପାଇଁ ୧୯୮୫ ମସିହାରେ ରତ୍ନଭଣ୍ଡାର ଖୋଲା ଯାଇଥିଲା। ସେହି ସମୟରେ ରବୀନ୍ଦ୍ର ନିଜେ ଉପସ୍ଥିତ ରହିଥିଲେ। ତାଙ୍କ ସହିତ ସେତେବେଳର ଜିଲ୍ଲାପାଳଙ୍କ ପ୍ରତିନିଧି ଭାବେ ଅତିରିକ୍ତ ଜିଲ୍ଲାପାଳ ମଦନ ମୋହନ ନନ୍ଦ ଜଉମୁଦ ପରେ ଚାବି ନେଇଥିବା କହିଛନ୍ତି ରବୀନ୍ଦ୍ର। ଏବେ ରେକର୍ଡ ରୁମ୍‌ରୁ ଡୁପ୍ଲିକେଟ୍ ଚାବି ମିଳିବାକୁ ନେଇ ନିଜେ ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଏଠି ପ୍ରଶ୍ନ ଉଠୁଛି ଭିତର ଭଣ୍ଡାର ଚାବି ହଜିଯିବା ଜଣାପଡିବା ପରେ ନିଜ ଦୋଷ ଘୋଡ଼ାଇବାକୁ ଅରିଜିନାଲ ଚାବିକୁ ଡୁପ୍ଲିକେଟ୍ ଆଖ୍ୟା ଦେଇନାହିଁ ତ ପ୍ରଶାସନ ? ଅକଳରେ ପଡିବା ଜାଣି ସରକାର ଜାଣିଶୁଣି କିଛି ତଥ୍ୟ ଲୁଚାଉନାହାନ୍ତି ତ ?

ପୂର୍ବତନ ଶ୍ରୀମନ୍ଦିର ସହ ପ୍ରଶାସକ ରବୀନ୍ଦ୍ର ମିଶ୍ର କହିଛନ୍ତି,“ଶ୍ରୀମନ୍ଦିର ରତ୍ନଭଣ୍ଡାରର ଡୁପ୍ଲିକେଟ୍‌ ଚାବି ନଥିଲା। ୧୯୮୫ ମସିହାରେ ଚାବି ଖୋଲାଇ ଯାଇ ସୁନା ବାହାର କରାଯାଇ ମରାମତି କରାଯାଇଥିଲା। ତା’ପରେ ସିଲ୍‌ କରାଯାଇଥିଲା। ଏପରିସ୍ଥଳେ ଡୁପ୍ଲିକେଟ୍‌ ଚାବି କଥା ଉଠୁଛି କେଉଁଠୁ? ସବୁଠାରୁ ବଡ଼ କଥା ହେଉଛି ଚାବି ଟ୍ରେଜେରୀରେ ରହିବା କଥା। ମାତ୍ର ରେକର୍ଡ଼ ରୁମ୍‌କୁ ଗଲା କେମିତି?’’

ସେପଟେ ଖୋଦ୍ ଶାସକଦଳ ନେତା ଦାମୋଦର ରାଉତ ମଧ୍ୟ ଏନେଇ ସନ୍ଦେହ ପ୍ରକାଶ କରି ଅରିଜିନାଲ ଚାବି ହଜିଥିଲେ, ଡୁପ୍ଲିକେଟ କେଉଁଠୁ ଆସିବ ବୋଲି ପ୍ରଶ୍ନ କରିଛନ୍ତି। ସେ କହିଛନ୍ତି,“ଯେଉଁଭଳି ଡାକ ଲଫାଫାରେ ଚାବି ଅଛି ବୋଲି କୁହାଯାଉଛି ସେ ସମୟରେ ଡାକ ବିଭାଗର ଏଭଳି ଲଫାଫା ହିଁ ନଥିଲା। ୧୯୭୮ରେ ରତ୍ନଭଣ୍ଡାର ଖୋଲିଥିବା ବେଳେ ସେତେବେଳେ ଆଇନମନ୍ତ୍ରୀ ଥିବା ବିଶ୍ୱଭୂଷଣ ହରିଚନ୍ଦନଙ୍କୁ ଦାୟିତ୍ୱକୁ ନେଇ ବି ପ୍ରଶ୍ନ ଉଠାଇଛନ୍ତି ଦାମ। ତା’ସହ ଆବଶ୍ୟକତାଠୁ ଅଧିକ ସମୟ ଜିଲ୍ଲାପାଳ ପୁରୀରେ ନିଯୁକ୍ତି ପାଇଥିବା କହି ବାଣ ମାରିଛନ୍ତି।”

Previous ArticleNext Article

Send this to a friend