ଗଭୀର କୂଅରୁ ଉଦ୍ଧାର ହେଲା ରାଧା: ଏମିତି ଥିଲା ଅପରେଶନ, ଦେଖନ୍ତୁ ଏକ୍ସକ୍ଲୁସିଭ ଭିଡିଓ  

Radha -578

ଅନୁଗୁଳ,(ଓଡ଼ିଶା ରିପୋର୍ଟର):କଥାରେ ଅଛି। ରଖେ ହରି ତ’ ମାରେ କିଏ । ଅନୁଗୁଳ ଗୁଲାସର ଗାଁରେ ବୋର ୱେଲରୁ କୁନି ଝିଅ ରାଧା ଉଦ୍ଧାର ହେବା ଘଟଣା ସମସ୍ତଙ୍କୁ ଆଚମ୍ବିତ କରି ଦେଇଛି । ଦୀର୍ଘ ସାଢ଼େ ୭ ଘଣ୍ଟାର ନନ୍‌ଷ୍ଟପ୍‌ ଅପରେସନ ପରେ ରାଧାକୁ ସୁରକ୍ଷିତ ଉଦ୍ଧାର କରିଛି ଅଗ୍ନିଶମ ବାହିନୀ । ସେପଟେ ବୋରେୱେଲ ଗାତରେ ଶିଶୁ ଖସି ପଡ଼ିବା ଘଟଣାରେ ଉଠା ଜଳସେଚନ ବିଭାଗ ନିର୍ବାହୀ ଯନ୍ତ୍ରୀଙ୍କୁ ତଦନ୍ତ ନିର୍ଦ୍ଦେଶ ଦେଇଛନ୍ତି ଅନୁଗୁଳ ଜିଲ୍ଲାପାଳ।  ଗାତ କିଏ ଖୋଳିଥିଲା ଓ କାହିଁକି ପୋତା ଯାଇ ନ ଥିଲା ତାର ତଦନ୍ତ କରି କାଲିସୁଦ୍ଧା ରିପୋର୍ଟ ଦେବାକୁ ନିର୍ଦ୍ଦେଶ ଦିଆଯାଇଛି। ବୋରେୱେଲ୧୫ରୁ ୧୬ ଫୁଟ୍ ମଝିରେ ଫସି ରହିଥିବା ରାଧାକୁ ସୁରକ୍ଷିତ ଉଦ୍ଧାର କରିଛନ୍ତି ଅଗ୍ନିଶମ ବାହିନୀ।  ଅନୁଗୁଳ ଜିଲ୍ଲା କିଶୋରନଗର ବ୍ଲକ ଗୁଲାସର ଗାଁର ଘଟିଥିଲା ଏହି ଘଟଣା। ଏହି ଘଟଣାଟି  ଆଜି ସାରା ରାଜ୍ୟରେ ଚହଳ ପକାଇ ଦେଇଥିଲା । ତେବେ ଅଗ୍ନିଶମ ବିଭାଗର ସୁଚିନ୍ତିତ ଅପରେସନ ଯୋଗୁଁ ଝିଅଟିକୁ ସୁରକ୍ଷିତ ଉଦ୍ଧାର ପରେ ଆଶ୍ୱସ୍ତ ହୋଇଛନ୍ତି ବାପା ମା’।

ଆଶ୍ୱସ୍ତି ହୋଇଛି ସାରା ରାଜ୍ୟ । ଯାହାକୁ ବଡ଼ଦିନରେ ବଡ଼ ସଫଳତା ବୋଲି କହିଛନ୍ତି ଲୋକେ।  ଉଦ୍ଧାର ପରେ ଝିଅଟିକୁ ଅନୁଗୁଳ ମେଡିକାଲରେ ଭର୍ତ୍ତି କରାଯାଇଛି। ସୂଚନା ଅନୁଯାୟୀ, ସମୟ ପ୍ରାୟ ସକାଳ ୯ଟା କଅଁଳ ଖରାରେ ଖେଳୁଥିଲା ଗୁଲାସର ଗାଁର କୁନି ଝିଅ ରାଧା।  ଖେଳି ଖେଳି ଅଜାଣତରେ ପହଞ୍ଚି ଯାଇଥିଲା ଘର ପାଖରେ ଖୋଳା ଯାଇଥିବା ୨ଶହ ଫୁଟ୍ ଗଭୀରର ବୋରେୱେଲ୍ ନିକଟରେ । କେହି କିଛି ବୁଝିବା ବେଳକୁ ହଠାତ୍ ଖସି ପଡିଥିଲା ସେ ଗଭୀର ଖାତରେ।  ତୁରନ୍ତ ଗାଁ ଲୋକେ ଅଗ୍ନିଶମ ବିଭାଗ ଓ ପୋଲିସକୁ ଖବର ଦେଇଥିଲେ । ଅନୁଗୁଳ ଓ ବାମରାରୁ ତୁରନ୍ତ ଅଗ୍ନିଶମ କର୍ମଚାରୀ ପହଞ୍ଚି ଆରମ୍ଭ କରି ଦେଇଥିଲେ ରେସକ୍ୟୁ ଅପରେଶନ।

ଜେସିବି ମେସିନ ଲଗାଇ ବୋରେଓ୍ୱଲ୍ ନିକଟରେ ଆଉ ଏକ ସମାନ ଗଭୀରର ଖାତ ଖୋଳାଯାଇ ଅପରାହ୍ନ ପ୍ରାୟ ସାଢ଼େ ୪ଟା ବେଳେ ଝିଅଟିକୁ ସୁରକ୍ଷିତ ଉଦ୍ଧାର କରାଯାଇଥିଲା। ସେପଟେ ବୋରେୱେଲ ଗାତରୁ ଶିଶୁ କନ୍ୟାକୁ ଉଦ୍ଧାର ଘଟଣାରେ ଅଗ୍ନିଶମ କର୍ମଚାରୀଙ୍କୁ ଅଭିନନ୍ଦନ ଓ ଧନ୍ୟବାଦ ଜଣାଇଲେ।  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଧାର ହୋଇଥିବା ଅଢେଇ ବର୍ଷର ଝିଅ ରାଧାର ଆଶୁ ଆରୋଗ୍ୟ କାମନା କରିଛନ୍ତି।  ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଉଦ୍ଧାର କାର୍ଯ୍ୟରେ ନିୟୋଜିତ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି।

୨୦୦୬ ମସିହା ଜୁଲାଇ ୨୧ ତାରିଖରେ ହରିୟାଣା କୁରୁକ୍ଷେତ୍ରର କାଶ୍ୟପ ଗାଁରେ ଦେଖିବାକୁ ମିଳିଥିଲା ଏଭଳି ଏକ ଘଟଣା । ସମାନ ଢଙ୍ଗରେ ଗଭୀର ବୋରେୱଲ୍ ଭିତରକୁ ଖସି ପଡିଥିଲା ପ୍ରିନ୍ସ ନାମକ  ୫ ବର୍ଷର ବାଳକ । ବୋରେୱେଲର ୫୦ ଫୁଟ୍ ତଳେ ଫସି ରହିଥିଲା ପ୍ରିନ୍ସ।  ତାକୁ ଉଦ୍ଧାର ଲାଗି ହୋଇଥିଲା ପ୍ରାୟ ୫୦ ଘଣ୍ଟାର ଅପରେସନ । ଏପରିକି ପିଲାଟି ଅଣନିଶ୍ୱାସୀ ହୋଇପଡୁଥିବା ଜାଣି ଖାତ ଭିତରକୁ ଅକ୍ସିଜେନ୍ ମଧ୍ୟ ଛଡ଼ା ଯାଇଥିଲା।  ଆଉ ଶେଷରେ ଉଦ୍ଧାରକାରୀ ଦଳଙ୍କ ଶ୍ରମ ସାର୍ଥକ ହୋଇଥିଲା।

 

Previous ArticleNext Article

Send this to a friend