ଜ୍ୟେଷ୍ଠରେ ଶ୍ରାବଣର ଛିଟା

ଭୁବନେଶ୍ୱର (ଓଡ଼ିଶା ରିପୋର୍ଟର): ଧାରା ଶ୍ରାବଣ ଆସିନି। କିନ୍ତୁ ମୂଷଳ ଧାରାରେ ବର୍ଷୁଛି। ବୋହୁଛି ଅଣଚାଷ ପବନ। ଦେଖୁଦେଖୁ ଧୂଳିଝଡ଼ରେ ଅନ୍ଧାର ହୋଇଯାଉଛି ଚତୁର୍ଦ୍ଦିଗ। କହିବାକୁ ଗଲେ ଜ୍ୟେଷ୍ଠରେ ଶ୍ରାବଣର ଅନୁଭୂତି ହେଉଛି। ଆଉ ଦିନରେ ଡ଼ହ ଡ଼ହ ଖରା ଓ ଅପରାହ୍ନ ପରେ କେଉଁଠି ଘନ ଘନ ବଜ୍ରପାତ ତ ଆଉ କେଉଁଠି ବର୍ଷାର ତାଣ୍ଡବ। ଆଉ କେଉଁଠି କାଶ୍ମୀରର ଭ୍ରମ ସୃଷ୍ଟି କରୁଛି କୁଆପଥର ମାଡ଼। ଗତ ମାର୍ଚ୍ଚ ପରଠୁ ରାଜ୍ୟରେ ଏଭଳି ଅସ୍ୱାଭାବିକ ପାଗ ଦେଖାଦେଇଛି। ଗତ ୨୪ ଘଣ୍ଟା ମଧ୍ୟରେ ବଜ୍ରପାତରେ ବଲାଙ୍ଗିର, ସୁନ୍ଦରଗଡ଼ ଓ ନୂଆପଡ଼ା ଜିଲ୍ଲାରେ ୪ ଜଣଙ୍କ ମୃତ୍ୟୁ ହୋଇଥିବା ବେଳେ ଏପ୍ରିଲ୍ ୧ରୁ ଅଦ୍ୟାବଧି କାଳବୈଶାଖୀ ଓ ବଜ୍ରପାତରେ ପ୍ରାୟ ୬୦ ଜଣଙ୍କ ମୃତ୍ୟୁ ଘଟିଲାଣି।

ଏହି ପ୍ରି-ମନସୁନ୍‌ ପିରିୟଡ୍‌ରେ କେବଳ ବଜ୍ରପାତ କିମ୍ବା ଝଡ଼ ନୁହେଁ, କୁଆପଥର ସହ ବର୍ଷାର ପରିମାଣ ବି ଅଧିକ ରହିଛି। ପାଣିପାଗ ବିଭାଗର ରିପୋର୍ଟ କହୁଛି, ୨୦୧୪ ମାର୍ଚ୍ଚରୁ ମେ’ ମଧ୍ୟରେ ରାଜ୍ୟବ୍ୟାପୀ ସର୍ବାଧିକ ୧୪୮.୭ ମିଲିମିଟର ବର୍ଷା ରେକର୍ଡ କରାଯାଇଛି। ଏବର୍ଷ ମାର୍ଚ୍ଚରୁ ବର୍ତ୍ତମାନ ସୁଦ୍ଧା ୧୪୧.୩ ମିଲିମିଟର ବର୍ଷା ରେକର୍ଡ କରାଯାଇଥିବା ବେଳେ ମେ’ ଶେଷ ସୁଦ୍ଧା ୨୦୧୪ର ରେକର୍ଡ ଭାଙ୍ଗିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ରାଜ୍ୟର ଅଧିକାଂଶ ଜିଲ୍ଲାରେ ରହୁଥିବା ହିଟ୍ ୱେଭ କଣ୍ଡିସନ୍ ଓ ବାୟୁମଣ୍ଡଳରେ ଜଳୀୟ ବାଷ୍ପର ମାତ୍ରା ଅଧିକ ଥିବାରୁ କାଳବୈଶାଖୀଜନିତ ପ୍ରବଳ ବର୍ଷା ଏବଂ ବଜ୍ରପାତର ପରିମାଣ ଅଧିକ ରହୁଛି ବୋଲି ଭୁବନେଶ୍ୱର ପାଣିପାଗ କେନ୍ଦ୍ର ନିର୍ଦ୍ଦେଶକ ଡକ୍ଟର ଶରତ ଚନ୍ଦ୍ର ସାହୁ କହିଛନ୍ତି।

ତେବେ ଗତ କିଛି ଦିନ ତଳେ ଭାରତୀୟ ପାଣିପାଗ ବିଭାଗ ଆସନ୍ତା ୨୮ ତାରିଖ ସୁଦ୍ଧା ଦକ୍ଷିଣ ପଶ୍ଚିମ ମୌସୁମୀ ବାୟୁ କେରଳ ଛୁଇଁବ ବୋଲି ପୂର୍ବାନୁମାନ କରିଥିବାବେଳେ ଜୁନ୍ ପ୍ରଥମ କିମ୍ବା ଦ୍ୱିତୀୟ ସପ୍ତାହ ସୁଦ୍ଧା ଓଡ଼ିଶାରେ ପହଞ୍ଚିବା ଆଶା କରାଯାଉଛି। ମୌସୁମୀ ପରେ ଏଭଳି ଅସ୍ୱାଭାବିକ ପାଗରେ ପରିବର୍ତ୍ତନ ଆସିବ ବୋଲି ପାଣିପାଗ ବିଭାଗ କହିଛି।

Previous ArticleNext Article

Send this to a friend