ସ୍ୱର୍ଗତ ବଂଶୀଧର ପଣ୍ଡାଙ୍କ ପରିବାରକୁ ଭେଟି ସମବେଦନା ଜଣାଇଲେ ରାମ ମାଧବ

ଭୁବନେଶ୍ୱର(ଓଡ଼ିଶା ରିପୋର୍ଟର): ବିଶିଷ୍ଟ ଶିଳ୍ପପତି ବଂଶୀଧର ପଣ୍ଡାଙ୍କ ବିୟୋଗରେ ବିଜେପିର ରାଷ୍ଟ୍ରୀୟ ସାଧାରଣ ସମ୍ପାଦକ ରାମମାଧବ ଶୋକ ପ୍ରକାଶ କରିଛନ୍ତି। ସ୍ୱର୍ଗତ ବଂଶୀଧର ପଣ୍ଡାଙ୍କ ଭୁବନେଶ୍ୱର ସ୍ଥିତ ବାସଭବନରେ ସେ ତାଙ୍କୁ  ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏହାସହ ସାଂସଦ ବୈଜୟନ୍ତ ପଣ୍ଡା ଏବଂ ତାଙ୍କ  ପରିବାରବର୍ଗଙ୍କୁ ଭେଟି ସମବେଦନା ଜଣାଇଛନ୍ତି।

ବିଜେପିର ବରିଷ୍ଠ ନେତା ରାମ ମାଧବଙ୍କ ମାଆଙ୍କ ପରଲୋକ ହୋଇଯାଇଛି। ନିଜ ମାଆଙ୍କ ଦଶାହକ୍ରିୟା ସାରି ଓଡ଼ିଶା ଆସି ଏଭଳି ଏକ ଦୁଃଖଦ ସମୟରେ ତାଙ୍କ ପରିବାର ସହ ସାମିଲ ହୋଇଥିବାରୁ ରାମ ମାଧବଙ୍କୁ ଅଶେଷ କୃତଜ୍ଞତା ଜଣାଇଛନ୍ତି ସାଂସଦ ବୈଜୟନ୍ତ ପଣ୍ଡା।

ବିଶିଷ୍ଟ ଶିଳ୍ପପତି ବଂଶୀଧର ପଣ୍ଡାଙ୍କ ବିୟୋଗରେ ଆମେରିକା ରାଷ୍ଟ୍ରଦୂତ ଶୋକପ୍ରକାଶ କରିଛନ୍ତି। ଆମେରିକାର ପକ୍ଷରୁ କେନିଥ୍ ଆଇ. ଜଷ୍ଟର ବଂଶୀଧର ପଣ୍ଡାଙ୍କ ପୁଅ ତଥା ସାଂସଦ ବୈଜୟନ୍ତ ପଣ୍ଡାଙ୍କ ନିକଟକୁ ଶୋକବାର୍ତ୍ତା ପଠାଇଛନ୍ତି। ସେ କହିଛନ୍ତି, ଓଡ଼ିଶାର ଉନ୍ନତି ପାଇଁ  ସ୍ୱର୍ଗତ ପଣ୍ଡାଙ୍କ ଅବଦାନ ଅତୁଳନୀୟ।  ତାଙ୍କର ଏହି ଶୋକବାର୍ତ୍ତା ପାଇଁ ଟ୍ୱିଟ୍ ଯୋଗେ ପରିବାର ପକ୍ଷରୁ ଆମେରିକାର ରାଷ୍ଟ୍ରଦୂତଙ୍କୁ କୃତଜ୍ଞତା ଜଣାଇଛନ୍ତି ବୈଜୟନ୍ତ ପଣ୍ଡା। ଏହା ସହିତ ଶିଳ୍ପ କ୍ଷେତ୍ରକୁ ଆସିବା ପୂର୍ବରୁ ସ୍ୱର୍ଗତ ବଂଶୀଧର ପଣ୍ଡା ଆମେରିକାରେ ପାଠ ପଢ଼ିବା ସହିତ ବୈଜ୍ଞାନିକ ଭାବେ କାମ କରିଥିବା ସେ ଜଣାଇଛନ୍ତି।

ସେହିପରି ଭୁବନେଶ୍ୱରର ଉତ୍କଳ ବିକାଶ ଯୁବ ପରିଷଦ ପକ୍ଷରୁ ଡକ୍ଟର ବଂଶୀଧର ପଣ୍ଡାଙ୍କୁ ଶ୍ରଦ୍ଧାଞ୍ଜଳି ଦିଆଯାଇଛି। ଏଥିପାଇଁ ନେହେରୁ ଯୁବ ପ୍ରତିଷ୍ଠାନ ହଲରେ ଏକ ଶୋକସଭାର ଆୟୋଜନ କରାଯାଇଥିଲା। ଏଥିରେ ଓଡ଼ିଶାର ଶିଳ୍ପ ଜଗତକୁ ଡକ୍ଟର ବଂଶୀଧର ପଣ୍ଡାଙ୍କ ଅବଦାନ ସଂପର୍କରେ ସ୍ମୃତିଚାରଣ କରାଯାଇଥିଲା।

କଟକ ଜିଲ୍ଲା ମାହାଙ୍ଗାର ଲଳିତଗିରିରେ ହୋଇଥିବା ଏକ ଶୋକସଭାରେ ବଂଶୀଧର ପଣ୍ଡାଙ୍କ ଆତ୍ମାର ସଦଗତି ପାଇଁ ନିରବ ପ୍ରାର୍ଥନା କରାଯାଇଥିଲା। ବହୁ ବିଶିଷ୍ଟ ବ୍ୟକ୍ତି ଏଥିରେ ଯୋଗ ଦେଇ କାଳୁଆ ଠାକୁରାଣୀଙ୍କ ପୀଠରେ ସମୂହ ଦୀପଦାନ କରିଥିଲେ।

କଟକ ନଗର ଜିଲ୍ଲା ବିଜେପି ପକ୍ଷରୁ ମଧ୍ୟ ବିଶିଷ୍ଟ ଶିଳ୍ପପତି ବଂଶୀଧର ପଣ୍ଡାଙ୍କ ଅମର ଆତ୍ମାକୁ ଶ୍ରଦ୍ଧାଞ୍ଜଳି ଅର୍ପଣ କରିବା ସହିତ ସ୍ମୃତିଚାରଣ କରାଯାଇଥିଲା।

 

 

 

 

Previous ArticleNext Article

Send this to a friend