ପୁରୀରେ ରାମ ରହିମ ଆଶ୍ରମ ଜବରଦଖଲରେ ଥିଲେ ଭଙ୍ଗାଯିବ: ମହେଶ୍ୱର

ପୁରୀ (ଓଡ଼ିଶା ରିପୋର୍ଟର): କୋଣାର୍କ ମେରାଇନ ଡ୍ରାଇଭ ରାସ୍ତାର ବେଲେଶ୍ୱର ପାଟଣାରେ ଥିବା ବାବା ରାମ ରହିମଙ୍କ ଡେରା ସଚ୍ଚା ସୌଦା ଆଶ୍ରମ ଯଦି ସରକାରୀ ଜମି ଜବରଦଖଲ କରିଥିବ, ତେବେ ତାକୁ ଭାଙ୍ଗି ଦିଆଯିବ। ଏହା କହିଛନ୍ତି ରାଜସ୍ୱ ମନ୍ତ୍ରୀ ମହେଶ୍ୱର ମହାନ୍ତି। ଏହାସହ ହରିଆଣାର ବିଜେପି ସରକାର ରାମ ରହିମଙ୍କୁ ପ୍ରୋତ୍ସାହନ ଦେଉଥିବା ଅଭିଯୋଗ କରିଛନ୍ତି ମହେଶ୍ୱର।

ଆଶ୍ରମର ଜମି ବିକ୍ରେତା ରାମଚନ୍ଦ୍ର ସ୍ୱାଇଁ କହିଛନ୍ତି, ୩୨ ଲକ୍ଷ ଟଙ୍କାରେ ସେ ତାଙ୍କ ଜମି ବାବାଙ୍କୁ ବିକିଥିଲେ। ହେଲେ ଏପର୍ଯ୍ୟନ୍ତ ତାଙ୍କୁ ୨୪ ଲକ୍ଷ ଟଙ୍କା ମିଳିଛି।

ମହେଶ୍ୱର କହିଛନ୍ତି, “ଠକ ବାବାଙ୍କୁ ଗୋଡାଇ ଗୋଡାଇ ଧରିବା ଦରକାର। ସରକାର ଜମି ଦେଇ ନାହାଁନ୍ତି। ଜବରଦଖଲର ତଦନ୍ତ କ’ଣ କରିବୁ, ଜବରଦଖଲ ହୋଇଥିଲେ ଆମେ ବାଢେଇ କି ଭାଙ୍ଗି ଦେବୁ।”

ଏହାସହ ସେ ହରିୟାଣାର ବିଜେପି ସରକାର ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି- “ସେଠାରେ ବିଜେପି ସରକାର ଅଛି, କେନ୍ଦ୍ରରେ ତାଙ୍କର ପ୍ରଧାନମନ୍ତ୍ରୀ ଅଛନ୍ତି। ବିଭିନ୍ନ ଗଣମାଧ୍ୟମରେ ଦେଖାଉଛି, ଆନାଦୀ ଗ୍ରୁପ୍‌ର ସମାନ ନମ୍ବର ହେଲିକପ୍ଟରରେ ରାମ ରହିମ ଓ ମୋଦି ଅଲଗା ଅଲଗା ବୁଲୁଛନ୍ତି।”

ଆଶ୍ରମ ଭିତରେ କ’ଣ ଚାଲିଛି, ତାହାର ଉତ୍ତର କାହା ପାଖରେ ନାହିଁ। ବିଭିନ୍ନ ସମୟରେ ବହୁ ଯୁବକ, ମହିଳା ଏଠାକୁ ଆସୁଛନ୍ତି। କିଛିଦିନ ରହିବା ପରେ ପଳାଇ ଯାଉଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି।

ମହିଳା ଅନୁଗାମୀଙ୍କୁ ବଳାତ୍କାର ମାମଲାରେ ବାବା ଗୁରୁମିତ୍‌ ରାମରହିମ ସିଂହଙ୍କୁ ହରିୟାଣାର ପଞ୍ଚକୁଲା ସ୍ୱତନ୍ତ୍ର ସିବିଆଇ କୋର୍ଟ ଦୋଷୀ ସାବ୍ୟସ୍ତ କରିବା ପରେ ଏହାର ପ୍ରଭାବ ଓଡ଼ିଶାରେ ଦେଖିବାକୁ ମିଳିଥିଲା। ବାବାଙ୍କୁ ବିରୋଧକରି ପୁରୀ-କୋଣାର୍କ ରାସ୍ତାର ବେଲେଶ୍ୱରପାଟଣା ସ୍ଥିତ ଆଶ୍ରମ ଆଗରେ ସ୍ଥାନୀୟ ଲୋକେ ବିକ୍ଷୋଭ ପ୍ରଦର୍ଶନ କରିଥିଲେ।

Previous ArticleNext Article

Send this to a friend