ଶ୍ୱଶୁରର ଅସୁର ରୂପ: ଦୁଷ୍କର୍ମ ପରେ ବୋହୂକୁ ନିଆଁ ଲଗାଇ ଦେଲା, ମେଡିକାଲରେ ମୃତ୍ୟୁ ସହ ସଂଘର୍ଷ

Sasura

ରାଇରଙ୍ଗପୁର,(ଓଡ଼ିଶା ରିପୋର୍ଟର): ଶ୍ୱଶୁର । ଏମିତି ଏକ ସମ୍ପର୍କର ନାଁ । ଯାହା ଆଗରେ ନତମସ୍ତକ ହୋଇ ମୁଣ୍ଡ ନଇଁଯାଏ ଜଣେ ବୋହୂର ମଥା।  କୁହାଯାଏ, ବାପା ଭଳି ଆଉ ଏକ ସମ୍ମାନଜନକ ବ୍ୟକ୍ତିତ୍ୱ ଶ୍ୱଶୁର । ହେଲେ ସେମିତି ଜଣେ ଶ୍ୱଶୁର ଯଦି ସଇତାନ୍ ପାଲଟିଯାଏ ତେବେ କଥା ସରିଲା । ମୟୂରଭଂଜ ଜିଲ୍ଲା ରାଇରଙ୍ଗପୁର ସହରରେ ନିଜ ବୋହୂକୁ ଜଣେ ଶ୍ୱଶୁର ଦୁଷ୍କର୍ମ ଓ କିରୋସିନୀ ଢ଼ାଳି ହତ୍ୟା ଉଦ୍ୟମ କରିବା ଘଟଣା ସାରା ଜିଲ୍ଲାରେ ଚାଞ୍ଚଲ୍ୟ ଖେଳାଇଦେଇଛି ।

ମୟୁରଭଞ୍ଜ ଜିଲ୍ଲା ରାଇରଙ୍ଗପୁରର ବଜାରସାହି । ଶୁକ୍ରବାର ସକାଳ ପ୍ରାୟ ୭ଟାରେ ନିଆଁରେ ଜଳି ଚିତ୍କାର କରୁଥିଲେ ରାମଗୋପାଳଙ୍କ ବୋହୁ। ବଞ୍ଚାଇବାକୁ ଡାକ ଛାଡ଼ୁଥିଲେ।  ଶେଷରେ ତାଙ୍କ ସ୍ୱାମୀ ଶାଶୂ ଏବଂ ନଣନ୍ଦ ଆସି ଉଦ୍ଧାର କରିବା ସହ ଜାମ୍‌ସେଦ୍‌ପୁରକୁ ନେଇ ଏକ ମେଡ଼ିକାଲରେ ଭର୍ତ୍ତି କରିଥିଲେ।  ତାଙ୍କ ଶରୀରର ୯୫ ପ୍ରତିଶତ ଅଂଶ ଜଳିଯାଇଛି।  ଏଭଳି ସ୍ଥିତିରେ ପୀଡ଼ିତାଙ୍କ ବାପା, ମା’ଙ୍କ ଅଭିଯୋଗ ଝିଅକୁ ଦୁଷ୍କର୍ମ କରାଯାଇଥିଲା।  ପରେ ନିଆଁ ଲଗାଇ ଜାଳିଦିଆ ଯାଇଛି ।  ରାଜପ୍ରାସାଦ ଭଳି ବିଶାଳ ଘର।  ସେହି ଘରକୁ ଗତ ୨ବର୍ଷ ତଳେ ବୋହୂ ସାଜି ଆସିଥିଲେ ସୁନ୍ଦରଗଡ଼ର ସମ୍ପୃକ୍ତ ଯୁବତୀ।  କିନ୍ତୁ ଶ୍ୱଶୁରର କାମନାର ନିଆଁରେ ତିଳ ତିଳ ହୋଇ ଜଳୁଥିଲେ ସେ । ପରିବାର ଲୋକଙ୍କ ଅଭିଯୋଗ, ସ୍ୱାମୀଙ୍କ ଅନୁପସ୍ଥିତିରେ ଶ୍ୱଶୁର ରାମଗୋପାଳଙ୍କ ଦ୍ୱାରା ଦୁଷ୍କର୍ମର ଶୀକାର ହୋଇଥିଲା ଝିଅ । ଏ ସମ୍ପର୍କରେ ସେ ସ୍ୱାମୀଙ୍କୁ ହ୍ୱାଟସ୍‌ଅପରେ ଜଣାଇଥିଲେ ।

ଏହାପରେ ଘଟଣା କାଳେ ପଦାରେ ପଡ଼ିବ, ସେହି ଆଶଙ୍କା କରି ପୀଡ଼ିତାଙ୍କୁ ହତ୍ୟା କରିବାକୁ ଷଡଯନ୍ତ୍ର କରାଯାଇଥିଲା ବୋଲି ପରିବାର ଲୋକେ ଅଭିଯୋଗ କରିଛନ୍ତି।  ଆଉ ଗୁରୁତର ଅବସ୍ଥାରେ ଜାମ୍‌ସେଦପୁର ମେଡ଼ିକାଲରେ ଭର୍ତ୍ତି ହୋଇଥିବା ଝିଅକୁ ଦେଖିବାକୁ ଯାଇଥିଲେ ପରିବାର ଲୋକେ । ମେଡ଼ିକାଲ ଭିତରେ ଅଭିଯୁକ୍ତ ରାମଗୋପାଳଙ୍କୁ ନିସ୍ତୁକ ପିଟିଥିଲେ।  ଏପଟେ ରାଇରଙ୍ଗପୁର ପୋଲିସ ବିଭିନ୍ନ ଦଫାରେ ମାମଲା ରୁଜୁ କରି ତଦନ୍ତ ଜାରି ରଖିଛି ।

Previous ArticleNext Article

Send this to a friend