ସାବଧାନ: ATMରୁ ଟଙ୍କା ଉଠାଇବା ବେଳେ ନିଅନ୍ତୁନି କାହାର ସାହାଯ୍ୟ, ତତ୍‌କ୍ଷଣାତ ଖାଲି ହୋଇଯାଇ ପାରେ ଆକାଉଣ୍ଟ

ଭୁବନେଶ୍ୱର (ଓଡ଼ିଶା ରିପୋର୍ଟର): ଲୁଟେରାଙ୍କ ପାଇଁ ଏଟିଏମ୍‌ରୁ ଟଙ୍କା ଲୁଟ୍ ବାଁ ହାତର ଖେଳ। ଆପଣ ଚାଲାକ୍ ନହେବେ ଆଖି ପିଛୁଳାକେ ଗାୟବ ହୋଇଯିବ ଟଙ୍କା। କେଇ ମିନିଟ୍ ମଧ୍ୟରେ ଖାଲି ହୋଇଯିବ ଆପଣଙ୍କ ଆକାଉଣ୍ଟ। ଏମିତି ଏକ ଘଟଣାର ପର୍ଦ୍ଦାଫାସ୍ କରିଛି ରାଉରକେଲା ପୋଲିସ। ଏଟିଏମ୍ ପରିସରରେ ଅତ୍ୟାଧୁନିକ କୌଶଳ ପ୍ରୟୋଗ କରି ଆକାଉଣ୍ଟରୁ ଟଙ୍କା ଲୁଟି ନେଉଥିବା ୧୧ ଜଣିଆ ଗ୍ୟାଙ୍ଗକୁ ଧରିଛି ପୋଲିସ। ସେମାନଙ୍କଠାରୁ ନଗଦ ୪ ଲକ୍ଷ ୨୦ ହଜାର ଟଙ୍କା, ୧୬ଟି ମୋବାଇଲ୍, ବିଭିନ୍ନ ବ୍ୟାଙ୍କର ୯୫ଟି ଏଟିଏମ୍ କାର୍ଡ, ୧୧ଟି ବ୍ଲାଙ୍କ୍ ଏଟିଏମ୍ କାର୍ଡ, ୩ଟି ସ୍କିମର ମ୍ୟାସିନ୍, ୨ଟି କପି ରାଇଟର୍ ମ୍ୟାଗନେଟିକ୍ ଡିକୋଡର୍ ସହ ଯାନବାହନ।

ଏମାନଙ୍କ ଟାର୍ଗେଟରେ ଥିଲା ଜାତୀୟ ରାଜପଥ କଡ଼ରେ ଥିବା ଏଟିଏମ୍ ଓ ଗ୍ରାମାଞ୍ଚଳ ଲୋକେ। ଏଟିଏମ୍‌କୁ ଆସୁଥିବା ଲୋକଙ୍କୁ ସେମାନେ ପିଛା କରି ସହାୟତାର ହାତ ବଢ଼ାନ୍ତି। ଆଉ ଅତ୍ୟାଧୁନିକ ସ୍କିମର ମେସିନ୍‌ରେ ଚଟାପଟ୍ କାର୍ଡ ସ୍ୱାଇପ୍ କରି ଏଟିଏମ୍ କାର୍ଡରେ ଥିବା ମ୍ୟାଗନେଟିକ୍ ଟେପ୍‌ରେ ତଥ୍ୟକୁ ନେଇଯାଉଥିଲେ। ପରେ ଲାପ୍‌ଟପ୍‌ କିମ୍ବା ନିର୍ଦ୍ଧିଷ୍ଟ ସଫ୍ଟୱୟାର ଜରିଆରେ ଡିକୋଡର ବ୍ୟବହାର କରି ନିଜ ପାଖରେ ଥିବା ବ୍ଲାଙ୍କ କାର୍ଡକୁ ତଥ୍ୟ ଟ୍ରାନ୍ସଫର କରିନେଉଥିଲେ। ତା’ପୂର୍ବରୁ ପାସୱାର୍ଡକୁ ଅତି ଚତୁରତାର ସହ ଆଦାୟ କରିନେଉଥିଲେ। ଆଉ ସଂଗୃହୀତ ତଥ୍ୟ ଆଧାରରେ ଟଙ୍କା ଗାୟବ କରି ନେଉ ଥିଲେ। ଏଭଳି ଢ଼ଙ୍ଗରେ ଏମାନେ ଓଡ଼ିଶା ସମେତ ଝାଡ଼ଖଣ୍ଡ, ବିହାର, ମଧ୍ୟପ୍ରଦେଶ, ପଶ୍ଚିମବଙ୍ଗ, ଉତ୍ତରପ୍ରଦେଶ, ମହାରାଷ୍ଟ୍ର ଓ ଗୁଜରାଟରେ ଲୁଟ୍ କରିଛନ୍ତି ବୋଲି ପାନପୋଷ ଏସ୍‌ଡିପି ପଦ୍ମିନୀ ସାହୁ।

ଏଟିଏମ୍‌ ଲୁଟ୍‌ରୁ ବର୍ତ୍ତିବେ କେମିତି?

ଟଙ୍କା ଉଠାଇବା ସମୟରେ ପାଖରେ କାହାକୁ ରଖନ୍ତୁ ନାହିଁ। କୌଣସି ଅଜଣା ବ୍ୟକ୍ତିଙ୍କୁ ଏଟିଏମ୍ କାର୍ଡ କିମ୍ବା ପିନ୍ ନମ୍ବର ଦିଅନ୍ତୁ ନାହିଁ। କାର୍ଡ ସ୍ୱାଇପ୍ ପୂର୍ବରୁ ନିର୍ଦ୍ଧିଷ୍ଟ ସ୍ଥାନକୁ ଭଲଭାବେ ଅନୁଧ୍ୟାନ କରନ୍ତୁ। ଯଦି ମନରେ କିଛି ସନ୍ଦେହ ହେଉଛି, ତେବେ ଅନ୍ୟ ଏଟିଏମ୍‌କୁ ଯାଇ ଟଙ୍କା ଉଠାନ୍ତୁ।

Previous ArticleNext Article

Leave a Reply

Send this to a friend