ସାଢ଼େ ୪ ଲକ୍ଷ ଟଙ୍କାର ଜାଲ୍ ନୋଟ୍ ଜବତ: ୫ ଗିରଫ

rupee

ଭୁବନେଶ୍ୱର (ଓଡ଼ିଶା ରିପୋର୍ଟର): ଜାଲ୍ ନୋଟ୍ କାରବାର କରୁଥିବା ଏକ ଗ୍ୟାଙ୍ଗକୁ ଧରିଛି କମିଶନରେଟ୍ ପୋଲିସ୍‌। ସେମାନେ ବ୍ରହ୍ମପୁରରେ ନକଲି ନୋଟ୍ ଛାପି ଭୁବନେଶ୍ୱର ଆଣି ବଜାରରେ ଛାଡ଼ୁ ଥିଲେ।

କମିଶନରେଟ୍ ପୋଲିସ୍‌ର ଏକ ଟିମ୍ ଗତକାଲି ଏହି ନକଲି ନୋଟ୍ ଛପା ହେଉଥିବା କାରଖାନା ଉପରେ ଚଢ଼ାଉ କରିଥିଲା। ଚଢ଼ାଉ ବେଳେ ମାଷ୍ଟର୍‌ମାଇଣ୍ଡ୍‌ଙ୍କ ସମେତ ଦୁଇ ଜଣଙ୍କୁ ଗିରଫ କରାଯାଇଥିଲା। ସେମାନଙ୍କଠାରୁ ୪ ଲକ୍ଷ ୫୦ ହଜାର ଟଙ୍କାର ଜାଲ୍‌ ନୋଟ୍ ଜବତ କରାଯାଇଥିଲା। ଏଥିମଧ୍ୟରେ ଦୁଇ ହଜାର, ପାଞ୍ଚ ଶହ, ଦୁଇ ଶହ ଓ ପଚାଶ ଟଙ୍କିଆ ନୋଟ୍ ରହିଥିଲା। ନକଲି ନୋଟ୍ ଛାପିବା ପାଇଁ ବ୍ୟବହୃତ ହେଉଥିବା ମେସିନ୍‌ ସହିତ ଅନ୍ୟାନ୍ୟ ସାମଗ୍ରୀକୁ ପୋଲିସ୍ ଜବତ କରିଛି।

ପ୍ରଥମେ ଭୁବନେଶ୍ୱରର ତମାଣ୍ଡୋ ଥାନା ପୋଲିସ୍ ଜାଲ୍ ନୋଟ୍ କାରବାର ନେଇ ତିନି ଜଣଙ୍କୁ ଗିରଫ କରିଥିଲା। ସେମାନଙ୍କଠାରୁ ବ୍ରହ୍ମପୁରସ୍ଥିତ ଏହି ନକଲି ନୋଟ୍ ଛାପା କାରଖାନା ସମ୍ପର୍କରେ ଜଣାପଡ଼ିଥିଲା। ତା’ପରେ କମିଶନରେଟ୍ ପୋଲିସ୍‌ର କୁଇକ୍ ଆକ୍ସନ ଟିମ୍‌ ସେଠାରେ ଚଢ଼ାଉ କରିଥିଲା। ଏହି ଚଢ଼ାଉ ବେଳେ ଆଉ ଦୁଇ ଜଣଙ୍କୁ ଗିରଫ କରାଯାଇଥିଲା।

ଏହି ଜାଲ୍ ନୋଟ୍ ଗୁଡ଼ିକୁ ବିଭିନ୍ନ ଅପରାଧିକ କାର୍ଯ୍ୟକଳାପରେ ବ୍ୟବହାର କରାଯାଉଥିଲା। ବ୍ରାଉନ୍‌ସୁଗାର୍‌, ହନୁମାନ ପଇସା ଏବଂ ବିରଳ ବନ୍ୟଜନ୍ତୁ କିଣାବିକାରେ ଏହି ଜାଲ୍ ନୋଟ୍ ବ୍ୟବହାର କରାଯାଉଥିଲା ବୋଲି ଜଣାପଡ଼ିଛି। ଭୁବନେଶ୍ୱର ବ୍ୟତୀତ ରାଜ୍ୟର ଅନ୍ୟ ଅଞ୍ଚଳକୁ ମଧ୍ୟ ଏମାନେ ନକଲି ନୋଟ୍ ପଠାଉ ଥିଲେ ବୋଲି ଜଣାପଡ଼ିଛି। ସେମାନେ ବିଶେଷ କରି ଶିଳ୍ପାନୁଷ୍ଠାନ ଥିବା ସହରଗୁଡ଼ିକୁ ଟାର୍ଗେଟ୍ କରୁଥିଲେ। ତେବେ ସେମାନେ ବଜାରକୁ କେତେ ଜାଲ୍ ନୋଟ୍ ଛାଡ଼ିଛନ୍ତି ସେ ନେଇ ପୋଲିସ ତଦନ୍ତ କରୁଛି।

Previous ArticleNext Article

Leave a Reply

Send this to a friend