ବନ୍ଧା ହେଲେ କୋଟିପତି ଡାକ୍ତର

କଟକ (ଓଡ଼ିଶା ରିପୋର୍ଟର): କଟକ ବଡ଼ ମେଡ଼ିକାଲର କ୍ଲିନିକାଲ ହେମାଟୋଲୋଜି ବିଭାଗ ପ୍ରଫେସର ଡାକ୍ତର ରବୀନ୍ଦ୍ର କୁମାର ଜେନା ଗିରଫ ହୋଇଛନ୍ତି। ଗତକାଲି ସେ କୋଲକାତାରୁ ଏକ ଇନୋଭା କାର୍‌ରେ ଓଡ଼ିଶା ଫେରୁଥିବା ବେଳେ ବାଲେଶ୍ୱର ଭିଜିଲାନ୍ସ ସେଲ୍‌ର ସ୍ୱତନ୍ତ୍ର ଟିମ୍‌ ତାଙ୍କୁ ଗିରଫ କରିଥିଲା। ଆଜି ତାଙ୍କୁ କଟକ ଭିଜିଲାନ୍ସ ଜଜ୍‌ଙ୍କ କୋର୍ଟରେ ହାଜର କରାଯାଇଥିଲା। ପରେ ତାଙ୍କୁ ଜେଲ ପଠାଇ ଦିଆଯାଇଛି। ଅଧିକ ତଥ୍ୟ ଜାଣିବା ପାଇଁ ଭିଜିଲାନ୍ସ ଡାକ୍ତର ଜେନାଙ୍କୁ ରିମାଣ୍ଡରେ ଆଣିବା ପାଇଁ କୋର୍ଟରେ ଆବେଦନ କରିବ।

ଏସ୍‌ସିବିର କ୍ଲିନିକାଲ ହେମାଟୋଲୋଜି ବିଭାଗ ପ୍ରଫେସର ଡାକ୍ତର ରବୀନ୍ଦ୍ର ଜେନାଙ୍କ ପାଖରେ ଆୟଠାରୁ ଅଧିକ ସମ୍ପତ୍ତି ଥିବା ଅଭିଯୋଗରେ ଭିଜିଲାନ୍ସ ଅଧିକାରୀମାନେ ତାଙ୍କ ଅଫିସ ଓ ବାସଭବନ ସମେତ ୧୨ଟି ସ୍ଥାନରେ ଏକକାଳୀନ ଚଢ଼ଉ କରିଥିଲେ। ଏପରିକି କେନ୍ଦ୍ରାପଡ଼ା ବିଜୟନଗର ଘରେ ଚଢଉ ବେଳେ କିଛି ବ୍ୟାଙ୍କ୍ ପାସ୍ ବୁକ୍ ମଧ୍ୟ ଜବତ କରିଥିଲେ। ଗିରଫ ଭୟରେ ଡାକ୍ତର ଜେନା ରାଜ୍ୟ ଓ ରାଜ୍ୟ ବାହାରେ ଆତ୍ମଗୋପନ କରିଥିଲେ। ତାଙ୍କୁ ଗିରଫ କରିବା ପାଇଁ ଜଣେ ଡିଏସ୍‌ପି ପାହ୍ୟାର ଅଫିସରଙ୍କ ନେତୃତ୍ୱରେ ଭିଜିଲାନ୍ସ ୪ଟି ଟିମ୍‌ ଗଠନ କରିଥିଲା। ଏହି ଟିମ୍‌ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ମାତ୍ର ଗିରଫ କରିବାରେ ବିଫଳ ହୋଇଥିଲା।

ଗତ ୪ ତାରିଖରେ ଡାକ୍ତର ଜେନା କଲିକତା ପଳାଇ ଯାଇଥିଲେ। ସେଠାରେ ପ୍ରତିଦିନ ସ୍ଥାନ ପରିବର୍ତ୍ତନ କରୁଥିଲେ। ତେବେ ଅସୁସ୍ଥ ହୋଇପଡ଼ିଥିବାରୁ ଗତ ୧୭ ତାରିଖରେ କସପା ସ୍ଥିତ ରୁବିନା ଜେନେରାଲ ମେଡ଼ିକାଲରେ ଭର୍ତ୍ତି ହୋଇଥିଲେ। ଆରୋଗ୍ୟ ହେବା ପରେ ୨୦ ତାରିଖ ମଧ୍ୟାହ୍ନରେ ମେଡ଼ିକାଲରୁ ଡିସ୍‌ଚାର୍ଜ ହୋଇ ଏକ କାରରେ ଓଡ଼ିଶା ଫେରୁଥିବା ବେଳେ ଭିଜିଲାନ୍ସ ହାବୁଡ଼ରେ ପଡ଼ିଥିଲେ।

ମିଳିଥିଲା କୋଟିଏରୁ ଅଧିକ ସମ୍ପତ୍ତି

କଟକ ବଜ୍ରକବାଟୀ ସ୍ଥିତ ୟୁକୋ ବ୍ୟାଙ୍କ ଶାଖାରେ ଡାକ୍ତର ରବୀନ୍ଦ୍ର ଜେନା ଓ ପତ୍ନୀଙ୍କ ନାଁରେ ରହିଛି ଜଏଣ୍ଟ ଲକର। ଏଥିରେ ୪୦୦ ଗ୍ରାମରୁ ଅଧିକ ସୁନା ଓ ହୀରା ଅଳଙ୍କାର ଠାବ ହୋଇଥିଲା। ଯାହାର ଆନୁମାନିକ ମୂଲ୍ୟ ୧୨ ଲକ୍ଷ ଟଙ୍କା ହେବ। ସେହିପରି ଡାକ୍ତର ଜେନାଙ୍କ ଘରୁ ୩ କୋଟିରୁ ଅଧିକ ଟଙ୍କାର ମୂଲ୍ୟର ସମ୍ପତ୍ତି ଠାବ କରିଥିଲା। ଏଥିମଧ୍ୟରେ ରହିଛି ୫ଟି ଉଚ୍ଚ ଅଟ୍ଟାଳିକା। ଏହାଛଡ଼ା ଡାକ୍ତର ଜେନା ୟୁରୋପ, ଆମେରିକା ଓ ଦକ୍ଷିଣ ଏସିଆର ପ୍ରାୟ ୨୦ରୁ ଅଧିକ ଦେଶ ଭ୍ରମଣ କରିଛନ୍ତି।

Previous ArticleNext Article

Send this to a friend