ବଲାଙ୍ଗିର(ସସ୍ମିତା ସାହୁ): ସାରା ଓଡିଶାରେ ରେକର୍ଡ କରୁଛି ବଲାଙ୍ଗିର ସହରର ତାତି । ପାରଦ ପହଞ୍ଚିଲାଣି ୪୪ ଡିଗ୍ରୀରେ । ପ୍ରବଳ ତାତି ଯୋଗୁଁ ଅସ୍ତବ୍ୟସ୍ତ ହେଉଛି ସହରି ଜୀବନ । ଖରାତାତି ଯୋଗୁଁ ଲୋକେ ଘରୁ ବାହାରକୁ ଗୋଡ କାଢିବାକୁ ଭୟ କରୁଛନ୍ତି । ଏମିତି ସ୍ଥିତିରେ ରୋହିଣୀ ନାନା ନିଇତି ୩୦ କିଲୋମିଟର ଯାଆସ କରୁଛନ୍ତି। କି ଖରା କି ତାତି, କାହାରିକୁ ଖାତିର ନ କରି ତାଳସଜ ବିକିବାକୁ ସେ ଚାଲିଚାଲି ଗାଁରୁ ଆସେ ବଲାଙ୍ଗିର। ଜିଲାପାଳଙ୍କ କାର୍ଯ୍ୟାଳୟ ପାଖରେ ପସରା ମେଲି ବସିଥାଏ ସକାଳୁ ସଞ୍ଜଯାଏଁ।
ପୁରା ନାଁ ରୋହିଣୀ ସୁନାନୀ । ବୟସ ପ୍ରାୟ ୭୦ ବର୍ଷ । ଗାଁ ଜିରାଟମାଳ । ଖରାକୁ ଖାତିର ନ କରି ପ୍ରତେକ ଦିନ ଦୁଇ ପଇସା ରୋଜଗାର କରିବା ପାଇଁ ଜିରାଟମାଳ ଗାଁରୁ ୩୦ କିଲୋମିଟର ଦୂର ବଲାଙ୍ଗିର ସହରକୁ ଧାଇଁ ଆସନ୍ତି ରୋହିଣୀ । ସ୍ୱାମୀ ତାଳଗଛରୁ ତାଳ ଆଣି ସେଥିରୁ ତାଳସଜ ପ୍ରସ୍ତୁତି କରନ୍ତି । ତା ପରେ ବସ୍ରେ ରୋହିଣୀ ବଲାଙ୍ଗିରକୁ ସକାଳ ୭ ଟାରୁ ଆସନ୍ତି ବିକ୍ରି କରିବା ପାଇଁ । ଦିନକୁ ତିନି ଶହରୁ ଚାରି ଶହ ଟଙ୍କା ପର୍ଯ୍ୟନ୍ତ ବିକ୍ରି ହୁଏ । ଖରା ମାସରେ ସହର ଭିତରେ ଆଖୁ ରସ, ତରଭୂଜ, ଲସି ଆରାମରେ ମିଲିଯାଉଥିଲେ ମଧ୍ୟ ତାଳସଜ ପାଇବା କଷ୍ଟକର । ତେଣୁ ରୋହିଣୀଙ୍କ ତାଳସଜ ପାଖରେ ବେଶ ଭିଡ ଜମେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।