ମଣିଷ ଓ ପଶୁର ନିଆରା ସମ୍ପର୍କ: ‘ଚନ୍ଦୁ’ର ମୃତ୍ୟୁରେ ମ୍ରିୟମାଣ ପୂରା ପରିବାର

ନବରଙ୍ଗପୁର(ଓଡ଼ିଶା ରିପୋର୍ଟର): କୁହାଯାଏ କୁକୁର ହିଁ ମଣିଷର ପ୍ରକୃତ ବନ୍ଧୁ। ହେଲେ ପୋଷା କୁକୁରର ମୃତ୍ୟୁ ପରେ ବି ବନ୍ଧୁତାକୁ ସମ୍ମାନ ଦେବାକୁ ଯାଇ ମଣିଷ କ’ଣ କରିପାରେ ତାର ଉଦାହରଣ ଦେଖିବାକୁ ମିଳିଛି ନବରଙ୍ଗପୁରରେ। ସ୍ଥାନୀୟ ବାସିନ୍ଦା ରାମରମଣ ପଣ୍ଡା ନିଜ ପୋଷା କୁକୁର ‘ଚନ୍ଦୁ’ର ମୃତ୍ୟୁ ପରେ କ୍ରିୟାକର୍ମ କରିବା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।

ଡୋବରମ୍ୟାନ ‘ଚନ୍ଦୁ’ ରାମ ରମଣଙ୍କ ପରିବାରର ଏକ ଖାସ୍‌ ସଦସ୍ୟ ଥିଲା। ‘ଚନ୍ଦୁ’କୁ ୧୭ ଦିନ ହୋଇଥିଲା ରାମ ରମଣ ତାକୁ ଘରକୁ ଆଣିଥିଲେ। ସେବେଠୁ ନିଜ ପିଲା ଭଳି ପାଳିଥିଲେ। ସ୍ତ୍ରୀ ଆଉ ଦୁଇ ଝିଅକୁ ନେଇ ରାମରମଣଙ୍କ ପରିବାରରେ ‘ଚନ୍ଦୁ’ ବି ପାଲଟି ଯାଇଥିଲା ଅନ୍ୟ ଏକ ସଦସ୍ୟ। ଏପରି କି ରାମରମଣଙ୍କ ଦୁଇ ଝିଅ ମଧ୍ୟ ରାକ୍ଷୀ ପୂର୍ଣ୍ଣିମାରେ ‘ଚନ୍ଦୁ’କୁ ରାକ୍ଷୀ ବନ୍ଧୁଥିଲେ। ଚନ୍ଦୁ କଥା କହିପାରୁ ନଥିଲା ସତ, ହେଲେ ପଣ୍ଡା ପରିବାର ଲୋକେ ଅତି ସହଜରେ ବୁଝି ପାରୁଥିଲେ ତା’ର ଭାବନାକୁ। ମୁରବୀଙ୍କ ଅନୁପସ୍ଥିତିରେ ‘ଚନ୍ଦୁ’ ପିଲାଙ୍କ ରକ୍ଷକ ବି ସାଜୁଥିଲା।

ହେଲେ ନିକଟରେ ‘ଚନ୍ଦୁ’ ହଠାତ୍ ଅସୁସ୍ଥ ହୋଇ ଇହ ଜଗତ ତ୍ୟାଗ କରିଛି। ‘ଚନ୍ଦୁ’ର ମୃତ୍ୟୁ ପରେ ରାମ ରମଣଙ୍କ ପରିବାର ଲୋକେ ଦୁଃଖରେ ମ୍ରିୟମାଣ ହୋଇପଡ଼ିଛନ୍ତି। ‘ଚନ୍ଦୁ’ର ଦାହ ପାଇଁ ଆବଶ୍ୟକୀୟ କାଠ ଯୋଗାଡ଼ କରିବା ପରେ ଶେଷ ଶଯ୍ୟାରେ ତାକୁ ଶୁଆଇ ଦେଇଥିଲେ ତା’ର ନିଜ ଲୋକେ।। ଏମିତିକି ମୁଖାଗ୍ନି ଦେବା ବେଳେ କୋହ ସମ୍ଭାଳି ପାରି ନାହାନ୍ତି ରାମରମଣ।

Previous ArticleNext Article

Send this to a friend